Toe tatala le maketi o i’a i le aufai faiva a le atunu’u

I le umi ai o se taimi o tapunia pea faitotoa’ o le maketi o i’a i le aufai faiva a le atunu’u, mo le fa’atauina o i’a mai a latou faiga faiva, o le taeao ananafi na fa’alauiloa aloaia ai e le Matagaluega o Fefa’atauaiga ma Alamanuia (DOC) a le malo le toe tatala aloaiaina lea o faitoto’a o le maketi o i’a mo le atunu’u.

E ui foi e le o matua fa’amalosia e le DOC le aufai faiva a le atunu’u ina ia o atu uma i le nofoaga o lo o i ai le maketi o i’a mo le fa’atauina atu o i’a e maua mai i a latou faiga faiva, peita’i na taua e le sui o le DOC le tatala pea o le avanoa mo soo se sui o le aufai faiva a le atunu’u latou te fa’aaogaina ai le maketi.

“O lea ua toe tatala aloaiaina nei le maketi o i’a mo le aufai faiva a le atunu’u, ma o se avanoa lelei fo’i lea e mafai ai ona fa’atau atu i le atunu’u a latou i’a sa maua mai i a latou fagotaga, e le gata e fesoasoani ai i le atina’eina o a latou tama’i pisinisi, ae fesoasoani ai fo’i i le tausiga o aiga”, o le saunoaga lea a le sui o le DOC, susuga Tamatoa Tony Langkilde Jr.

O le toe fa’afouina o le maketi o i’a ua vaaia ai ni isi o suiga lelei ma le aoga mo le aufai faiva, ma ua mae’a fo’i ona fausia pusa’aisa e fa’aaoga e tu’u i ai i’a i le taimi e fa’atau ai, ma vaega uma e moomia mo le fa’amamaina o le nofoaga aua le malaga asiasi atu o le atunu’u.

“O le a tatalaina le maketi i aso uma o le vaiaso, amata mai i le 7:00 i le taeao seia oo atu i le 3:00 i le afiafi, e i ai fo’i se vaega tupe laititi e totogi e le tagata faifaiva mo le fa’aaogaina o le fale, o lea seleni o le a fesoasoani i le totogiina o le eletise atoa ai le fa’aleleia o ni isi o vaega o le maketi o i’a”, o le saunoaga lea a Tamatoa.

E leai ni isi o le aufai faiva na i ai i le taimi na fa’alauiloa ai le toe tatalaina o le maketi o i’a, peita’i o lo o i ai le fa’anaunauga o le Ofisa o le DOC, o le a to’atele ni isi o le aufai faiva e malaga atu mo le fa’aaogaina o le maketi.

Na taua e ni ali’i faifaiva se to’alua i le Samoa News ananafi e fa’apea, o le fa’afitauli e mafua ai ona augata manatu o le to’atele o le aufai faiva latou te fa’aaogaina le maketi o i’a, o le faigata lea ona afea e tagata fa’atau, ma ono avea ai lea fa’afitauli ma auala e a’afia ai le fa’atauina o a latou i’a mo le fa’amoemoe e maua ai se tupe mo le pisinisi ma le aiga, ma ua manatu ai ni isi o i latou, o lo o saogalemu pea nofoaga o lo o fa’atau ai a latou i’a i le taimi nei, e le gata o tafatafa o le alatele ae fa’apena fo’i i le tele o faleoloa o lo o la’u a latou i’a ma fua ai.