Toe fa’afo’i i Samoa se ali’i na ta’usala i le faia o uiga mataga

Ua poloaina e le afioga i le ali’i Fa’amasino ia Elvis P. Patea le toe fa’afo’i lea i Samoa o se ali’i talavou lea ua ta’usala i lona faia o uiga mataga i ni tama’ita’i talavou se to’alua, e le mafai fo’i ona toe ulufale mai o ia i totonu o le atunu’u mo le umi lea ua fa’anofovaavaaia ai nei o ia e 7 tausaga.

O le vaiaso nei na tula’i ai i luma o le fa’amasinoga maualuga le ali’i o Fuava’a Ah Chong mo le lauina o lona fa’asalaga, ina ua ta’usala o ia e le fa’amasinoga i moliaga mamafa e lua. O ia moliaga e aofia ai lona faia o uiga mataga fa’afeusuaiga, atoa ai ma lona tagofia o itutinosa o se teineititi e laititi i lalo o le tulafono.

O le ali’i loia fautua lagolago ia Rob McNeill na tula’i mo Ah Chong, ae o le tama’ita’i loia sili lagolago ia Christy Dunn na tula’i mo le itu a le malo.

E pei ona taua e Patea, e le gata e lua tagi sa fa’aulu e le malo fa’asaga ia Ah Chong, ae to’alua fo’i tama’ita’i talavou na a’afia i lana solitulafono. E 4 moliaga mamafa na tu’uaia ai e le malo le ua molia i le latou tagi muamua, ae 3 moliaga mamafa na tu’uaia ai o ia i le tagi lona lua.

Ae i lalo o se maliliega na sainia e le ua molia ma le malo, sa ia tali ioe ai i le moliaga mamafa o le faia o uiga mataga fa’afeusuaiga mai le tagi muamua a le malo, o se solitulafono C lea o solitulafono mamafa, lea e mafai ona fa’asala ai o ia i le toese mo le umi e le silia i le 7 tausaga.

I le tagi lona lua a le malo faasaga i le ua molia, na malie ai o ia e tali ioe i le moliaga o lona tagofia lea o itutinosa o se tama’ita’i e talavou i lalo o le tulafono, o le solitulafono D i le fa’atulagaina o solitulafono mamafa, lea e mafai ona fa’asala ai o ia i le toese mo le umi e le silia i le 5 tausaga.

I le tali ioe ai o Ah Chong i moliaga e pei ona ta’usala ai o ia e le malo, sa ia ta’utino ai e fa’apea, i se taimi o le masina o Oketopa 2017, sa auai o ia i se mafutaga fa’aleuo ma ni tama’ita’i talavou se to’alua. I se taimi o lea mafutaga, sa ia faia ai ni uiga mataga i tama’ita’i nei e le fa’atagaina e le tulafono.

Ina ua maua le avanoa o Ah Chong mai le fa’amasinoga, sa ia fa’atoese ai loa e tusa ai o lana solitulafono, ma ia talosagaina ai se isi avanoa mo ia e toe fo’i atu ai i lona aiga i Samoa. Na taua e le ua molia lona salamo e tusa ai o lana solitulafono, ma ua ia lagona fo’i le leaga o le nofosala i le toese i Tafuna.

Na talosaga loia a itu e lua i le fa’amasinoga ina ia talia le fautuaga a le Ofisa Faanofovaavaaia, e ala i le faasala o Ah Chong i se fa’asalaga faanofovaavaaia, ae aofia ai ma le tuutuuga o lona tuua lea o le teritori ma toe fo’i atu i lona aiga i Samoa.

Na taua e McNeill i le fa’amasinoga e fa’apea, o Ah Chong o se ali’i talavou na malaga mai i se pemita e 30 aso ma le fa’amoemoe e saili sona lumana’i manuia i Amerika Samoa. A o i ai o ia i Amerika Samoa, na a’afia ai o ia i fiafiaga ma filifiliga fa’a talavou, ma i’u i lona soli ai o le tulafono.

O le itu lelei e pei ona taua e McNeill, e le i ovastay Ah Chong i le taimi na fa’atino ai le solitulafono. Ae talu ona taofia o ia i le toese ona o lenei mataupu, ua avea ai loa o ia ma tagata ua ova aso e aumau ai i Amerika Samoa.

Sa ia finau fo’i i le fa’amasinoga ina ia fa’aaoga masina e silia i le 13 lea na taofia ai Ah Chong i le toese e fai ma ana fa’asalaga i lenei mataupu, ae poloaina loa o ia ina ia ona tuua le atunuu ae toe fo’i atu i Samoa.

Na talia e le loia a le malo ia Dunn le talosaga a le itu tete’e, ma ia finau ai fo’i i le fa’amasinoga ina ia aua ne’i toe i ai se isi fa’asalaga fa’a falepuipui e tuuina atu mo Ah Chong, ae poloaina loa o ia na te tuua Amerika Samoa i se taimi vave lava.

Saunoa Patea e fa’apea, o le matuia o le gaioiga sa faia e lenei ali’i talavou, o le a’afia ai lea o ni tama’ita’i talavou se to’alua. Saunoa fo’i Patea e fa’apea, talu ai ua fa’atupulaia lenei ituaiga solitulafono i le atunu’u, ua manatu ai le fa’amasinoga e tuuina atu sana faaiuga talafeagai mo Ah Chong, ina ia atagia ai le naunau o le fa’amasinoga e saili ni auala e foia ai le toe alia’e mai o ituaiga solitulafono faapenei i le lumana’i.

Mo le moliaga o le faia o uiga mataga faafeusuaiga, e 7 tausaga ua fa’asala ai Ah Chong i le toese, ae mo le moliaga o le tagofia o itutinosa o se tama’ita’i talavou, e 5 tausaga ua fa’asala ai le ua molia i le toese. O ia faasalaga e tuli fa’atasi, lona uiga e 12 tausaga e taofia ai le ua molia i le falepuipui.

Ua faamalumalu e le fa’amasinoga le fa’ataunu’uina o lana fa’aiuga, ae o le a faanofovaavaaia le ua molia mo le 7 tausaga i lalo o poloaiga e ao ona ia usita’i i ai. O ni isi o ia poloaiga e aofia ai le aua lea ne’i ona toe solia se tulafono, ma ia tuua loa Amerika Samoa ae toe fo’i atu i Samoa ma aumau ai mo le umi e 7 tausaga o lana nofovaavaaia.

Ua fautuaina e le fa’amasinoga le tuuina atu o se kopi tusitusia o lana faaiuga i le Pulesili o le Ofisa o Femalagaaiga a le malo, ina ia mautinoa e aofia ai le igoa o Ah Chong i le lisi o tagata e le mafai ona toe ulufale mai i le atunu’u. Ua faatonuina fo’i le lesitala o le igoa o le ua molia i le lisi o tagata ua ta’usala i le faia o uiga mataga i fanau laiti, ina ia tusa ai ma le tulafono.