Toe fa’afo’i i Samoa le ali’i na fa’aoolima i lona nephew i le agaese

O se tasi o tuutuuga o le nofovaavaaia e 5 tausaga mo le ali’i lea ua ta’usala i lona fa’aaoga o se agaese e fa’aoo ai manu’a tuga i le atali’i o lona uso, o lona tuua lea o Amerika Samoa pe afai ae mae’a ona tuli lana fa’asalaga fa’a falepuipui e 20 masina i le Toese i Tafuna.

O se tasi o itu na fesiligia e le Fa’amasinoga i le taimi na tula’i ai le susuga a Apelu Ulisese mo le lauina o lana fa’asalaga i le vaiaso nei, o le mafua’aga e 2 ai igoa o lo o ia fa’aaogaina i Amerika Samoa.

E pei ona manino i faamaumauga a le Fa’amasinoga, o le mataupu fou e pei ona tu’uaia ai Ulisese, o lo o iloa ai o ia i le igoa Apelu Ulisese, peita’i o faamaumauga a le Fa’amasinoga o loo maua ai, o le tausaga e 2006 na ta’usala ai fo’i le ali’i lava lenei i le solitulafono o le faaoolima i le tulaga lua, i lalo o le igoa o Apelu Filemoni

Na taua e Ulisese i le Fa’amasinoga e faapea, o lona igoa sa’o lava o lo o i lona pepa fanau o Apelu Filemoni, ae i le tausaga e 2007 na fautuaina ai loa o ia ma lana sponsor e le Ofisa o le Loia Sili ina ia fa’aaoga na o le faaiuga o Ulusese ae aua ne’i toe fa’aaogaina le faaiu Filemu, o le mafua’aga lena o lea ua suia ai lona faai’u e oo mai i le taimi nei.

Sa fesili le Fa’amasinoga i le ua molia, poo ai lona igoa moni o loo i luga o lona tusi folau, na tali le ua molia, o Apelu Filemoni. Na toe fesili le Fa’amasinoga i le ua molia poo fea e oso mai ai le igoa o o Apelu Ulisese, ae na tali le ua molia, o lona igoa lea o loo i luga o le pepa fanau.

Na ulua’i tuuaia Ulisese i moliaga e 3, lea e aofia ai le moliaga mamafa o le faaoolima i le tulaga lua, atoa ai ma moliaga mama e 2 o le faaoolima i le tulaga tolu ma le fa’atupu vevesi i nofoaga faitele. Ae i lalo o se maliliega na ia sainia ma le malo, na ia tali ioe ai i le moliaga mamafa o le faaoolima i le tulaga lua, ae solofua isi moliaga.

I le tali ioe ai o le ua molia, na ia ta’utino ai e fa’apea, i se taimi o le aso 30 Setema 2018, sa ia fa’aoo ai manu’a i lona nephew e ala i lona sasaina lea o lona ulu i le sapelu ma manu’a tigaina aio ia.

Ina ua maua lona avanoa i luma o le fa’amasinoga, na fa’atoese ai le ua molia e tusa ai o lana solitulafono sa faia, ma ia talosagaina ai se isi avanoa mo ia se’i toe fo’i atu ai i tua e tausi lona aiga, aemaise lava lona to’alua ma lana fanau.

“O le fa’alavelave na mafua ai ona taofia a’u i le falepuipui, na mafua mai ina ua vave lo’u ita, atoa ai ma le fa’aosooso mai o le tiapolo ia te a’u, lea na mafua ai loa ona ou fa’atinoina lenei solitulafono,” o le fa’amatalaga lea a Ulisese

Na fesili le Fa’amasinoga i le ua molia poo fea lona aiga lea e talosaga mai e toe fia fo’i i ai, poo lona aiga i Amerika Samoa nei poo Samoa. Na tali Ulisese, “O lo’u aiga i Amerika Samoa nei, lea ua silia i le 20 tausaga o o’u nofo ma aumau ai i le aiga o lo’u to’alua ma le ma fanau.”

Na talosaga lana loia fautua ia Michael White mo se fa’asalaga faanofovaavaaia, ae aofia ai le avanoa e auai atu ai le ua molia i ni aoaoga fa’afaufautua, e fesoasoani ai i le tulaga o le ita.

Na taua atili e White e fa’apea, e mana’omia e le ua molia ni aoaoga faa fautuaga e fesoasoani ai i le fa’afitauli o le ita o lo o a’afia ai o ia. Na toe faatepa fo’i e White le Fa’amasinoga i le isi fo’i soli tulafono na ta’usala ai Ulisese i le silia i le 10 tausaga talu ai, ina ua ia faaaoga se agaese e sasa ai le papatua o se ali’i na ia maua atu o gaoi fua o lana faatoaga i lona ma’umaga.

E le i lagolagoina e le loia a le malo le talosaga a le itu tete’e mo se fa’asalaga faanofovaavaaia, e aofia ai le taua lea ne’i toe tuuina atu se isi taimi e tuli e Ulisese i le Toese, ae fa’aaoga le 15 masina lea ua mae’a ona ia tuliina a o fa’atalitali ai se faaiuga o lana mataupu e fai ma ana faasalaga.

Talu ai le matuia o le gaioiga sa faia e Ulisese, na finau ai le itu a le malo ina ia fa’asala o ia i se fa’asalaga fa’a falepuipui, ae aofia ai ma le tuutuuga o lona tuua lea o le atunu’u ae toe fo’i atu i Samoa mo le umi o lana nofovaavaaia.

Na fa’ailoa e le Fa’amasinoga ia Ulisese e fa’apea, e foliga mai i fa’amaumauga a le fa’amasinoga, o ia e i ai lona fa’afitauli i le tulaga o le ita. O le tausaga e 2004 na ta’usala ai fo’i o ia i le moliaga o le faaoolima i le tulaga tolu, e mafua mai i le fa’alavelave lea na ia alu ai ma se sapelu i lona to’alua ina ua tula’i mai se la feeseeseaiga, a o sii e lona to’alua le la pepe e 8 masina.

Ina ua iloa atu e lona afafine e 4 tausaga lona matua lana gaioiga sa taumafai e fai, na mafua ai loa ona savali atu lona afafine ia te ia, peita’i sa ia faliu ane loa ma fasi fa’amo’amo’a lona afafine ma manu’a ai o ia.

Ae i le tausaga e 2006, na molia ai o ia e le malo i le moliaga mamafa o le faaoolima i le tulaga lua, lea na mulimuli ane ta’usala ai o ia e le Fa’amasinoga. O lea moliaga na mafua mai i le faalavelave lea na ia faaoo ai manu’a i se ali’i na gaoia lana faatoaga e ala i lona sasa o le papatua o lea ali’i i le itu mafolafola o le agaese.

E 5 tausaga na manatu le fa’amasinoga e fa’asala ai le ua molia, peita’i ua fa’amalumalu lona tuliina o lea fa’asalaga, ae o le a faanofovaavaaia o ia mo le 5 tausaga i lalo o tuutuuga e ao ona ia usita’i i ai. O ni isi o ia tuutuuga e aofia ai lona tuliina o masina e 20 i le toese.

Afai ae mae’a ona ia tuliina masina e 15 i le toese, ona taofi loa lea o le palenni o loo totoe o lana fa’asalaga e 20 masina, ae ona tuua loa le teritori ae toe fo’i atu i Samoa ma aumau ai mo le umi o lo o totoe o lana nofovaavaaia e 5 tausaga.

Na faamanino atili e le Fa’amasinoga e fa’apea, o le fa’asalaga ua tuuina atu ia Ulisese, ina ia puipuia ai le toe tula’i mai o ni isi fa’alavelave matuia faapenei i le va o le ua molia ma lona aiga, aemaise ai lava le fa’aaogaina o a’upega mata’utia.

“E laki e le o i ai se ola o ma’imau mai fa’alavelave e 3 lea ua mae’a ona molia ma ta’usala ai o ia, ae manatu le Fa’amasinoga, afai e fa’aauau pea onae faia lenei uiga i le lumana’i, e ono ma’imau ai se soifua o se tagata e aofia ai se tasi o lou lava aiga,” o le saunoaga lea a le Fa’amasinoga sa tuuina atu ia Ulisese.