Toe fa’afo’i i Samoa le ali’i na ia faia uiga mataga teineititi 11 tausaga

O le ali’i mai Samoa e 45 tausaga le matua lea ua ta’usala e le Fa’amasinoga Maualuga, i lona faia o uiga mataga i se teineititi e 11 tausaga le matua, e le gata ua faasala i le Toese i Tafuna mo le 28 masina, ae ua poloaina fo’i o ia na te tuua Amerika Samoa ae toe fo’i atu i Samoa pe a mae’a ona tuli lana fa’asalaga.

O le vaiaso nei lea na tula’i ai le ua molia i luma o le Fa’amasinoga mo le lauina o lana fa’asalaga.

(Talu ai le puipuiga o le faalauiloaina o fa’amatalaga e uiga i le teineititi na a’afia, o le a le mafai ai e le Samoa News ona fa’ailoa le igoa o le ua molia)

O le ali’i Loia Fautua lagolago ia Rob McNeill na tula’i le ua molia, lea sa taofia pea i le Toese ina ua le mafai ona totogi le tupe e $75,000 na fa’atulaga e tatala ai o ia i tua; ae o le Tama’ita’i Loia Sili lagolago ia Laura Garvey na tula’i mo le malo i lenei mataupu.

Na ulua’i tu’uaia le ua molia i moliaga mamafa e aofia ai le faia o amioga faasotoma; taumafai e faamalosi se tama’ita’i; faapea ai ma le tagofia o itutinosa o se tama’ita’i i le tulaga muamua; faatasi ai ma moliaga mama e 2 o le faaoolima i le tulaga tolu ma le faia o amioga e lepeti ai le saogalemu o fanau laiti.

Ae i lalo o se maliliega na sainia e le malo ma le ua molia, na malie ai le ua molia e suia lana tali ioe i le moliaga na toe teuteu e le malo, ina ia fa’ailoa ai le moliaga o le tagofia lea o itutinosa o se tama’ita’i i le tulaga muamua.

I le tali ioe ai o le ua molia i le moliaga e pei ona ta’usala ai o ia e le Fa’amasinoga, sa ia ta’utino ai e fa’apea, i se taimi o le masina o Oketopa 2018, sa ia tagofia ai itutinosa o se teineititi e 11 tausaga le matua, o le tama teine lea a le Tina sa la mafuta.

Sa ia ta’utino atili fo’i e fa’apea, i le taimi ma le aso e pei ona taua, sa ia faia ai fo’i ni sauaga fa’asaga i le teineititi na a’afia, e ala i lona sasa o ia i se uaea o se ili e alu i le uila, ona o le tiga o lona loto i le le usita’i o le teineititi.

Ina ua maua le avanoa a le ua molia mai le Fa’amasinoga, sa ia fa’atoese ai loa e tusa ai o lana solitulafono sa faia, Na taua e le ua molia e fa’apea, talu ona malaga mai i Amerika Samoa nei ma faigaluega ai, o ia lava sa faalagolago i ai le itu tau tupe mo nai ona matua ma lona aiga i Samoa. Na te lafo tupe i masina ta’itasi e fesoasoani ai i le atina’eina o lona aiga.

Sa ia taua lona salamo e tusa ai o lana solitulafono, ma ua ia lagona fo’i le sese o lana mea sa faia. E le i fa’atoese le ua molia i le teineititi na a’afia poo lona aiga fo’i.

Na talosaga McNeill mo se fa’asalaga faanofovaavaaia, e aunoa ma le toe tuuina atu o se isi taimi e tuli e le ua molia, a ua lava le 15 masina lea ua mae’a ona ia tuliina i le toese talu ona taofia o ia, e fai ma ana fa’asalaga.

Na talosaga fo’i McNeill ina ia poloaina le ua molia e toe fo’i i Samoa ma aumau ai, o se tasi lea o tuutuuga o lana nofovaavaaia pe a finagalo i ai le Fa’amasinoga.

Na lagolagoina e Garvey le talosaga a le loia mo le itu tete’e.

A o le i tuuina atu e le Fa’amasinoga lana faaiuga e tusa ai o lenei mataupu, na maua le avanoa o le afioga i le Fa’amasino Sili ia Michael Kruse e talanoa ai mau faamaonia o lenei mataupu, atoa ai ma le auala na tofu atu ai lenei mataupu i le itu a le malo.

E pei ona taua e le afioga e Kruse e fa’apea, o le mataupu lenei na tofu atu i le Ofisa o Leoleo i le aso 25 o Oketopa 2018, ina ua logo e le Failautusi o le Aoga Tulaga Muamua a Fagasa le Ofisa o Leoleo mo se fesoasoani, ona o a’afiaga sa maitauina i se teineititi e 11 tausaga le matua o le aoga.

Na taua e le Failautusi a le aoga i Leoleo lona vaaia o le teineitiiti na a’afia i le fale o le isi aiga tuaoi, ae ina ua ia fesili i le teineitiiti pe aisea ua nofo ai i le fale o le aiga tuaoi, ae na tali le teineitiiti, na sola ese ma le latou aiga ona ua fefe i lona Tama (stepfather).

Na maua le avanoa e fesiligia ai e Leoleo le teineitiiti na a’afia e uiga i lenei mataupu, ma ia tuuina atu ai sana fa’amatalaga tusitusia i Leoleo e tusa ai o mea uma sa tutupu i le va o ia ma lona Tama.

O le fa’alavelave muamua lea e pei ona taua e le teineitiiti i Leoleo na tula’i mai i le masina o Setema, ina ua alu atu lona Tama ma tago atu i lona itutinosa. Sa ia fefe peita’i sa fa’afefe e lona Tama o ia ma fai atu, o le taimi lava na te ta’uina ai i se isi, na te sasaina ai o ia i le uaea.

O le fa’alavelave lona lua na tula’i mai i le isi po ina ua mae’a ona matamata ata leaga a lona Tama. Na alu atu ai loa ma tago atu ia te ia ma taumafai e fa’amalosi o ia. Sa ia tagi ma fai atu i lona Tama e soia e tiga.

Na ta’u e le teineitiiti i lona Tina uiga sa fa’aali atu e lona Tama ia te ia, peita’i sa tali atu lona Tina, e ta’atia atu se’i uma ona ia talanoa lea i lona Tama. O le fefe tele o le teineitiiti i nei uiga uma na mafua ai loa ona sola ese.

Na tusia e le teineitiiti i sana api mea uma sa tutupu ia te ia, e le gata i le sauaina o ia e lona Tama ae o uiga mataga fo’i ma le le taupulea sa faia ia te ia. Ina ua fesiligia e Leoleo le Tina o le teineitiiti na a’afia, sa ia fa’amaonia ai i Leoleo le talanoa atu o lana tama ia te ia e fa’atatau i uiga le taupulea sa faia e le ua molia, ae sa ia fai i lana tama e taoto atu se’i uma ona ia talanoa lea i le ua molia.

Na ioeina e le ua molia i Leoleo lona sasa o le teineitiiti i le uaea, peita’i sa ia teena lona faia o ni uiga mataga ia te ia, ina ua fesiligia o ia e Leoleo i le ulua’i taimi na tula’i mai ai lenei mataupu. Ae i lalo o le maliliega sa latou sainia ma le malo, na ta’utino ai loa le ua molia, e moni tu’uaiga fa’asaga ia te ia, i lona tagofia lea o itutinosa o le teineititi na a’afia.

E 7 tausaga i le toese na manatu le Fa’amasinoga e fa’asala ai le ua molia, peita’i ua faamalumalu lona tuliina o le fa’asalaga, ae ua faanofovaavaaia o ia mo le 7 tausaga i lalo o tuutuuga e ao ona ia usita’i i ai.

O ni isi o tuutuuga e aofia ai lona tuliina o masina e 28 i le toese i Tafuna. A mae’a ona tuli lea fa’asalaga, ona ia tuua lea o le teritori ae toe fo’i atu i Samoa ma nofomau ai mo le umi e 7 tausaga o lana nofovaavaaia, e le mafai ona ia taumafai e ulufale mai i le atunu’u.

Ua poloaina e le Fa’amasinoga le tuuina atu o se kopi o lana faaiuga i le Pulesili o le Ofisa o Femalagaaiga, ina ia mautinoa e aofia le igoa o le ua molia i le lisi o i latou e le mafai ona toe ulufale mai i le teritori.