Toe molia tulafono le alii na tausala muamua i le faaoolima ma le goai

Pago Pago, AMERIKA SAMOA

O le lua masina talu ai nei na taofia faapagota ai e Leoleo se ali’i o loo nofovaavaaia ona o le faaoolima ma le gaoi, ina ua taofi e Leoleo lana ta’avale I le soona alu saoasaoa I luga o le alatele ae maua ai fualaau fa’asaina. Na taua e le susuga a Afato Numia Leoleo, o fualaau fa’asaina na maua i lana ta’avale, na fa’atau mai i se alii mai Vaitogi, e masani lava ona alu atu e tulei ma faatau atu fualaau faasaina ia te ia ma ana uo.

Na taua e le malo i le latou tagi e fa’apea, a o tiute ni Leoleo se to’alua i luga o le alatele a le malo i Futiga i le afiafi o le aso 12 o Mati 2021, na la molimauina ai se ta’avale pikiapu o lo o sau mai Leonei e agai mai I Futiga i se saoasaoa e le tusa ma le tulafono.

Na faatino e Leoleo le auala e masani ona fa’atino ma taofia ai loa le ta’avale pikiapu lanu uliuli i luma o se faleoloa i Malaeimi. E to’alua ali’i sa i totonu o le ta’avale, o le susuga a Afato Numia, o ia lea o le ave ta’avale, lea fo’i o lo o molia i lenei mataupu, ma le susuga a Alfred Oliva.

Na faailoa e Leoleo ia Numia le mafua’aga o le taofia o lana ta’avale ona o le soona alu saoasaoa i luga o le alatele mai maila faatulafonoina, peita’i na finau le ali’i ave ta’avale ia Numia fai mai, e le i soona alu saoasaoa lana ta’avale o lea lava sa alu i maila faatulafonoina o le alatele.

Na umi se taimi o finau Leoleo ma le ali’i ave ta’avale, ona talosaga lea o Leoleo i le ali’i ave ta’avale e avatu lona laisene ave ta’avale se’i vaai poo lelei. Na vaaia e Leoleo foliga te’i ma le popole o le ali’i ave ta’avale ao talosagaina lona laisene. E leai se laisene ave ta’avale sa i le alii ave taavale i le taimi na taofia ai lana ta’avale ma fesiligia ai o ia. E o o lava fo’i i soo se isi lava ituaiga pepa e faamaonia ai o ia, e leai ma se mea na maua i le taimi lea.

Na saili e Leoleo le igoa o Afato Numia i faamaumauga a le Ofisa o Ta’avale Afi ma faamaonia ai, e i ai le laisene ave ta’avale a Numia ae na mae’a lona aoga i le aso 20 o Mati, 2019.

Talu ai ua le ausia e le alii ave ta’avale tulafono i luga o le alatele, na fa’ailoa ai loa e Leoleo le faaiuga ua faia, o le taofia lea o lana ta’avale i lalo o le vaaiga a Leoleo, atoa ai ma le auina atu o ia i le Ofisa o Leoleo i Tafuna mo isi suesuega atili. E ui na musu le alii ave taavale peita’i na i’u lava ina malie lona loto ma latou malaga atu loa ma Leoleo. Na auina faatasi atu ai fo’i ma le ali’i na to’alua ma Numia i totonu o lana ta’avale, le susuga a Oliva.

A o le i auina atu Numia i le Ofisa o Leoleo i Tafuna, sa ia tago ma tu’u se ato faafafa lanu uliuli i le Leoleo ma lana faaupuga, e ave le ato ia Oliva. Na fesili le Leoleo ia Numia poo ai e ana le ato, ae na tali Numia, “o le ato a Oliva”. Na tete’e malos le susuga a Oliva ma fai i le Leoleo, e le o ia e ana le ato, o le ato a le susuga a Numia.

Na taunu’u le ta’avale i le Ofisa o Leoleo i Tafuna ona toe alu lea o le Leoleo ma toe ave le ato ia Numia ma fai i ai, o loo tete’e le susuga a Oliva fai mai e le o ia e ana le ato. Na finau malosi pea le ua molia ma fai i le Leoleo, e toe fo’i e ave le ato ia Oliva, o ia e ana le ato. O le taimi lea na fai ai loa le Leoleo i le alii ave tavole ua molia, mo se avanoa e su’e ai le ato.

Ina ua tatala e Leoleo le ato, na maua i ai ni pepa iila laiti se 3 o lo o i ai vaega o le pauta paepae, faapea ai ma se pepa iila laititi se tasi o lo o i ai lau mamago lanu meamata. Na faia se suega i le pauta paepae ma faamaonia ai, o vaega ia o le pauta faasaina o le aisa. Na faia fo’i se suega i lau mamago lanumeamata ma faamaonia ai, o vaega ia o le laau faasaina o le mariuana.

Na saili e Leoleo le ta’avale ma maua ai ni isi o mea e fa’aaoga mo le tuleiina atu o fualaau faasaina e pei o tamai pepa iila ma straws e ta tipi tulimanu. 

Ina ua fesiligia e Leoleo ia Oliva, sa ia faamaonia ai,  e le i atoa se 2 vaiaso talu ona la masani ma Numia. E masani ona alu e fesoasoani i galuega a Numia i lona fanua ma lana ma’umaga, ae i ai fo’i taimi na te iloa ai o lo o tulei e Numia fualaau fa’asaina.

I le aso e pei ona taofia ai le la ta’avale, na taua ai e Oliva le la aga’i atu i le nofoaga o loo fatau ai fualaau faasaina i Vaitogi ma faatau mai ai e Numia fualaau faasaina ma le faamoemoe e fa’aaoga mo ia lava. Na ta’utino Oliva, na te le tagofia fualaau faasaina.

E ui na tete’e malosi Numia i le ulua’i taimi na fesiligia ai o ia e Leoleo e faatatau i fualaau faasaina sa maua i totonu o le ato, peita’i na ia malie mulimuli ane ai e faailoa i Leoleo faamatalaga uma e uiga i fualaau faasaina.

Na taua e le ua molia, o ia e masani ona alu i se nofoaga i le afioaga i Vaitogi ma Iliili e faatau mai ai ana fualaau fa’asaina e ula ma fa’aaoga mo ia lava. I le aso e pei ona taua, na la o ai ma Oliva i le nofoaga masani lea e faatau mai ai ni fualaau faasaina mo ia ina ua mae’a le la galuega, o le faamamaina lea o lona fanua faapea ai ma le velega o le ma’umaga.

Na tatala i tua Oliva e aunoa ma ni moliaga na faia faasaga ia te ia, sei vagana ai Numia na taofia e Leoleo ma molia i le tulafono.

O le 2 masina talu ai na tula’i ai Numia i luma o le Fa’amasinoga Faaitumalo. O le ali’i Loia Fautua ia Michael White na tula’i mo ia, ae o le ali’i Loia Sili lagolago ia Robert Morrison III na tula’i mo le malo.

Ua molia e le malo ia Numia i le moliaga o le umia faasolitulafono o vaega o le pauta faasaina o le aisa; faapea ai ma le moliaga o le umia faasolitulafono o lau o le laau faasaina o le mariuana; o ni solitulafono mamafa e mafai ona faasala ai se tasi mai le 5 e oo atu i le10 tausaga, pe faasala foi i le salatupe e oo atu i le $20,000, poo le faasala foi i faasalaga uma ia e lua.

E $15,000 le vaega tupe lea ua fa’atulaga e tatala ai i tua Numia.

Afai ae mafai ona tatala o ia i tua, e le mafai ona ia toe taumafai e faafesoota’i molimau a le malo, e aofia ai ma le ali’i lea na la to’alua i totonu o lana ta’avale; e le mafai ona ia tuua le atunuu e aunoa ma se faatanaga a le Fa’amasinoga, e le mafai fo’i ona ia toe tagofia fualaau faasaina poo le ‘ava malosi, a ia avea o ia ma tagatanu’u e tausi i tulafono a le malo.

O le taimi o le ulua’i tula’i a Numia, na faailoa ai e lana loia lona mana’o e fa’ataunu’u lana ulua’i iloiloga ma le malo.

MATAUPU MUAMUA

O le aso 2015 na ta’usala ai e le Faamasinoga Maualuga ia le alii ua molia nei i le moliaga mamafa o le faaoolima i le tulaga lua ma le gaoi, ma faanofovaavaaia ai o ia mo le 5 tausaga i lalo o tuutuuga e ao ona ia usitaia. O nisi o ia tuutuuga e aofia ai lona tuli o masina e 20 i le Toese i Tafuna, faasa ona ia toe soli se tulafono, faasa fo’i ona ia toe tagofia le ‘ava malosi poo fualaau fa’asaina.

O moliaga e lua e pei ona ta’usala ai Numia na afua mai i se inugapia sa faia i le fale o se tasi o ana uo i Tafuna, ma tula’i mai ai loa se vevesi i le va o ia ma le alii na aafia. Na fa’aaoga e Numia se u’amea sa i tua o le keli o lana pikiapu ma faaoo ai manu’a i le alii na aafia e ala i lona sasa o lona ulu ma manu’a tigaina ai.

A o ta’atia le ali’i na aafia i lalo ua manu’a, ae na toe savali atu Numia ma kiki lona tau’au ma le papatua, toe sosoo atu ai ma isi ana tu’i e 2. Ina ua mae’a, na talepe e Numia le ta’avale a le alii na manu’a ae gaoi lana telefoni ma lana ato tupe e silla i le $300 le tinoitupe sa i ai i totonu.