Toe Sauniga & Lagomau le afioga Lenamuaiao Senatoa Galea'i Moaali'itele L.K. Tuufuli

O toe sauniga o le afioga le Pulefano, Lenamuaiao Senatoa Galea'i Moaali'itele Larry Kalapu Tu'ufuli na fa'atautaia i lana Ekalesia Fa'apotopotoga a Iesu i Samoa i Fagatogo, ma sa auai le mamalu o le Malo, o lona afio'aga o Fitiuta, Manu'a ma lona Aiga.

O le sauniga sa ta'ita'ia e le susuga le Toeaina Rev. Fa'amao Asalele, o se tasi sa la'ua soifua fa'atasi a'e, ma toe galulue fa'atasi fo'i i le Matagaluega o le Puipuiga o le Saogalemu Lautele o Amerika Samoa.

O Galea’i sa soifua a'e i Fagatogo a'o alaala ai ona matua, Leatulua Kalapu Tu'ufuli lona tama mai Fagatogo ma Leone, ma Moaali'itele Talalefaleali'iotuimanu'a Moaali'itele o Fitiuta ma Ta'u i le Manu'atele o lona tina.

I le taimi o molimau sa tula'i muamua le sui o aiga, o lona tausoga le atali'i o Tito, ma ia fa'ailoa i le mamalu na auai i le sauniga, "O Galea'i ua atoa nei lona 81 tausaga a'o a'u ua 82, o lona uiga ou te matua teisi ia te ia, ma e vavalalata fo'i i ma'ua i o ma'ua manatu i mea a lenei aiga. Peita'i, e ui lava i aiga, ae sili ona auai Galea'i le fa'atinoga o ana tautua i le malo o Amerika Samoa, lea ua sili ai ona aoga i tagata lautele o le atunu'u. Ona o lea, ou te talosaga atu ai, tau ina ia manatua pea lana tautua ua aoga ai i le tatou malo ma ona tagata."

Soso'o ma le tofa le to'oto'o Malaepule Fu'ega Moliga ma sa ia fa'ailoa, "O lenei tama, e sulu i ai aiga i se fa'autaga pe a saili taofi i fa'ai'uga a aiga. A ia faia fo'i se fa'aiuga, e tamau ona lagona e to'afilemu lava lona tagata i taimi uma, e saunoa fo'i ma to'a e faailoa lona agava'a fa'ata'ita'i o aiga, ma lona tomai e na te faia ai fa'aiuga lelei mo le Aiga, o se tasi fo'i ua iloga lana tautua i totonu ma fafo o le li'o fa'aleaiga i le va ma le afio'aga ae maise le itumalo.”

Na tula'i lea o le susuga le Fa'amasino ia Logoai Siaki mo le molimau mai le Samatua, ma sa ia fa'ailoa mai, i le tausaga 2000 sa fa'ae'e ai le suafa "Galea'i" ia te ia, ina o tau faia pea le fa'ai'uga a aiga, ae o lo'o tatali le afioaga ma le itumalo, ae toe fa'ao'o atu le avea'i a Aiga, tatalia pea toeitiiti se taimi fa'ailoa mai le latou fa'aiuga. O iina na lagona ai se leo o le itumalo, ma ua fa'ailoa mai ai, "Afai e tuai pea aiga, o le a fa'ae'e e le afio'aga ma le itumalo ao o aiga i le aso. Peita'i, sa fa'aalia le mau o lana tofa faatamali'i, na i'u manuia lena fa'amoemoe. Ua iloga fo'i le umi ona tula'i mai, aua e onosa'i lava lana tofa, o le a lava sana saunoaga e fa'atino e le Samatua.”

O le molimau a le fanau, na muamua saunoa lona atali'i o Duke i uiga o lona tama, "E tautala mai i le leo filemu, ae mautinoa e tatau ona e usita'i e fa'atino lena fa'atonuga. A leai, o le Leoleo lava lo matou tama, e soifua fo'i o se leoleo e fa'amalosi tulafono ma fa'atonuga i taimi uma, e o'o lava i le li'o o le latou lotoifale. A o'o fo'i ina matou fiafia fa'atasi i le matou aiga, e matua maua lava e ia o matou loto uma. Matou te iloa fo'i, e ao ina matou usiusita'i i ana poloa'iga. Ia faia le mea sa'o!"

Soso’o ai le molimau a Maverick ma sa ia fa'ailoa mai ai le fesili na tu'u e lona tama, ma avea ma lu'i ia te ia mai lona olaga talavou, o lea lava ua tete'a i le oti le la'ua mafutaga ma lona tama, ae le suia ai lana fa'alogo pea i lena fesili. "O le a sau mea e fai i lou olaga?" Na fesiligia o ia a'o a'oga i le Samoana, na alu atu lava su'e loa ma le su'ega a le USArmy ma alu atu ai loa lava. E ui ina tagi si ona tina, ae sa ia va'aia le to'afilemu o lona tama ma lana ataata ua fa'amalieina lona loto i la'u filifiliga ua faia.”

O le ali'i o Pulefanolefolasa na soso'o ai, ma sa ia fa'ailoa, "O a'u lava lenei o le mamoe uliuli o le aiga. Sa ou maua i le olaga leaga o le tagovale ma ave mea taua a si o'u tina ma faaalu i a'u uo, ae na matua maini ai lava fo'i le pa'u i le sasa a le toeaina, e ui ina talosaga Marlene ma i latou, ua lava le sasaina o a'u. Pau lana tala sa tu'uina mai i le a'oa'iga o a'u, E lua lava mea e o'o ai lo'u lima i la'u fanau na tausi, o le tamaititi e gaoi ma le tamaititi e pepelo. O le amataga lava lena o mea leaga uma! Matou te iloa lelei lona olaga o se Leoleo i lana tausiga ma le a'oa'oga o i matou uma. Fai le mea sa'o, e le taitai ona e sese pe a fai le mea sa'o!"

O Patrick na soso'o ai lana molimau ma sa ia fa'ailoa le uiga tausa'afia o lona tama i le fa'atonuga o i latou. Sa fiafia ia te ia aua e ola fesilisili i lea mea ma lea mea, aua sa vaetama o ia e se tasi o tuafafine o lona tama ma lona to'alua faife'au. Ona o lea tulaga o le tausi ese mai le li'o o lou aiga moni, na mafua ai ona ola fesilisili lona olaga, ona e fia iloa mafuaga o mea. Na ia fesiligia le latou tama, "Fa'amata o le a se mea ou te fia faia i le lumana'i? Fa'apefea ona ou mautinoa o le mea lena ou te fia faia?" Na tali mai o ia ma fa'ailoa mai, "Po'o le a lava se mea e te faia, ia faia ma lou fiafia i ai ma e ui ina fita le ala e fa'atino ai lena mea, e te le tu'ua lava, aua o lea e te fiafia e fai. O oe a lena."

O le toe molimau o Richard, lea ua tula'i mai o se tasi e lelei lona fofoga i mea fa'asamoa i totonu o le latou aiga atoa. O ia fo'i lea e masa'a uma i ai le ato ponapona a le tama matua i tulaga o mea fa'aleaiga, mea fa'aleaganu'u aua e fiafia i ai lona tagata talavou.

"Ae le'i malaga nei le tama, ua ia silafia lelei, o a'u ou te fiafia e a'oa'o lauga fa'asamoa, ua aoga fo'i ia te a'u le avea o a'u ma faiava i le aiga o lo'u to'alua, aua ua fai me fesilisili si o'u tama i le aiga, pe a mai sa'u tu fa'afaiava i totonu o le latou aiga. E le'i mamao atu lava ona talanoa mai si o'u tama e tusa ai o lona fiafia, ou te fiafia e avea le aganu'u fa'asamoa o se mea ou te fiafia e fai i aso uma.”

E to'atasi lava le tama'ita'i o alo o Galea'i sa molimau, o ia lea o Taisamasamaotuimanu'a Hendry. I le la'ua toe feiloa'iga ma si ona tama a'o le'i tu'ua ai le malo, sa ia fa'ailoa atu ai ia te ia, "Masalo e le tele se taimi o ta'ua e feiloa'i ai ma talanoa, ae ia e iloa lelei, ou te alofa ia te oe! Afai ou te le fai atu ia te oe i le tele o taimi, ae o lo'o i ai lava i lo'u fatu."

I le molimau a le susuga le Faife'au Rev. Emau Amosa o Kokoland CCJS, sa ia fa'ailoa ai, "O lenei le tama finau i mea lelei mo le Ekalesia. E ui ina la'ititi le Ekalesia i Kokoland, ae ua ia filifili e tautua mai ai. E fai lona loto i le auaunaga i lona Atua. O ia o se tasi e sulufai i ai lo'u faife'au i se fautuaga i mea e fa'atino mo le Ekalesia. O lana fautua e aoga tele ma iloga i totonu o le mafutaga ma le Ekalesia."

Na molimau Rev. Asalele, "O lenei le tagata e fiafia e fa'atutu Ekalesia i totonu o le atunu'u. Na ma'ua ekalesia fa'atasi mai lava a'o tasi le lala i Fagatogo nei, ona soso'o lea ma fa'atu le lala i Naumati, sa i ai fo'i o ia i lenei mulia'a tau feula o le galuega a le Atua. Toe amata mai le isi galuega fou i Kokolana, lea fo'i ua se'e i ai e auai i lona fa'atula'ia mai ina ia mautinoa ua ola ma vi'ia ai le Atua."

"O lona naunauta'iga o Vi'iga o le Atua ma o ia o se Ta Okeni matagofie tele. E a'oina e ia le aufaipese i pese ma fatuga Fa'a-Salamo. Lea lava e i ai vi'iga o le Atua sa ia toe aumaia ina ia toe usuina e le Ekalesia. Na malaga i fafo a'o talavou sa tata i Hawaii ina ua fa'atuina ai le Ekalesia sa galulue i ai ma le tina ia Molia ma le fanau.”