Toe fa’afo’i i Samoa le ali’i sa teufale Fatu-o-aiga pe a magalo

O le ali’i e 21 tausaga le matua lea sa galue o se Teufale i Fatu-o-Aiga, ua poloaina e le Fa’amasinoga Maualuga lona tuua o Amerika Samoa ae toe fo’i atu i lona aiga i Samoa, pe a mae’a ona ia tuliina le umi e 20 masina i le toese i Tafuna.

O le fa’asalaga fa’a falepuipui a John Luao Iosefo na tuuina mai e le fa’amasinoga maualuga i le aso Faraile na te’a nei, o se tasi lea o tuutuuga o lana nofovaavaaia e 5 tausaga, ina ua fa’amaonia e le fa’amasinoga le moliaga mamafa o lona tagofia lea o itutinosa o se teineititi e laititi i lalo o le tulafono.

O le moliaga e pei ona ta’usala ai Iosefo, e mafai ona fa’asalaga ai o ia i le falepuipui mo le umi e le sili atu i le 5 tausaga, pe fa’asala fo’i i le salatupe e le sili atu i le $5,000, po o le fa’asala fo’i i fa’aslaga uma ia e lua.

Na ulua’i tuuaia e le malo ia Iosefo i moliaga mamafa e 4, e aofia ai moliaga e 2 e pito sili ona mamafa fa’asalaga, o le faiaiga ma se teineititi e laititi i lalo o le tulafono (statutory rape) ma moliaga mamafa e 2 o le tagofia lea o itutinosa o se tama’ita’i e le i fa’aipoipo i ai (sexual abuse first degree). Sa tu’uaia fo’i o ia i le moliaga mama e tasi, o lona faia lea o se gaioiga e ono lamatia ai le saogalemu o fanau laiti.

I le talia ai e le fa’amasinoga maualuga o le tali ioe a Iosefo i le moliaga e pei ona ta’usala ai o ia, na faia ai loa le poloaiga e solofua isi moliaga uma o lo o totoe i le pepa o le tagi sa fa’aulu e le malo.

A o le i tu’uina atu le fa’aiuga a le fa’amasinoga maualuga fa’asaga ia Iosefo, na valaau e lana loia fautua ia Douglas Fiaui lona Tina fai mo lana molimau. Na taua e le Tina fai a le ua molia e fa’apea, sa ia vaetamaina mai le ua molia ina ua fa’atoa 5 masina lona matua, ma ia tausia mai ai lava o ia seia oo mai i le taimi nei.

Na taua e le Tina a Iosefo i le faamasinoga le mae’a lea ona ia fautua i lana tama, e talia soo se faaiuga e tuuina atu e le fa’amasinoga, ona o lea ua ia soli le tulafono.

Sa ia faailoa i le fa’amasinoga uiga lelei o Iosefo i le aiga, e le o se tama e ulaula pe inupia, ae fiafia lava e fesoasoani i le tausiga o le aiga ma mafuta atu i ana uo.

Na taua atili fo’i e le Tina i lana molimau e fa’apea, o le po lava na taofia ai lana tama e Leoleo ona o lenei mataupu, sa la o ai ma le Tama o le aiga ma fa’atoese i matua o le teineititi, ma la taua ai e fa’apea, e le afaina, ona ua pau lava o amioga a fanau.

Na faatoese le ua molia i le faamasinoga faapea ai le malo o Amerika Samoa, ina ia fa’amagalo lana solitulafono sa fai. Sa ia faatoese foi i le tama’ita’i na a’afia faapea ai lona aiga, ina ia fa’amagalo lana solitulafono sa fai.

Na ta’utino Iosefo i le fa’amasinoga, ua ia lagona lona salamo mai lana solitulafono, ma ua ia mana’omia fo’i se isi avanoa e fa’aauau ai pea lana tautua i lona aiga ma ona matua.

Na taua e Fiaui lona lagolagoina o se vaega o le ripoti a le Ofisa Faanofovaavaaia, lea o lo o taua ai le tele o itu lelei e fa’atatau ia Iosefo, e le gata o se ali’i e amio lelei ma taufa’afia, ae o ia fo’i o se ali’i e tautua Ekalesia, tautua aiga, toe fiafia e fa’auo atu i isi tagata, o se ali’i e atamai fo’i.

Na taua atili fo’i e Fiaui le matuia o le solitulafoo ua ta’usala ai le ua molia, peita’i ona o lea faatoa ta’usala o ia i se solitulafono, e agava’a ai le fa’asala o ia i se fa’asalaga fa’anofovaavaaia.

Na faaiu le talosaga a Fiaui i lona lu’iina lea o le fa’amasinoga, mo se faaiuga e faaauau ai pea ona tatala Iosefo i tua e faigaluega ma tausi lona aiga.

Na taua e le loia a le malo ia Woodrow Pengelly e faapea, o le matuia o le gaioiga sa faia e le ua molia, ua mafua ai ona aafia le olaga talavou o le tamaitai e 14 tausaga na a’afia, o le a le toe galo fo’i lenei mea sa tupu i lona mafaufau, e oo lava foi i lona aiga ma ona matua, o le a fa’aaua pea ona aafia o latou lagona ma mafaufau ona o le fa’alavelave sa tupou.

Na taua atili e le loia a le malo e fa’apea, o le popolega o lo o i ai i le aiga o le tamaitai na aafia, o le fa’aauau pea lea ona maua le avanoa e fesootai ai le ua molia ma le tamaitai na a’afia, ae pau le auala e mafai ai ona foia lenei fa’afitauli, o le fa’afo’i o le ua molia i Samoa.

Saunoa le faamasino sili ia Michael Kruse e fa’apea e le i leva atu foi i le isi 2 vaiaso ua tuana’i atu, sa tutula’i ai i luma o le faamasinoga maualuga ni alii talavou se to’alua mai Samoa e leai ni pepa nofomau, na tali ioe i moliaga o le faia o uiga mataga i tama’ita’i talavou, a o lea fo’i ua oo mai i lenei vaiaso, o le isi fo’i alii talavou mai Samoa lea ua ta’usala i le faia o uiga mataga lava nei i fanau teine talavou.

Pau le eseesega o le mataupu a Iosefo ma isi alii mai Samoa e to’alua e pei ona saunoa Kruse, o alii muamua ia e leai ni la pepa nofomau, ae o Iosefo o lo o lelei ona pepa nofomau.

Saunoa atili Kruse e faapea, e foliga mai i le ripoti a le Ofisa Faanofovaavaaia i le faatupulaia o ituaiga mataupu faapenei, e foliga mai e feololo atu le mea sa tula’i mai i le amataga, i se isi mea e toe aliali mai pe afai ae mae’a ona tuli le fa’asalaga fa’a falepuipui a le ua molia, ma ua manatu ai loa le fa’amasinoga, e sili ai loa pe a fai se faaiuga e taofia ai le toe tula’i mai o le mafutaga i le va o Iosefo ma le tamaitai na a’afia.

O isi tuutuuga o le nofovaavaaia a Iosefo e aofia ai le lesitala o lona igoa i le lisi o i latou ua ta’usala i le faia o uiga mataga i fanau tamaitai laiti, ma ia faia se suega i lona tino e iloa ai poo ia tauaveina le siama o le HIV.

O le faalavelave e pei ona ta’usala ai Iosefo na alia’e mai ia Ianuari 2015, ao galue o ia o se Teufale i le Fatu-o-aiga, sa ia faia ai uiga mataga i le tama’ita’i e 14 tausaga le matua na ‘aafia.

Na faailoa e Iosefo i Leoleo ina ua fesiligia o ia e faapea, o le tama’ita’i na a’afia o lana uo tama’ita’i lea, ma ua fa’alua ona la faiaiga talu mai le masina o Tesema 2014 na faatoa la masani ai, seia oo mai i le masina o Ianuari 2015 na alia’e ai lenei mataupu.