Toe fa’asea fo’i pagota i le fa’aletonu o meaai i totonu Toese

E le i atoa se masina talu ona vivi’i e ni isi o pagota ma o latou aiga tulaga lelei ua i ai le auaunaga a le Pulega o le Toese i Tafuna, a o lea fo’i ua toe fa’alogoina lagona fa’asea ma le oi, ona o le tulaga fa’aletonu ua i ai meaai o lo o fafaga ai pagota i le taimi nei.

E tele telefoni na maua e le Samoa News mai pagota o lo o taofia i le toese e fa’atatau i lenei fa’aletonu. E o o lava fo’i i pagota na aga’i mai i le fa’amasinoga mo a latou iloiloga, sa latou talosagaina le Samoa News ina ia fa’ailoa tulaga fa’aletonu ua i ai mea’ai i totonu o le toese i le taimi nei.

“Ua toe o o lava le falepuipui i le tulaga fa’aletonu ma le pagatia sa i ai muamua, ae foliga mai ua sili atu le fa’aletonu ua i ai le leaga o meaai i le taimi lenei nai lo taimi ua mavae,” o le fa’amatalaga lea a se tasi o pagota.

Na taua e ni isi o pagota na valaau mai i le Samoa News i le vaiaso na te’a nei e faapea, ua matua pagatia lava le tulaga ua i ai meaai o lo o fafaga ai pagota. Ua leai se sapalai, ua matua leai lava se fa’asoa.

“O le taimi nei, ua toe fo’i lava i le saimini ma le lauti le meaai o le po, ae o le eleni ma le alaisa i le ao. E le mafai ona fa’aauau ai pea faiga faapologa o loo faia i pagota i le taimi nei, ua tatau ona fai se fuafuaga a le malo pe saili se fesoasoani mai aiga o pagota,” o le fa’amatalaga lea a se tasi o pagota na valaau mai i le Samoa News.

Sa ia e fa’apea, o le aso Sa i ona tua atu, na fa’atau ai e le Ta’ita’i Uati le taumafataga mo le toese atoa, ina ua leai ni mea e fai ai mea’ai.

O se tasi o faiga sa tau maua ai e pagota sina fesoasoani mai o latou aiga, o le maua lea o le avanoa e sapalai mai ai e aiga meaai mo pagota i aso o le vaiaso. O le suiga e pei ona faia i le taimi nei, ua le toe taliaina le avatu e aiga o pagota o meaa’i mo le vaiaso atoa, ae ua tasi lava le aso e mafai ona sapalai atu ai e le aiga meaai mo pagota.

“Ana fa’aauau pea le tulaga sa i ai i tausaga ua mavae, o le mafai lea ona sapalai mai e aiga meaai mo pagota, atonu o le isi lea fesoasoani sili mo matou ao tuli ai a matou fa’asalaga. E ui o i matou o tagata ua fa’amaonia solitulafono, ae o le mea moni lava Samoa, o matou fo’i o tagata soifua e pei o le Komesina o Leoleo ma le Pulega o le Toese, e le o i matou o ni manu (tulou)”, o le fa’asea lea a se tasi o pagota.

Na taua e se Leoleo e le i finagalo e fa’ailoa lona suafa, ona o popolega ina ne’i tuli ai o ia mai lana galuega, ona o lea ua fa’asa e le Pule o le Toese ona toe talanoa ni Leoleo i le Samoa News, o le suiga ina ia tasi lava le aso e mafai ai ona sapalai atu e aiga taumafa mo pagota, na faia ina ia tau taofiofi ai le sao atu i totonu o mea e le tatau ona i ai i totonu o le toese, e aofia ai ma fualaau fa’asaina.

Na taua atili e lea Leoleo se faia lea o se fonotaga a le Komesina o Leoleo ma le Pule o le Toese i Tafuna i le nofoaga autu o le toese i Tafuna i ni nai vaiaso e le i mamao atu.

E le i mafai e le Leoleo ona fa’ailoa mai poo a mataupu sa talanoaina i lea fonotaga, ae sa ia faamaonia mai tulaga faaletonu ua i ai meaai i totonu o le toese i le taimi nei. Sa ia taua e fa’apea, o le fa’aletonu e mafua atu i le ofisa autu, e le gata e leai se tupe e fa’atau ai sapalai, ae matua leai lava fo’i ni sapalai o la’u atu e fafaga ai pagota.

Sa ia taua e fa’apea, o ni isi o taimi, e fa’atau ai e Leoleo meaai mo pagota, ona o le alolofa i ai i le tulaga pagatia ua i ai meaai i le nofoagai le taimi nei.