Toe pa’u i lalo totogi o pemita mo Nesionale

Pago Pago - AMERIKA SAMOA

I se tali atu i le polokalama fou a le faigamalo a Amerika Samoa mo pemita 7 aso, ua toe faapa’u ai i lalo e le malo o Samoa ia le totogi o pemita mo Nesionale o le Iunaite Setete po o sitiseni o Amerika Samoa, o lo o faimalaga atu i Samoa.

O lenei maliliega sa faia i le va o malo a Samoa e lua, i le latou soalaupulega Atoa o Samoa lea sa faia i ni nai vaiaso ua te’a atu nei.

I vaitaimi ua tuanai, o le tau o le pemita 1-14 aso e mafai ona ulufale atu ai Nesionale a le Iunaite Setete, i Samoa, e $20.  Ma o lea pemita e mafai ona totogi i le latou ofisa a le konesula a Samoa i Ottoville, Tafuna.  O le totogi fou lea ua pa’u mai nei iai lenei pemita, e $10, ma e maua lava i le aso e apalai ma totogi ai le pemita.

Ae o lo’o talosagaina pea le mamalu o tagata faimalaga ina ia talosaga a latou pemita, i se taimi vave. 

E iai foi nisi o tulaga e manaomia ona ausia e tagata faimalaga ina ia mafai ai ona talia talosaga mo se pemita, e pei o se tusi folau po o CI (Certificate of Identity) ia silia ma le 6 masina o aoga ma le pasese e faamaonia ai, e le ova atu ma le 7 aso o lo o fuafua e malaga ai i Samoa.

Ua fautuaina foi tagata malaga, afai ae sili atu ma le 7 aso le faigamalaga ona o ni mafuaaga le ma’alofia, e manaomia ona faafesootai le ofisa o femalagaiga i Apia, ma e totogi foi le tupa mo aso ia o le a faasilia i Samoa.

I se faatalanoaga ma le Konesula Sili a Samoa i totonu o Amerika Samoa, le susuga Fata Brian Kaio, sa ia fa’aalia mai ai, e 10 lelei pemita 7 aso na pasia e lo latou ofisa i le uluai aso na amata faamalosia ai lenei polokalama fou, i le aso Tofi Oketopa 19.  O le aso foi lea na amata faamalosia ai foi ma le polokalama fou a Amerika Samoa, mo pemita 7 aso e mafai ona ulufale mai ai se tagata mai i Samoa, i totonu o le teritori.

O le aso na soso’o ai, e 14 pemita 7 aso na pasia.

I le atoa ai o le vaiaso i le aso Tofi o le vaiaso ua tuanai, o lenei polokalama, e 20 pemita pasia i le aso, ma o lo o iai se talitonuga, o le a faapea ona si’itia lea fuainumera, i le o’o atu i vaitaimi o aso fiafia o loma nei.

Na saunoa le susuga ia Fata, o se faamanuiaga lenei mo tagata faimalaga pupu’u, pei o tagata faipisinisi, o aiga o lo o faimalaga atu mo faalavelave, o tagat a ta’aalo ia ma i latou o lo o faimalaga atu mo fuafuaga tau aoga ma fonotaga.

Na ta’ua e le alii Konesula, i nei mau tausaga ua te’a atu, e tele tupe alu i kilia mai leoleo ma falemai faatasi ai ma le tele o le gasu i le tau aumaia o kopi o nei kilia, kopi o tusi folau o kopi o pasese, i ‘sponsors’ iinei i Amerika Samoa, ona toe pisi foi lea o le ‘sponsor’ ina ia mafai ona saini uma pepa talosaga mai i le sa’o o le aiga ma le pulenu’u.  Ona faaopoopo lea iai ma le tupe totogi mo pemita 30 aso.

Na saunoa Fata, na saua i lana faalogo le tele o faasea mai i se faipule o lo o finagalo pea e fai kilia mai le ofisa a leoleo ma le falemai.   Ae peitai, o le taofi a le alii konesula, ua 20 tausaga o mafai ona faimalaga atu tagata o Amerika Samoa i Samoa, e aunoa ma le tapaina o nei ituaiga kilia.

Sa ta’ua foi e le susuga i le alii konesula, o le toatele o tagata faimalaga o lo o manaomia ona malaga mai i Amerika Samoa mo ni nai aso, e atugalu ona o le tele o tupe totogi ma mea e manaomia e mafai ai ona maua se pemita.  Ae I le polokalama fou mo pemita, ua fa’aalia le agaga fa’afetai ona ua mafai ona le toe faia nei tulaga.

I se manatu fa’aalia a le susuga i le konesula, e pei ona sa ia fa’asoa atu i seisi foi sui o vaega fa’asalalau, e le mafai ona alualu i luma lenei polokalama pe afai e faasinosino lima.  Sa ia fa’aalia lona agaga fa’afetai i taitai o malo e lua ma a latou kapeneta, ona o a latou galuega fit aua mafai ai ona tino mai nei polokalama e fa’afaigofie ai mea uma mo tagata lautele.

Na saunoa foi Fata i le taua o le auai o sui o le kapeneta i le Atoa o Samoa, ua mafai ai ona tele ni faaiuga lelei ma le aoga ua maua mai ai.

O le susuga Fata Brian Kaio, sa filifilia ia Me o le tausaga nei e avea ma Konesula a Samoa i totonu o Amerika Samoa.  Sa avea o ia ma Konesula i Ausetalia i le 2013.  Ina ua ia toe taliu mai i Samoa, na filifilia o ia e avea ma sui Faatonusili i totonu o le Minisita a le Palemia, ae peitai, na ia fa’amavae i le 2020 ma malaga atu i Egelani mo le fa’aauauina o ana aoaoga, lea na ia faauu mai ai i le Masters i galuega fa’avaomalo.

O lona toe taliu mai i Samoa, na filifilia ai o ia e sui tulaga i le susuga Fonoti Manogiamanu Etuale Ioane lea sa avea ma Konesula a Samoa i totonu o Amerika Samoa.