Toe faasala i le Toese i lona le usita’i i tuutuuga o le nofovaavaaia

Pago Pago, AMERIKA SAMOA

Ua toe faasala i le Toese i Tafuna e le Faamasinoga Maualuga le susuga a Fitu Filimaua mo le umi e 5 tausaga, ina ua fa’amaonia lona le usitaia o tuutuuga sa tuuina atu e le Fa’amasinoga mo ana Faasalaga Faanofovaavaaia ua mavae. O le talitonuga o le Fa’amasinoga, ia avea le fa’asalaga ua tuuina atu i le susuga a Filimaua, ma auala na te aoaoina ai se lesona aoga i lona olaga mo le lumana’i.

O le lua vaiaso talu ai na tula’i ai Filimaua i luma o le Fa’amasinoga mo le tuuina atu o le fa’aiuga a le fa’amasinoga, e tusa ai o lona le usitaia o tuutuuga o lana nofovaavaaia.

Ina ua maua lona avanoa, sa faatoese ai loa Filimaua e tusa ai o lana solitulafono, ma ia talosagaina se isi avanoa mo ia se’i toe fo’i atu ai i tua e tautua ona matua ma fai sona aoga i lona aiga, nu’u ma le Ekalesia.

Na taua e Filimaua i le fa’amasinoga e fa’apea, o masina e tele sa taofia ai o ia i le falepuipui, ua ia a’oa’oina ai se lesona taua i lona olaga, e le o se mea lelei le solitulafono.

Sa ia ta’utino fo’i e fa’apea, afai ae maua se isi avanoa mo ia, o le a saili loa sana galuega e maua ai sona totogi e tausi ai ona matua, ma totogi ai lana salatupe mai le fa’amasinoga.

Na talosaga lana loia fautua ia Ryan Anderson ina ia aua ne’i fa’aleaogaina le nofovaavaaia a le ua molia, a ia toe tuu i ai se isi avanoa se tasi mo ia. Na taua e Anderson e fa’apea, talu ai le fa’afitauli o le ‘ava malosi o lo o a’afia ai Filimaua, ua ia manatu ai, e mafai ona suia lona olaga pe afai e tu’u ese ia te ia le fiafia i le ‘ava malosi.

Na faailoa atili e le loia fautua e fa’apea, o le ua molia o se ali’i talavou e vaivai le tamaoaiga o lona aiga, e lei lava fo’i lona olaga a’oa’oina, ma atonu o nisi nei o aafiaga ua mafua ai ona fa’aletonu faapea lona olaga.

Na lagolagoina e le loia a le malo ia Kristine Soule le talosaga a le itu tete’e mo se fa’asalaga fa’anofovaavaaia, e aunoa ma le toe tuuina atu o se isi fa’asalaga fa’a falepuipui.

Na taua e le loia a le malo e fa’apea, e i ai lona talitonuga, ua lava aso e 425 lea na taofia ai Filimaua i le falepuipui ao faatalitali ai se faaiuga o lana mataupu e fai ma ana fa’asalaga i lenei mataupu, ae toe tu’u i ai se isi avanoa e faaauau ai lana nofovaavaaia, atonu e mafai ai ona ia usitaia poloaiga a le Fa’amasinoga.

O lea fa’afinauga e le i nofo lelei i le finagalo o le Fa’amasinoga.

Na faailoa e le Fa’amasinoga i le loia a le malo e fa’apea, “Afai e lei usitaia e Filimaua tuutuuga o lana nofovaavaaia sa tuuina atu i le 2018, e lei popole fo’i o ia i le faatonuga e totogi lana salatupe ma alu e vaai le Ofisa Faanofovaavaaia, e faafefea la ona toe tuu i ai se isi avanoa pe afai na te lei usitaia le avanoa muamua sa tuuina atu ia te ia.”

“O le tulaga lea ua molimauina e le Fa’amasinoga, e a’afia Filimaua i le fa’afitauli o le tagofia o le ‘ava malosi ma fualaau faasaina, ma o le mafua’aga autu lena ua mafua ai ona toe aafia o ia i le tulafono, ina ua toe tagofia e ia le ‘ava malosi ma fualaau faasaina ma mafua ai loa ona toe loka e Leoleo ma molia e le malo.”

Na faailoa e le Fa’amasinoga i loia a itu e lua e fa’apea, soo se tagata lava e ta’usala e le fa’amasinoga ma fa’asala i se fa’asalaga faanofovaavaaia, e tatau i lea tagata ona usita’i i tuutuuga uma lava o lana nofovaavaaia, ina ia mautinoa ai e le fa’amasinoga, ua i ai lona agaga salamo e tusa ai o lana solitulafono sa faia. 

Peita’i o le mataupu a Filimaua, ua atagia mai lava i lona le usitaia o tuutuuga o lana nofovaavaaia, lona le amanaia o poloaiga a le fa’amasinoga.

O le mae’a ai ona fa’afofoga o le fa’amasinoga i fa’afinauga a itu e lua, na aga’i atu ai loa afioga i ali’i Fa’amasino e iloilo sa latou faaiuga fa’asaga ia Filimaua

A o lei tuuina mai le faaiuga a le fa’amasinoga, na fa’aalu e le Fa’amasinoga le avanoa e toe fa’amanino ai mau fa’amaonia o lenei mataupu, ina ia mafai ai ona fa’afofoga Filimaua aemaise ai loia i fa’amaumauga o lo o nofo ma le fa’amasinoga.

Na taua e le Fa’amasinoga e fa’apea, o le tausaga e 2018 na faanofovaavaaia ai e le Fa’amasinoga Maualuga ia Filimaua mo le 5 tausaga, ina ua ta’usala o ia i le moliaga o le talepe fale i le tulaga lua, e mafua mai i le fa’alavelave lea na ia osofaia ai le fale o se aiga i le afioga i Leone.

O nisi o tuutuuga o le nofovaavaaia a Filimaua, o lona tuliina lea o masina e 20 i le toese, aua ne’i ona toe solia se tulafono a le malo, aua ne’i ona toe tagofia le ‘ava malosi, a ia asiasi i le Ofisa Faanofovaavaaia i masina ta’itasi ma ia totogi fo’i lana salatupe.

E na o le 12 masina na tuli e Filimaua i le falepuipui, ae tatala loa e le fa’amasinoga i tua ina ia alu e saili sana galuega e totogi ai lana salatupe. E lei tele ni masina talu ona tatala Filimaua i tua mai le toese, ae toe loka o ia e Leoleo i le masina o Aokuso 2018 ona o tu’uaiga i le ‘ona, fa’atupu vevesi ma le fa’aoolima i le tulaga tolu.

E 3 masina na taofia ai Filimaua i le falepuipui i Tafuna a o fa’agasolo ai lana mataupu i luma o le Fa’amasinoga Fa’aitumalo.

I le masina o Tesema o le 2019, na fa’asala ai loa e le fa’amasinoga ia Fifita na te tuliina le umi e 3 masina i le toese, e aofia ai ma le 3 masina lea na taofia ai o ia i le falepuipui ao fa’atali se faaiuga o lana mataupu.

O le masina lava fo’i lea o Tesema o le 2019 na faila ai loa e le Ofisa Faanofovaavaaia sana talosaga i le Fa’amasinoga Maualuga, ina ia fa’aleaoga le nofovaavaaia a le ua molia, e mafua mai i lona le usitaia o tuutuuga sa tuuina atu i le 2018, ona o lea ua ta’usala o ia e le Fa’amasinoga Fa’aitumalo i moliaga o le faatupu vevesi i nofoaga faitele ma le faaoolima i le tulaga tolu.

Talu mai le masina o Tesema o le 2019 na fa’atulaga ai le ulua’i iloiloga a Filimaua i luma o le Fa’amasinoga Maualuga, na galo ai lava ona tu’u lana mataupu i luga o le Kalena, ma mafua ai loa ona taofia umi le ua molia i le falepuipui mo le 425.

O le masina o Mati na te’a nei na fa’atoa toe manatua ai le mataupu a Filimaua, ina ua fa’ailoa e le ua molia i lana loia le tulaga o lana mataupu. 

I luma o le Fa’amasinoga Maualuga i le masina na te’a nei, na ioeina ai e Filimaua lona le usitaia o tuutuuga o lana nofovaavaaia, ina ua ia tagofia le ‘ava malosi atoa ai ma lona toe soli o le tulafono. Sa ia ta’utino atili fo’i e fa’apea, e le gata e lei sailia sana galuega, e lei totogiina lana salatupe, ae le’i alu fo’i e vaai le Ofisa Faanofovaavaaia.

I le mae’a ai ona iloilo e le Fa’amasinoga o faamaumauga uma e uiga i lenei mataupu, na manatu ai loa afioga i ali’i Fa’amasino, o le faaiuga e sili mo Filimaua, o le poloaina lea o ia e tuli masina e totoe o lana fa’anofovaavaaia e 5 tausaga.

O le taimi nei, ua lata i le 3 tausaga le umi lea ua mae’a ona tuli e le ua molia, lona uiga, e toe lua tausaga ma nai masina o lo o totoe o lana fa’asalaga fa’a falepuipui o lo o totoe ona mae’a loa lea.

A mae’a ona tuli le faasalaga faa falepuipui i le Toese i Tafuna, ina poloaina e le Faamasinoga ia Filimaua na te tuua loa le atunu’u ae toe fo’i atu i lona atunu’u na aumau ai mo le umi e 5 tausaga.

Afai ae toe taumafai e ulufale mai i totonu o le atunu’u i totonu o le 5 tausaga, e ono faila e le malo nisi moliaga faaopoopo faasaga ia te ia.