Toe inumia fuala’au o le Mumu Tutupa

— le’i ausia pasene o le manumalo

“E tatau ona malo a’ia’i Amerika Samoa i le taua ma le Ma’i mataga o le Mumu Tutupa! E sili ia i tatou Matua o fanau talavou, ona nofo mautinoa, e le o toe i ai siama o le mumu tutupa i le toto o lau tama! Aua afai e i ai pea le pasene maualuga o le siama ma anufe i le toto o nisi e to’atele o le atunu’u, o lona uiga, e toe fa’ateleina fo’i lenei ma’i mataga i o tatou tagata, i se tausaga e le o toe mamao, aua e fe’avea’ia e le Namu, lea e matua tele lava i o tatou laufanua.”

O se fa’amatalaga lea a le tama’ita’i foma’i o vaila’au mo togafitiga, po’o le potu talavai a le falema’i o le LBJ i Faga’alu, Dr Francine Amoa.

I le mae’a ai o le fa’ainumaga tele o fuala’au o le Mumu Tutupa 2018, na faia loa le sailiga a le Matagaluega o le Soifua Maloloina (DOH, pe ua tua ma ni a le taumafaiga ina ia soloa ma tineia ese le Mumu Tutupa mai Amerika Samoa. E 2,085 tagata na o’o atu vaega o le Soifua Maloloina e toe tuia mai latou toto mai aiga e afua mai le nu’u tupito o Fagali’i se’ia Onenoa i Tutuila atoa.

Mai lea 2,085 tagata e to’a 47 i latou ua maua i o latou toto anufe o le Mumu Tutupa. A sailia i le pasene fa’atulagaina a le WHO e mafai ai ona taofia loa le fa’ainumia pea o fuala’au o le mumu i le atunu’u, e 2.3%, o lo’o maualuga pea lea i le 1% aga’i i lalo, e fa’amuta ai loa le toe fa’ainumia o fuala’au mumu i le atunu’u.

O le to’a 47 lea na maua ai anufe o le Mumu Tutupa i o latou toto, e le’i inumia e i latou fuala’au o le Mumu Tutupa i le fa’ainumaga tele a le DOH lea na fa’asolo i le atunu’u 2018.  Mai lea to’a 47, e 74% o i latou na o tamaiti talavou mai le 5-10 tausaga le matutua. O le vala lea e ao ai ina tima’ia matua, e alofagia, galulue ma le matagaluega o le soifua maloloina, ina ia maloloina lou alo mai lenei ma’i leaga ma le mataga, ina nei a’afia ai lou alo, i se taimi mulimuli ane o lona soifuaga, ae ua le mafai ona toe tineia.

Ina ua fa’ainumia le to’a 47 lea na maua toto e i ai anufe o le mumu tutupa i fuala’au lautogia mo le fa’apeina o siama ma anufe mumu tutupa, e toe siakia atu i le mae’a ai o le vaiaso e tasi, ua toe tuia toto, ua na’o le to’avalu o i latou o lo’o i ai pea nai pasene o siama ma anufe o le Mumu Tutupa, ae le o toe tele e pei o le mea sa i ai.

Na toe fa’ainu isi fuala’au o le Mumu Tutupa, ma ua maua ane i le tasi le vaiaso na fa’atali ai, ua soloia uma ma ua mama o latou toto mai anufe ma siama o le Mumu Tutupa.

I le taimi nei ua tula’i mai le faitau aofai o i latou uma ua mae’a inumia le fuala’au mumu tutupa i le 11,227 tagata e aofia ai le fanau a’oga mai a’oga ua ame’a afea e le fa’ainumaga o fuala’au Mumu Tutupa a le Matagaluega o le Soifua Maloloina, lea e ao ina fa’amuta ia Novema 4, 2019.

Peita’i o le fa’anaunauta’iga o lo’o fia ausia lava, ia mafai ona inumia e le 33,000 o i latou na muai inumua fuala’au mumu tutupa nei i le 2018 le inumaga lona lua lenei ua fa’asolo. O lona uiga e tatau ona maua uma le to’a 21,371 o i latou e le’i inumia fuala’au nei i le inumaga lona lua ua fa’asolo nei.

Mai fa’amaumauga a A’oga, ua matauina ai le to’atele o fanau e le’i inumia le fuala’au Mumu Tutupa, ma ua fa’ailoa mai lava e i ai nisi aoga ua le taulimaina atu pepa na sainia ai matua e fa’ataga ai fanau e faia o latou inumaga o fuala’au mumu tutupa.

O Aoga maualuluga, ua matauina le to’atele, silia ma le afa o le fanau a’oga i Tafuna e le’i inumia le fuala’au mumu tutupa lenei ua fa’asolo atu, peita’i e ao ina iloa, a mapeva le vae i ta’aloga, ae le fofoina e fula.

O le tele i tima’iga a le vasega o foma’i mo Matua, ona o le popolega ina ne’i mama’i fanau ona o fuala’au, ae o le tala mai e sefe lava le fuala’u e inumia. E i ai nisi e niniva, ae le umi se taimi e niniva ai, ona toe malosi lea o le tamaititi.  O nisi o le manatu i le tele o fuala’au o lo’o inumia i le taimi e tasi, ae o fa’amaumauga, e leai lava ma se tasi na maumau le soifua, pe maliu ona o fuala’au fa’ainumia mo le mumu tutupa ia soloiesea mai le soifua maloloina o lou alo.

Ua i ai foma’i Fiti, Foma’i Filipino, Foma’i Tonga, e fesaosoani atili i le vasega o matua ma tagatanu’u fo’i  o na malo ina ia utagia le taumafaiga nei. Ua alaala tumau oe mo sina taimi i Amerika Samoa, e tatau fo’i ona tatou inumia fuala’au o le Mumu Tutupa.

“Inumia fuala’au o le Mumu Tutupa” o le fautuaga lea i le atunu’u mai le DOH.