Toe fesiligia e le Senate ia le konakarate ma le faatonusili o le DPW e uiga i le fale fou a le Fono

Pago Pago - AMERIKA SAMOA

O le taeao o le aso Lua na se’i mavae atu nei, na auai atu ai le Faatonusili o le Matagaluega mo Galuega Lautele (DPW) ia Faleosina Voigt ma le Pule o le kamupani a le Paramount Builders, ia Papalii Laulii Alofa, i le iloiloga a le Komiti o Galuega Lautele a le Senate, e tusa ai ma le fale fou a le Fono.

O le autu o lenei iloiloga, ina ia fa’amautuina pe faamae’aina le Maota Fono fou i le aso 3 o Novema, lea ua fa’atulagaina e umusa pe faamanuiaina ai.

Sa fesiligia e le afioga Senatoa Muagututi’a tau’oa ia molimau, i le mafua’aga ua umi ai ona fauina le fale fou a le Fono, lea ua atoa le fa tausaga talu ona amataina.

Na tali mai Papalii, o le mafuaaga autu o le fa’atuai o lenei galuega, ona o le tuai mai o sapalai mo le galuega, ona o lo’o auina uma mai i atunu’u i fafo.  E le gata i lea, sa ia ta’ua foi suia i ata tusia o le fale fou, ona o faaopoopoga i le ata muamua.  Sa ta’ua foi e Papalii le le taimi na pepesi ai le Koviti19 lea na tapunia ai kamupani gaosi oloa.

Sa fesiligia foi e Muagututi’a ia le aofaiga o konakarate o lo’o aofia i totonu o le galuega.  Na faamanino mai e Papalii, o le Paramount Builder le konakarate autu, ae iai isi kamupani o lo’o gafa ma isi vaega o le galuega, e pei o le kamupani e faia ‘ea malulu, o vai e tinei ai se mu i totonu o le fale faapea ma ‘elevators’.

Ina ua fesiligia le tulaga o le tala o le tupe fa’aaluina, na saunoa le tamaitai Faatonusili, ua atoa le $26.6 miliona.  E tusa ai ma se ripoti na fa’ao’oina mai i le Senate ia Ianuari, na fa’ailoa mai ai le mae’a ona fa’aaogaina o le $26.4 miliona i le galuega, i lena taimi.

Na faapea ona talosagaina e Muagututi’a ia se ripoti auiliili o tupe uma ua fa’aaluina faapea ma le aofaiga atoa ua fa’aaogaina i lenei poloketi.

Sa faamanatu atu foi e le Taitaifono o le Komiti a le Senate, le afioga Senatoa Satele Aliitai Lili’o, i molimau lo la matafaioi autu, o le mataituina lea o lenei poloketi ma ua talosagaina lo latou auai mai i le iloiloga i lea taeao, ina ia mafai ona fa’ailoa mai i le Senate pe mae’a le galuega ae e le’i o’o atu ia Novema 30.

Na saunoa Satele, na talu lava ona amataina  lenei nofoaiga lona 38 a le Fono Faitulafono, ua fa’atolu ona tolopo le faamae’aina o le galuega.  Ma o lea o le a mae’a foi lenei tauaofiaga, ae e le’i mae’a lava le galuega.

Sa saunoa Satele, o lo’o iai se faamoemoega i sui faitulafono ina ia malolo mo se masina atoa, pe a mae’a le 40 aso o le latou tauaofiaga o feagai ai nei, i le faaiuga o le masina ona toe fo’i mai lea mo le na’o le lima aso.

Na ta’ua e Satele, o le fuafuaga o iai nei, ia toe fo’i mai sui faitulafono mo aso e lima o totoe, ua mafai ona fa’ataunu’uina toe tauaofiaga a le fono faitulafono, i totonu o le latou fale fou.  Ma o le mafua’aga lea ua finagalo ai le Senate ina ia maua se tali maumaututu mai i molimau.

Sa saunoa Papalii, o lo’o taumafai lava e pei ona finagalo iai.  Ma e toe pau galuega tele na ta’ua e le pule o le Paramount, o galuega ia sa faia i aso e lua na se’i mavae atu. Sa faamanino foi e Papalii nisi o tulaga i le faatinoga o le galuega.  

Sa ia ta’ua foi e faapea, ua sau foi le ma i le sau so’o (i luma o le Senate) ma fai atu lea aso ma lea aso, ae le taunu’u.

Na faamamafaina e le afioga Senatoa Utu Sila Poasa, o le agaga o lenei iloiloga, ina ia faamautuina ai pe fa’amae’aina le fale fono i le aso atofaina.   Ma afai ae le mafai, e taua tele ona nofo malamalama le maota, aua o lo’o faalagolago a latou gaioiga i le fa’amae’aina o lenei galuega.

Na fautuaina foi e Utu le susuga ia Papalii, afai ae le gafatia le taimi lea ua faatulagaina mo le faama’eaina o lenei galuega, e tatau lava ona saunoa sa’o mai aua fuafuaga a le maota.   Ma sa ia saunoa foi, i le tele o isi galuega a Papalii o fa’atino i le taimi nei, ma afai e taga’i toto’a le pule o le Paramount i le fale fono fou, semanu ua leva ona mae’a le galuega.

O seisi vaega na saunoa iai Utu, o le faatupeina o lenei fale fou i lafoga a tagata, tauala mai i le Puleaga o le Atina’eina o le Tamaoaiga a Amerika Samoa (ASEDA) ma a iai lava le loto, e iai foi le auala e faataunu’u ai.

Sa fa’ailoa mai e Papalii, o lo’o iai ni isi koneteina o ‘materials’ lea o le a taunu’u mai ma ia talosagaina ai le tu’uina atu o ni vaiaso se lua, ina ia mafai ona fa’amautu ai le aso tonu o le a faamae’aina ai le galuega.

Na fa’amamafa mai e Papalii, e na te le o taumafai e toso le poloketi ma e tatau ona malamalama le afioga i le Senatoa ia Utu, aua o ia foi o se pule i kamupani fau fale, o le vave lava ona fa’amae’aina o se galuega a se kamupani, o le vave foi lea ona maua o le tupe.  Ma na toe ta’ua e Papalii, e leai seisi e sili atu ona mana’o e fa’amae’a vave lenei galuega, nai lo ia.

O le toe saunoaga o le iloiloga, o le afioga i le Peresetene o le Senate ia Tuaolo Manaia Fruean, ma sa ia faamanino mai i le pule o le Paramount, o le a tatalaina le Fale Fono fou ia Novema, e tusa lava pe ua mae’a pe leai.

Sa ta’ua e Tuaolo, o le Nofoaiga lona 38 lenei a le Fono Faitulafono a Amerika Samoa ma o o le aso 4 o Oketopa, e fa’amaeaina ai.  Ae o lea ua tonu i le maota ina ia malolo mo ni aso e 40 ae fa’amae’aina iloiloga i aso e lima o totoe, ma tapunia ai loa lenei nofoaiga, i totonu o le Maota Fono fou.

Sa fautuaina e le afioga Tuaolo ia Papalii, “Pe uma pe le uma, ua tatau ona tatala.  Ou te mana’o i tama ia o saofafa’i atu faapea nisi o le Maota o Sui, ia tatala le maota ua nofoia o latou nofoa.”

Na tali Papalii, o le a faamae’aina.

TALA’AGA O LENEI MATAUPU

O le fale fono fou lenei, e tusa ai ma tala salalau, ua matua’i maualuga lava ona o le tele o suiga ua faia iai, e le gata i suiga mai i taitai o le Fono Faitulafono ae faapea foi le ave’esea o le faavae lea na iai muamua, talu ai se faatonuga mai i le FEMA, talu ai o lo’o fausia lenei fale fou i se nofoaga e a’afia i taimi o galulolo.

I le tausaga e 2021, sa $16 miliona le galuega ona o nei suiga mai i le tau o le ulua’i konakarate, lea sa i luga teisi ma le $10 miliona.  Ae peitai, i le lua tausaga na soso’o ai, ua o’o le tau o le galuega i le $26.6 miliona.

I se iloiloga na faia i le tausaga e 2021, sa fa’ailoa atu ai e le afioga i le Senatoa ia Alo Dr. Paul Stevenson i le Senate, i se iloiloga na auai atu ai foi Voigt ma Papalii, lona agaga faanoanoa ona i sana taga’i i le ata fou o le fale fono, e le o fa’aalia ai le aganu’u Samoa moni.

Na saunoa ai foi iina ia Alo, sa manaia lava le ata muamua, ae o le ata fou lea ua mulimulita’i ai nei le galuega, e le o fa’aalia mai ai le ituaiga maota e tatau ona iai le Maota Fono.