Toe fa’afo’i totogi fa’aopoopo - increments - mo tagata faigaluega a le malo

Pago Pago - AMERIKA SAMOA

I se poloaiga fa’alauaitele ia Nov. 23, 2022 ua fa’alauiloa ai e Kovana, Lemanu P.S. Mauga le toe fa’afoi o totogi fa’aopoopo (increments) o tagata faigaluega a le malo, ma ia fa’atonuina ai fa’atonu sili e tausi lelei a latou tagata faigaluega i lea mataupu. 

Na taua e Lemanu i le fa’atomuaga o le poloaiga e faapea, o tagata faigaluega a le malo o lo o i ai ni iloiloga lelei o galuega faatino, e agavaa i latou i se siitaga o totogi fa’aopoopo e tusa ai ma aiaiga o tulafono. 

E le gata i lea, e lua poloaiga faʻapitoa na tuʻuina atu e le pulega talu ai i le 2010 ma le 2011 faʻagata siʻitaga o totogi fa’aopoopo ona o taumafaiga a le malo i lea vaitaimi e fa’aitiitia tupe fa’aalu. 

Ma na toe fa’afo’i fo’i e le kovana ia Lolo si’itaga o totogi fa’aopoopo ae na tumau pea nisi vaega o le taofia o lea mataupu. 

Saunoa Lemanu e fa’apea, sa faia e lana faigamalo ni auala e toe fa’aleleia ai si’itaga o tagata faigaluega i tausaga ua mavae pe a le tu’uina atu si’itaga o totogi fa’aopoopo. 

Ma ua ia poloaina le soloia o poloaiga i le 2010 ma le 2011 ma o soo se ta’iala tau pulega e feteenai ma lenei poloaiga fou e faaleaogaina. 

I se isi tusi na tusia i le aso 23 o Novema i fa’atonusili o le kapeneta, na saunoa ai le ali’i kovana i lenei lava mataupu. 

“O se tasi o matafaioi taua a le supavaisa, o le tausia lea o a latou tagata faigaluega,” o le saunoaga lea a le alii kovana, ma e aofia ai ma le tuuina atu o fautuaga, taiala, ma iloiloga ina ia mafai ai ona lelei a latou tagata faigaluega ma agai i luma i a latou galuega.

Ma o loʻo faʻaalia i le tulafono, le manaʻomia ai iloiloga faʻaletausaga a tagata faigaluega.

“O le siitaga o totogi fa’aopoopo faaletausaga e le o se aia tatau,” o le faaaliga lea a le alii kovana, “ae e mafua mai i tagata faigaluega latou te mauaina ni iloiloga lelei o le faatinoga o a latou galuega i tulaga masani”.

Faaalia e Lemanu ua ia maua lipoti “e le o tupu lea tulaga i soo se matagaluega. Ou te manaʻo ia faʻamautinoa e malamalama tagata uma o iloiloga e manaʻomia mo soʻo se matata faigaluega ma tagata faigaluega konekarate”.

Na taua e Lemanu e fa’apea, e i ai taimi na taofia ai le si’itaga o totogi fa’aopoopo ona o popolega tau tupe. E le gata i lea, na aveese e kovana Lolo talu ai le faʻamalologa o le siitaga mulimuli o totogi 2015.

"O lenei faigamalo na taumafai e foia le leai o se siitaga o totogi e ala i le tuuina atu o tagata faigaluega siitaga e faavae i luga o le umi o le tautua,” o lana tala lea ma faasino faatonu i le tusi na tuuina atu i le tausaga talu ai. “O lea la ua tatau i supavaisa ma faatonu ona fai la latou vaega.”

Saunoa le ali’i kovana e fa’apea, o le fa’atonusili e nafa ma le tofiaina o se supavaisa e fa’atatau i tagata faigaluega ta’itasi. Ma e tusa ai ma aiaiga o le tulafono - e tatau i supavaisa fa'avasegaga ta'ito'atasi ona fa'amae'aina se iloiloga o tagata faigaluega ta'ito'atasi e le sili atu i le 60 aso a'o lumana'i le aso fa'aopoopo a tagata faigaluega ta'itasi.

“E masani lava, o le aso faamanatu o le aso na faafaigaluega ai i latou,” o le saunoaga lea a le alii kovana, ma faaopoopo mai ai o iloiloga e tatau ona faia i luga o pepa ua faamaonia e le faatonu o le Matagaluega o Tagata Faigaluega a le malo. 

Ua toe faamanatu e Lemanu i Fa’atonusili o le kapeneta e fa’apea, a tu’uina atu e Ofisa a latou ripoti ta’i kuata, e tatau ona aofia ai ma le ripoti o lo o i ai le aofa’i o tagata faigaluega na fa’atagaina, ua te’ena, pe ua le agava’a fo’i ona maua si’itaga o totogi fa’aopoopo mo le tausaga ua mavae.

“Ia tausia lelei au tagata faigaluega,” o le tala lea a Lemanu i faatonusili.

O se mataupu lenei ua leva ona tula’i mai mo tagata faigaluega a le malo o lo o fa’atalitali mo si’itaga o latou totogi, ma ua fa’amaninoina ai e le poloaiga fou a le ali’i kovana lenei mataupu.