Toe fa’amalosia atili Ofisa Tiute ta’iala o fa’amaumauga mo ta’avale mai fafo

O le amataga o le masina lenei o Iuni 2017 na tu’uina mai ai e le Ofisa o Tiute a le malo sa latou fa’asilasila fa’alaua’itele, e fa’ailoa mai ai i le atunu’u ni isi o ta’iala e mana’omia le fa’atinoina mo fa’amaumauga o ta’avale mai fafo e fia aumai i totonu o le atunu’u, ina ia mautinoa e fa’amalieina ai ni isi o tulafono ua leva ona i ai mo le fa’atinoina o a latou galuega fa’atino i aso ta’itasi.

O se fonotaga a le Ofisa o Tiute sa faia mo le fa’aleleia atili o auala e su’e ma saili ai oloa mai fafo e sa’aulufale mai i le atunu’u, na fa’aopoopo ai loa nai suiga e pei ona moomia le tatau lea ona mulimulita’i i ai le tagata e ana oloa e fa’aulufale mai i totonu o le atunu’u, ina ia mautinoa e aloaia ma mulimulita’i i ai, ma o nei suiga ua fa’amoemoe e amata aloaia i le aso 15 Iuni 2017.

“O le agaga autu o lenei taumafaiga ina ia mafai ona fa’ailoa ma le manino soo se oloa e ulufale mai i le atunu’u aemaise lava i ta’avale, ina ia mautinoa e manino tulaga uma e aumai i totonu o le atunu’u”, o se vaega lea o le saunoaga a le Pule le tumau o le Ofisa o Tiute a le malo i sana tusi sa tu’uina atu i tagata fai oloa uma ma pisinisi o lo o fa’aulufale mai i le atunu’u a latou oloa, susuga Keith Gebauer.

Ina ia tusa ai ma le Vaega 27:1005 o le tulafono mo le fa’atupuina o pepa e fa’amaonia ai oloa e fa’aulufale mai i le atunu’u, o vaega nei e tatau ona fa’atinoina:

(a) O pepa fa’atumu uma e sainia mo le fa’alauiloaina o oloa e aumai i le atunu’u, o lo o i ai fa’atasi ma fa’asalaga pe afai e maua ane e sese fa’amatalaga o lo o tusia ai, e tatau fo’i ona silafia e le tagata o lo o sainia le pepa e moni ma fa’amaoni fa’amatalaga uma o lo o tusia i le pepa; (e) O le tagata o lo o saini i le pepa fa’atumu e tatau ona alu uma i luga o ia oloa uma e fa’aulufale mai i le atunu’u; (i) Ia sainia lelei le pepa fa’atumu ma ia fa’apipi’i mai ai ma se pepa e fa’amatala mai ai le tulaga o oloa o lo o fa’aulufale mai i le atunu’u; (o) ia aofia i lea pepa tulaga masani e pei o fa’amaumauga o le tagata na fa’atau mai ai, e aofia ai ma fa’amaumauga uma i le ituaiga oloa atoa ai ma le tau na fa’atau mai ai.

“E i ai i le Ofisa o Tiute le aia e iloilo ma su’esu’e ai pepa fa’atumu uma ina ia mautinoa e moni ma fa’amaoni fa’amatalaga uma o lo o i ai, e i ai fo’i le avanoa e ono teena ai se pepa fa’atumu pe afai e le fa’amaonia fa’amaumauga o lo o i ai”, o se vaega lea o le tusi mai le Pule sili le tumau a le Ofisa o Tiute.

E ese mai i tulaga o pepa fa’atumu, ua fa’atula’i fo’i e le Ofisa o Tiute a latou ta’iala mo ta’avale mai fafo e fia fa’aulufale mai i le atunu’u.

O ni isi o ia ta’iala e aofia ai le tatau lea ona fa’ailoa i le pepa fa’atumu le tau o le ta’avale sa fa’atau mai ai, o le fa’amaumauga e fa’atatau i le tau sa’o ma talafeagai e tatau ona fa’atau ai le ta’avale tusa ai ma le maketi o fefa’atauaiga, ia fa’ailoa e le tagata lea ua ia fa’atauina mai le ta’avale isi fa’amaoniga o lona fa’atauina o le ta’avale, ma ia ausia tausaga fa’atulagaina mo ta’avale e fa’aulufale mai i le atunu’u.

Na taua e se sui sinia o le Ofisa o Tiute i le Samoa News i le vaiaso nei e fa’apea, o le autu atoa ua mafua ai ona taumafai le Ofisa e toe fa’amausali ana ta’iala mo fa’amaumauga o uta ma oloa mai fafo e fa’aulufale mai i le atunu’u, ina ia taofia ai le toe tutupu mai o fa’afitauli e pei ona alia’e mai i le taimi ua te’a, o le maua o fualaau fa’asaina ma isi oloa e le tatau ona fa’aulufaleina mai i totonu o le atunu’u, e fiu e tau saili po o ai tonu le tagata na auala mai ai.