Toe Fonotaga a le Kapeneta & Komiti o le Coronavirus & Kovana

Pago Pago, AMERIKA SAMOA

O le fonotaga mulimuli a le afioga le Kovana Sili, Lolo Matalasi Moliga ma lana Kapeneta, na fa’ataunuu ananafi i le Gov. Rex Lee Auditorium, ma sa aofia fa’atasi sui o le Komiti Fa’afoe e puipuimalu le atunuu mai le Coronavirus.

Sa auai le Komiti Fa’afoe o le Fa’atautaiga o Tuiga o le coronavirus. O i latou ia sa manatu le Kovana e fa’amuamua i ai mataupu e ao ina talanoaina, aua o lea ua mae’a to’ai i fanua le pusa o tui puipuia sa fa’amuamua mai ina ia fa’ata’ita’i, poo le a le umi e tatau ona tatalia ai tui puipuia pe a o’o ina fa’atalosaga e aumaia mo i tatou.

“O le taimi ua mautinoa nei, e tasi le vaiaso atoa e sau ai le oka o tui ma ua fa’ailoa mai fo’i, a oo loa ina fa’agasolo lelei le tuiga, ole oka ua manatu i matou le Komiti Tofia e tatau loa ona ta’i vaiaso lava ma to’ai taunuu tui puipuia, ia le motusia fo’i le galuega o tuiga,” o se tautalaga lea a le CEO o le falema’i Faumuina John Faumuina.

Sa mua lava mea i Matautusa e vi’ia le Atua i se sauniga fa’afetai sa siitia e lana susuga le Faife’au Tiakono Malaki Timu. I sana toe fa’amalosiau ma le fa’amalo a’o lana fa’afetai fo’i, sa ia si’itia mai ai le manatu o Isaia, “Ua leai se isi Atua, ua na’o Ia lava! O le Atua o le malosi, o le Atua o le poto ma o le Atua e ona mea uma lava. O le Atua na te faia manuia, ma o le Atua fo’i na te fa’atupu malaia, pe a tatou leaga pea.”

“O le fesili, sa manuia le faigamalo pe leai? Ae o le a fo’i le fua e iloa ai pe sa malaia pe sa manuia le taumafaiga a se faigamalo? E iloga ua manuia pe afai ua fagaina tagata matitiva, ua savavali pipili ma e ua gasegase ua le fa’agalogalo ia i latou. Ua faia na mea? O mea  na fetalai ai Iesu, “O atu e fa’ailoa atu ia Ioane mea nei ua ou faia, ae le’i tali sa’o Iesu i le fa’afesili, po’o ia ea le mesia o lo’o valo’ia?”

“Afai la o le a outou le fa’ailoa maia, ua mae’a fai mai lava Isaia, o le a alalaga mai lava ma’a! O ma’a ia o lo’o ua fausia ai nei galuega e tele, ua fa’atino e lenei nofoa’iga. Tau ina ia fa’afetaia le ma’ema’e ma le agaga fai atunuu o lau afioga Kovana Lolo Moliga ma la oulua taupulega.” O toe upu ia a lana susuga le Fesoasoani Tiakono ona tatalo ai e fa’apa’ia le fonotaga o le a alo faiva i ai sui tofia i le Kapeneta, Komiti Fa’afoe o le Covid-19 ma le Komiti Fa’afoe o le Tuiga o Vaila’au Puipui mai le Covid-19.

O le fa’atasiga lenei o le latou toe mafutaga lea, ma ua fa’atulaga fo’i, ina ia avea ma se aso o le a tali mai ai lana afioga le Kovana Sili Lolo Moliga i lana auva’a sa latou folau mai mo le 8 tausaga soso’o o le nofoaiga a i la’ua ma le afioga le Kovana filifilia a’o lana Lutena Kovana Lemanu Peleti Mauga.

“O le ma’ua fa’afetai ona sa outou faia le mea sili ua outou mafaia i le atamai ma le malosi ua ia te outou mai le Atua. Fa’afetai galulue, e tali taito’atasi lava le Atua ia te outou uma ma lana sa fai. Ua leai ni auro ua ia te a’u ou te avatu, a’o le agaga o le fa’afetai.”

Sa ia toe tu’ua lea mataupu e fa’amuli i ai talanoaga o le latou mafutaga ae ua fa’asifo le avanoa i le Komiti o le Tuiga ina ia mua’i faia le latou folasaga, ma faailoa patino le tulaga o tui ua manatu ina ia amatalia ai le tuiga, pe ua iinei pe leai.

Na tula’i le ali’i foma’i o fa’amaumauga uma tau fa’ama’i pipisi, Dr Aifili Tufa mo le fa’alauiloaga o lo ua to’ai taunuu le pusa o tui na fua i ai le umi e tatau ona tatalia ai oka o tui puipuia o le Covid pe a oo ina mana’omia, o le a le vave?

Peita’i o tui o le a fa’aaogaina mo le atunuu e afua mai le vaega ua fa’atulaga e amata ai tuiga, o le a to’ai taunuu mai i le aso Toonai. Afai e to’ai taunuu ae ua i ai se fa’aletonu ua matauina i le malulu fa’atulaga e aumaia ai nei tui o le a tatau loa ona faia vave tui e afua lava i le aso Sa, ae a faato’ai mai o lelei mea uma, e amata lelei tuiga i le aso Gafua. O e muamua i le laina lea, o le aufaigaluega e ta’imua mai i le puipuiga o le lautele mai le Covid-19, o foma’i ma le au tausima’i o lo’o nafa ma tagata mamai pe a oo ina a’afia se tasi i soo se fa’ama’i lava. Ua lualuagia atu i ai le aufaigaluega i luga o le Uafu, latou nei e o i luga o va’a e faia mai tui suesue o ali’iva’a uma lava e afea le tatou atunuu, va’aoloa i le taimi nei aua ua taofia va’a lau pasese.

O le aofaiga tui o le a maua mai i le aso To’ona’i e 3,900 ma o nei tui e o mai fa’atasi lava le tui muamua ma le tui lona lua, ae muamua fo’i aumaia le Pfizer, ae oo ia Ianuari faato’a mae’a lelei le Mordema, lea lona lua lea o ituaiga tui puipuia. O le a leai se fa’atuai ona soso’o mai o oka o le tui Modema lea ua faia le filifiliga a le Komiti Fa’afoe o le Coronavirus, o le a fa’aaoga mo le mamalu lautele o le atunuu, ona e umi ona aoga i le vevela o tau talafeagai ma le tatou atunuu, ma e fa’afaigofie ai ona teuina i pusa ‘aisa e le malulu tele e pei o fulisa.

“Peita’i afai e faia lou tui i le Pfizer, e toe faia fo’i lou tui lona lua i le Pfizer. Ae le mafai ona faia le isi i le Pfizer ae oo i le tui lona lua ua e mana’o e fai i le Moderna.”

O le tui lenei ua lua ona vaega ua vaevaeina i ai. O le tui ua le agava’a ai le fanau e 15 tausaga agai i lalo. 

Peita’i o lo ua fa’asolo lava le tuiga ina ia vave ona puipuia i latou e faia tofiga e fa’atino i galuega tima’i ma galuega fa’aola o nisi o le a maua i lenei fa’ama’i, lea e aofia ai le Matagaluega o le Puipuiga o le Saogalemu Lautele, Le Matagaluega o le Soifua Maloloina, le Aufaigaluega uma i le Falema’i Tele i Faga’alu ma falema’i fa’aitumalo uma o lo’o fa’atautaia e le Matagaluega o le Soifua Maloloina.

O le matagaluega o le Uafu ma le Malaeva’alele, le Matagaluega o le Saogalemu Fa’alotoifale o le atunuu ma fa’asolo mai ai lava, ae maise i le tupulaga talavou. Peita’i ona o lenei naunau o le Malo ia nofo puipuia le atunuu, ae ua le avea ai le aia a le tagata lava ia, e le mana’o e faia sona tui puipuia, o le a fa’aaoga lana lea aia tatau e te’ena ai le tui.

Sa fa’amatalaina auiliili ia ituaiga o tui ma le ala e teuina ai ina ia umiumi o fa’aaoga. O nei tui e aumai o lo’o fa’afulisa e tusa ma le -70tikeri Celcius lea e aumaia ai i luga o le va’alele le Pfizer, ae o le Modema e na’o le 4tikeri Celcius ma e mafai lava ona teu i so’o se ituaiga o pusaaisa ma e umi fo’i ona fa’aaoga mo le 6 masina, pe a mae’a ona tatala ma teuina i pusa aisa malulu e le fulisa.

O nei mea uma na fa’amatala, ua aoga lea mo le fa’alauiloaga lea o le a mafuli le aufaigaluega a le Matagaluega o le soifua maloloina e faia ina ia tima’ia le mamalu lautele o le atunu, ia le nofo popole i fa’aletonu nisi ona o le tui puipuia lenei o le Covid-19.

Peita’i ua fa’ailoa e Dr Tufa, “O lo ua fa’ailoa atu, e i ai lau aia tatau e te te’ena ai le tui puipuia lenei, ae ua fa’amaonia mai e le CDC le faaaogaina o lenei vaila’au aua ua mae’a faia se suesuega i le 200,000 tagata ma ua faamaonia ai, e 95% o i latou na tui puipuia i nei tui, ua fa’asaoaina mai le COVID-19. Sa mamana’i lava nisi, ae na matua faigofie lava togafitiga ma ua toe malolosi mai, leai nisi na maliliu ai, o i latou e leai nisi ma’i sa maua ai muamua a’o le’i ma’i i le Covid-19.”

“Peita’i o i latou sa le tui puipuia, sa toatele na’ua i latou e le’i toe ola mai ina ua maua i le Covid-19. O le isi vaega o lo’o ua maliliu ua matauina o nisi lava e i ai latou a’afiaga tau le fatafata ma ma’i sela, o le ala fo’i lea sa le toe fa’asaoina mai ai ina o taumafai e togafiti latou Covid-19. O lona uiga e le o maua a’ia’i le 100%, ae ua iloga le to’atele e fa’asaoina pe afai o le a faia le tui puipuia.” 

“O le isi itu e ao ina le alofia ai le tui puipuia lenei, aua e le o maua i tatou i lenei fa’ama’i i le taimi nei, e le tatau la ona e alu atu i fafo i atunuu o lo’o ua a’afia i le Coronavirus, aua o le a fa’amalosia ona faia lou tui fa’ato’a e tu’ua ai le atunuu.”

“Ua le gata i lea, ae o le a faia lava suega fo’i e malaga ai, ma ua tali tutusa lelei lava ma le vaitau o le misela i le tatou atunuu, lea sa matua faia ai lava tuiga fa’ato’a mafai ona feoa’i i le va ma isi atunuu o lo’o a’afia. Pe afai e le’i faia lou tui puipuia lona lua, e le o atoatoa ona sefe lou sui mai le Covid-19. Ua fa’apea fo’i pe afai o lo’o e a’afia i ni gasegase e tau sioki ai lau manava, ma isi ma’i ua tele na’ua o lo’o togafitiga e ono i ai nisi fa’aletonu e alia’i mai pe afai o le a tuia oe i le tui puipuia lenei o le Covid-19.”

“O le 5% lea ua le atoa ai le 100% ona faasaoina pe a maea ona tui puipuia oe i le Modema, ona o le vaega lea ua mae’a tuia ae le’i mafai ona fa’asaoina mai ina ua maua mulimuli ane i le covid-19, taumafai e togafitia, ae ua le lava lona malosi e tete’e ai le fa’amai leaga o le covid-19.”

O le fa’amatalaga auiliili lea a Dr Tufa e tusa o le suesuega na faia fa’apitoa i le aoga o le vaila’au ua auina mai mo le lautele o le atunuu ia nofo puipuia pe a mae’a faia tui nei mo le Covid-19.

O auga e va’aia pe afai o le a tuia tagata, e le gatusa mo tagata uma. O nisi e matua leai se eseesega e va’aia ai. O nisi e tiga le ulu pe niniva, o nisi fa’asuati ma e le fia ‘ai ae fa’afaufau. Ae o mea na e le tumau. 

Peita’i afai e i ai se suiga tele ua va’aia ia te oe pe a faia lou tui puipuia lea, e ao la ina vala’au le falema’i ina ia avatu fa’avave loa lea sui i le falema’i e va’aia le fomai. O nisi e leai ni ta’avale e mafai ona sau le ta’avale a le falema’i pe talosagaina fo’i ta’avale a leoleo mo le aumaiga fa’atopetope o nisi e matuia a’afiaga o le a va’aia ai pe a tuia i le tui puipuia. 

O le vasega o tina ma’itaga, ua leai se fa’amatalaga ua maua mai i ni o latou a’afiaga o pepe ma tina pe afai o le a tuia i le tui puipuia lea. O lona uiga o le a tatalia lava le taimi e oo mai ai se fa’amatalaga EUA mo le Modema lea e fa’apea e tuia ai le mamalu lautele, ona fa’ato’a faia lea o se fuafuaga i le vasega o tina maitaga, ona o le tulaga i a’afia fanauiti ona o tui.

I le mae’a ai o mea uma, sa faia se fa’ailoga fa’apitoa e taualoa ai le tautua a le tamata’i galue i le Ofisa o le Initeria i lona Ofisa fa’alotoifale, Lydia Falefine - Nomura, mai le Kovana Sili Lolo Moliga ma lana faigamalo, ona ua iloga lona sao i le fa’atupega o le tele o poloketi ma galuega ua mae’a galueaina nei i totonu o le malo. O nisi galuega ua mae’a tatalaina, ae o nisi e le’i ma’ea ma o le a tatalaina e le faigamalo fa’aolioli mai.