Toe loka se alii faatupu faalavelave

Pago Pago - AMERIKA SAMOA

E tusa ai ma fa’amaumauga a le malo o le afiafi o le aso 6 o Iulai, 2024, na vala’au atu ai se pule o se faleoloa i le Ofisa a Leoleo i Fagatogo ona o se alii o lo’o fa’atupu vevesi i totonu o lona faleoloa.

Ina ua taunu’u leoleo i le faleoloa o si faatau oloa loto mafatia, na fetaui se alii o la’ei i se mitiafu lima pu’upu’u lanu uliuli ma ofuvae uliuli, o ulufafo mai, mai i le faoloa, o lo’o ia u’uina se ato.

Sa fa’ailoa ifo e le faatau oloa i leoleo, o le alii lea sa faatupu vevesi i totonu o le faleoloa, ma ia fa’aali foi i leoleo ia le ata vitio sa pu’eina ai le gaioiga a le ua molia, sa faia i totonu o le faleoloa.

Na maitau e leoleo, o le alii lea o lo’o tu’uaia e le faatau oloa, o le susuga ia Sefo Lemalu, ma o se tagata e molia so’o i le tulafono ona o lenei lava solitulafono e tasi.

Sa taumafai leoleo e saili le ua molia i nofoaga latalata ane o le faleoloa i Utulei, ae peitai, sa le’i mauaina o ia.

Ae i le lua itula na soso’o ai, sa toe vaaia ai e leoleo ia se alii o laulauvavale solo i luma o le Tedi o Samoa, ma tamo’e agai i le maketi.

O le afiafi lava foi lena na toe maua ai e le Ofisa Leoleo i Fagatogo seisi ripoti e tusa ai ma se alii o lo’o faatupu vevesi i luma o le Tool Shop i Malaloa.

Ina ua taunu’u leoleo sa va’aia nisi o fa’ata’amilo i se alii, lea na malamalama ifo le mataupu, o Lemalu, le tagata lava e tasi lea na faapisa i luma o le Tedi.

Ae ina ua taumafai leoleo e faatalanoa le ua molia, ae palauvale mai i leoleo ma taumafai e tu’i se alii na tu i tafatafa ma palauvale iai.

Sa faapea foi ona oso mai Lemalu i se tasi o leoleo, ae na mafai ona taofiofi o ia, e isi leoleo.  Ae ina ua taumafai leoleo e loka ona lima, sa fiti solo Lemalu ma ‘e’e ma palauvale.

E ui i lea, na mafai ona lokaina ona lima e leoleo ma aveina o ia i le Ofisa a Leoleo i Fagatogo.

Na fa’aauau lava uiga o Lemalu i le ofisa a leoleo, na o’o lava i lona palauvale i se leoleo ma taumafai e tu i luga o le nofoa sa saofa’i ai, atoa ai ma lona taumafai e u’u mai le nofoa e togi ai leoleo.

Na faapea loa ona aveina Lemalu e leoleo i le to’ese i Tafuna.  Ma o lo’o ta’ua foi le tauivi o leoleo ma Lemalu i le tau aveina o ia i totonu o le ta’avale, mo le aveina atu o ia i le to’ese i Tafuna.

Ua molia nei lenei alii 36 tausaga, i moliaga e aofia ai;

Faitauga 1:  Faatupu Vevesi i Nofoaga Faiatele – o se vaega ‘B’ o solitulafono mama, e mafai ona nofosala ai i le falepuipui mo le ono (6) masina po o se sala tupe e $500; po o faasalaga uma e lua.

Faitauga 2:  Tete’e a’o taumafai leoleo e ave faapagota – o se vaega ‘C’ o solitulafono mama, e mafai ona nofosala ai i le falepuipui, i le o’o atu i le tausaga (1) po o se sala tupe e $1,000; po o faasalaga uma e lua.

Faitauga 3:  Fa’ao’olima i lona tulaga e tolu – o se vaega ‘A o solitulafono mama, e mafai ona nofosala ai i le falepuipui, i le o’o atu i le tausaga po o se sala tupe e $1,000; po o faasalaga uma e lua.

E $5,000 se vaegatupe sa faatulagaina, e mafai ona tatalaina ai le ua molia mai i le falepuipui, e faatalitali ai lona faamasinoga.