Toe filifilia Nua avea ma Sui Peresetene o le maota maualuga

I le fa’alauiloa aloaia ai o Komiti ta’itasi a le maota maualuga mo le fa’atinoina o a latou galuega mo lenei nofoaiga i le taeao ananafi, ua atagia mai ai le toe filifilia o le afioga a Nuanuaolefeagaiga S. Nua e avea ma sui peresetene o le maota,

O le lisi mo Komiti eseese uma e 17 a le maota maualuga, o lo o taua mai ai le tofu uma o afioga i Senatoa ma tofi Ta’ita’i Komiti i komiti ta’itasi e ta’ito’a 9 sui, sei vagana ai le Komiti o le Litaea e to’a 15 ona sui, ma le Komiti o le Atina’e o le Tamaoaiga e to’a 10 ona sui.

Saunoa le afioga i le Peresetene o le maota maualuga ananafi ia Gaoteote Palaie Tofau e fa’apea, o nai suiga laititi ua faia i le aofa’i o totino o komiti e galulue ai le maota mo lenei tausaga, na fa’avae mai lea i ni isi o tulaga sa tutupu i tausaga ua mavae, i le faigata lea ona atoa le kalama i komiti e fa’atino ai galuega fa’atino a le maota mo ana galuega i aso ta’itasi, o le mafua’aga lea ua manatu ai loa ina ia sui mai le aofa’i o totino o komiti eseese mai le to’a 7 sa i ai i le to’a 9, lea fo’i na pasia uma e le maota maualuga i le taeao ananafi.

O le Komiti o Tulafono a le maota maualuga, o lea ua tofia i ai le afioga ia Nua e ta’ita’i komiti ai, o ia fo’i lea o le sui peresetene o le maota.

O le afioga a Taua’a S. Vaouli lea ua tofia e avea ma Ta’ita’i o le Komiti o Fa’atoaga, o le afioga a Magalei Logovi’i lea ua filifilia e avea ma Ta’ita’i o le Komiti o le Tupe Fa’asoasoa/Alamanuia o Tagata Lautele a le maota, o le afioga a Fai’ivae Iuli A. Godinet lea ua filifilia e avea ma Ta’ita’i o le Komiti o Aoga a le maota, o le afioga a Misaalefua J. Hudson lea ua filifilia e avea ma Ta’ita’i o le Komiti o Pulega o le Eletise ma le Suavai (ASPA), o le afioga Fano F. M Shimasaki.

O le afioga a Tilo Vasaga lea ua filifilia e avea ma Ta’ita’i o le Komiti o le Atina’e o le Tamaoaiga, o le tofa Tuaolo M. Fruean lea ua tofia e Ta’ita’i i le Komiti o le Litaea, o le afioga a Tuiagamoa Tavai lea ua filifilia e avea ma Ta’ita’i o le Komiti o Fa’amasinoga, o le afioga ia Levu T. Solaita lea ua filifilia e avea ma Ta’ita’i o le Komiti o Paka ma Malae Ta’alo, ma le afioga ia Alo Fa’auuga lea ua toe filifilia e avea ma Ta’ita’i o le Komiti o Galuega Lautele.

O le afioga a Fa’amausili Mau Jr lea ua filifilia e avea ma Ta’ita’i o le Komiti o le Puipuiga o le Saogalemu Lautele, o le afioga a Satele G. Satele lea ua filifilia e avea ma Ta’ita’i o le Komiti o le Falema’i ma le Soifua Maloloina, o le afioga a Muagututia Tauoa lea ua filifilia e avea ma Ta’ita’i o le Komiti o Mataupu Tau Samoa, o le afioga a Paepae I. Faiai lea ua filifilia e avea ma Ta’ita’i o le Komiti o Femalagaaiga, o le afioga ia Galea’i M. Tu’ufuli lea o lo o tumau pea le avea ma Ta’ita’i o le Komiti o le Fa’agaioiga o le Malo, ma le afioga i le tama’ita’i Senatoa e to’atasi ia Fonoti T. Aufata lea ua filifilia e avea ma Ta’ita’i o le Komiti o Auaunaga mo Tagata Lautele.