Toe molia i le tulafono se alii talavou i le talepe fale ma le gaoi

Pago Pago - AMERIKA SAMOA

O le ali’i talavou e 27 tausaga lea na pu’e faapagota e Leoleo i le masina na te’a nei ona o tu’uaiga i lona osofaia lea o ni fale se 2 i le afioaga i Leone ma ave faagaoi le tele o meatotino sa i ai i totonu, na ia faailoa i Leoleo i le taimi na pu’e faapagota ai o ia, o le tele o oloa na aumai faagaoi mai I le fale na ia osofaia, sa tufatufa atu lea i ana uo. 

Ae ina ua pu’e faapagota e Leoleo le ali’i ua molia i lalo o se poloaiga mai le Fa’amasinoga, na maua ai e Leoleo i lona tino vaega o fualaau fa’asaina o le aisa ma le mariuana. 

E 2 tagi eseese ua faila e le malo fa’asaga ia Koloseta Ioelu, poo Seta Ioelu fo’i e pei ona iloa ai o ia e le to’atele o tagata ma ana uo. 

I le tagi lona muamua, ua molia ai e le malo Ioelu i molaiga e 2 o le talepe fale i le tulaga muamua, 2 moliaga o le gaoi, o le vaega C lea o solitulafono mamafa, lea e mafai ona fa’asala ai se tasi i le Toese mo le umi e oo atu i le 7 tausaga, pe fa’asala i le salatupe e oo atui le $5,000, pe fa’asala fo’i i fa’asalaga uma ia e 2.

I le tagi lona lua fa’asaga ia Ioelu, ua tu’uaia ai o ia e le malo i le moliaga e tasi o le umia faasolitulafono o vaega o le pauta fa’asaina o le aisa, tasi le moliaga o le umia faasolitulafono o vaega o le laau fa’asaina o le mariuana, o ni solitulafono mamafa e mafai ona fa’asala ai se tasi i le Toese mo le umi e oo atu i le 10 tausaga, pe fa’asala foi i le salatupe e oo atu i le $20,000, pe faasala fo’i i fa’asalaga uma ia e 2; faapea ai ma le moliaga mama o le faatupu vevesi i nofoaga faitele. 

E $15,000 lea ua fa’atulaga e le Fa’amasinoga e tatala ai i tua le ua molia. 

Afai ae tatala Ioelu i tua mai le Toese i Tafuna, e le mafai ona ia taumafai e tuua le atunuu pe sola faamalosi ese fo’i, ia fesoota’i vava lalata ma lana loia, ia auai i soo se taimi e valaau ai lana mataupu, ma aua fo’i nei ona taumafai e faafesootai molimau a le malo e aofia ai ma i latou na aafia i lana solitulafono.

TAGI A LE MALO

O lenei mataupu na tofu atu i le Ofisa o Leoleo i Tafuna, ina ua talosagaina e ni aiga se to’alua mai le afioaga i Leone se fesoasoani a Leoleo, e tusa ai o a latou fale na osofaia e ni tagata i le masina na te’a nei.

O le fale muamua na osofaia lea i le vaveao o le aso 13 o Oketopa, 2022, ae o le fale lona lua na osofaia lea i le vaveao o le aso 19 o Oketopa, tusa lea e 6 aso talu ona mae’a le osofaiga muamua. 

Na taua e le aiga na muamua aafia le fale i lenei osofaiga i Leoleo e fa’apea, o latou na momoe i le isi o latou aiga i Pava’ia’i i le po o le aso 13 o le masina o Oketopa. O le taeao na sosoo ai, Oketopa 14, na latou toe fo’i ane ai i lo latou fale i Leone, ae na faateia i latou ina ua latou vaaia le paepae o lavalava i fafo o le lotoa o le fale. 

Na faanatinati le Tina ma lana fanau i totonu o le latou fale ma faamaonia ai le osofaia e ni tagata o le fale. Tele meatotino na gaoia, malepe le faamalama i le tulimanu i tua o le fale, e oo lava fo’i i meafale i totonu ua gasu solo ma faaleaga e tagata.

O nisi o meatotino na taua e le Tina e ana le fale na ave faagaoi e aofia ai lavalava, o seevae, o mea faigaluega a lona to’alua e alu i le uila, faapea ai telefoni feavea’i ma le laptop a lana tama teine sa i totonu o le potu. E oo fo’i i mea e fai ai teuga a tama’ita’i na ave faagaoi uma fo’i le ato sa teu malu ai.

A o taumafai Leoleo e tu’u faatasia mau faamaonia mai le nofoaga na tula’i ai le fa’alavelave, atoa ai ma le taumafai e saili ni molimau e fesoasoani i lenei mataupu, ae latou mauaina loa fo’i se telefoni mai le aiga lona lua, e faatatau i le latou fale na osofa’i ma faaleaga e tagata.

Na taua e le Tina na faafesoota’iaina Leoleo e fa’apea, o le fale na aafia, o le fale a lona uso matua o loo i Hawaii, ae o loo latou vaaia atua ma lona to’alua ma le la fanau le fale, peita’i o le po o le aso 19 o Oketopa ao pisi i le tapenaina o le pati o le aso fanau a le atalii o lona tuagane i Nu’uuli, na osofaia ai loa e se tagata le latou fale ma ave faagaoi nisi o meaaoga sa i ai i totonu.

Na taunuu Leoleo ma latou molimauina ai foliga faaletonu i totonu o le fale, faapea ai ma le tulimanu na talepe e le au gaoi ae ulufale faamalosi ai i totonu o le fale. E tusa ma le $800 le tau aofa’i o meatotino na ave faagaoi mai totonu o lea fale. O ni isi o ia meatotino e aofia ai ni telefoni ma se iPad, o lavalava ma pea seevae sa i totonu uma o le fale. 

E tasi le vaiaso talu ona galulue Leoleo i le tau sailiina lea o se molimau poo ni molimau e mafai ona fesoasoani ia te i latou, ae logoina loa e se isi Tama’ita’i Leoleo Satini ali’i Leoleo o loo suesueina lenei mataupu, e faatatau i se tasi o ona tei tama’ita’i o loo mana’o e talanoa mai i Leoleo e fa’atatau i lenei mataupu. 

Na taua e le tama’ita’i Leoleo Satini i Leoleo Suesue e fa’apea, na faateia o ia ina ua vili atu lona teine teine ma faailoa atu ia te ia faamatalaga uma o loo ia iloa e uiga i lenei mataupu. 

Na  taua e le molimau e fa’apea, e silia i le 10  masina o fai le la faiga uo ma se ali’i e igoa ia Seta [Ioelu], lea ali’i o loo molia i lenei mataupu. I le po o le aso 21 o Oketopa o le tausaga nei, na faamanatu ai le aso fanau o  i le fale o Ioelu, peita’i, o le po fo’i lea na ia faalogoina ai talanoaga a Ioelu ma ana uo e to’alua e fa’atatau i fale e 2 i Leone ma latou osofaia.

O se tasi o meatotino na gaoia e le ua molia mai le fale muamua na a’afia, o se pea tautaliga auro na foa’i e le ua molia mo lana uo tama’ita’i. O lea tau taliga auro na toe fa’afo’i atu e le tama’ita’i molimau lea i Leoleo, ma faamaonia mai ai e le Tina e ana le fale muamua na osofaia e Leoleo, o le isi lea pea tautaliga na leiloa mai i lona fale.

O le masina na te’a nei na aga’i atu ai loa Leoleo e tau saili Ioelu ma pu’e faapagota o ia, i lalo o se poloaiga mai le Fa’amasinoga, peita’i na fiu Leoleo e tau saili le ua molia ua le toe maua poo fea tonu se nofoaga ua sosola aga’i ai.

Ae o le masina na te’a nei, na aga’i atu ai Leoleo i se faalavelave faatupu vevesi na tula’i mai i Vaitogi, faasaga i ni ali’i se to’alua o loo fufusu ma lafo upu mataga i luma o se faleoloa Asia. Na taunu’u Leoleo ma latou maua ai na o le alii e to’atasi, na latou pue faapagota loa ia te ia, ma iloa mulimuli ane ai e Leoleo, o le tagata tonu lea o loo latou tau sailia e ala i le poloaiga a le Fa’amasinoga.

A o le i auina atu Ioelu i le Ofisa o Leoleo mo suesuega, sa saili e Leoleo lona tino pe maua ai ni aupega poo ni fualaau fa’asaina. I le taimi na sailia ai e Leoleo le tino a le ua molia, na maua ai i le taga o lona ofu sa faia se pepa iila o lo o i ai vaega o le pauta faasaina o le aisa. Sa maua ai fo’i i totonu o le taga o lona ofu se sikaleti mariuana ua uma ona taai. 

Ina ua fesiligia e Leoleo Ioelu e tusa ai o fale e 2 i Leone o loo tu’uaia o ia na ia osofaia ma gaoi, na manatu ai le ua molia e le faia sana faamatalaga i Leoleo. E le i faailoa fo’i e le ua molia i Leoleo poo fea na aumai ai fualaau fa’asaina na maua ia te ia.