Toe fa’afo’i i Samoa ia Fuimaono pe a magalo mai i le toese

Ua poloaina e le Fa’amasinoga Maualuga le ali’i o Afa Fuimaono ina ia tuua le teritori o Amerika Samoa ae toe fo’i atu i lona aiga i Samoa, pe afai ae mae’a ona tuli lana fa’asalaga falepuipui e 12 masina i le toese, e mafua mai ina ua ta’usala o ia i le fa’alavelave lea na ia fa’aaoga ai se agaese e fa’aoo ai manu’a i se ali’i na ia gaioia niu mai lona fanua.

Saunoa le afioga i le ali’i Fa’amasino Sili ia Michael Kruse e fa’apea, o le matuia o le fa’alavelave na tula’i mai, ua tau fai a’afia uma ai lumana’i o aiga a i laua na a’afia i lenei mataupu. E le gata ua toe fa’afo’i Fuimaono i Samoa, ae ua feagai fo’i le ali’i na a’afia ma manu’aga tumau i lona tino. Ae o le itu fa’anoanoa ai, o le fanua na mafua ai ona vevesi nei ali’i e to’alua e patino i se isi tagata, ae le o i laua.

O le vaiaso na te’a nei na tuuina atu ai le fa’asalaga a le fa’amasinoga maualuga fa’asaga i le ali’i o Fuimaono, i le mae’a ai lea ona ta’usala o ia i le moliaga mamafa o le fa’aoolima i le tulaga lua.

O Fuimaono, 48 tausaga le matua o le soifua, na taofia e leoleo i le aso 22 Tesema 2017, e mafua mai i le fa’alavelave lea na ia fa’aaoga ai se agaese e fa’aoo ai manu’a i le ali’i na a’afia o Elisara Paselio.

Na taua e Fuimaono e faapea, o le aso na tula’i mai ai le fa’alavelave sa alu atu ai e sasa lana togafa’i. Na faateia o ia ina ua taunu’u atu i lona fanua ma ia vaaia ai ni niu o loo taatitia i lalo o le niu, e foliga mai sa toli niu ai se isi i lona fanua.

Na alu Fuimaono ma momoli niu i lona fale, ona toe fo’i ane ai lea i lana togafa’i ma toe fa’aauau lana galuega. E lei umi ona fai lana galuega ae valaau ane le ali’i o Elisara pe aisea na alu ai fua ma niu. E lei umi ae vaaia e Fuimaono ia Elisara ua tamo’e atu ma tu’i o ia, ma ia pau ai loa i lalo ma tau lona ulu i le ma’a.

O le toe te’i i luga o Fuimaono na ia aapa atu ai loa i le sapelu sa uu i lona lima ma ta ai loa le vae o Elisara ma manu’a ai. Sa toe sasau le isi ana ta ma manu’a ai le lima. Na taua e Fuimaono, e fa’a 3 ona ia ta ina Elisara i le agaese.

Sa ia talosaga i le fa’amasinoga mo se avanoa e toe fo’i atu ai i lona aiga e fa’aauau lana tausiga i lona to’alua ma lona afafine e 8 tausaga o loo latou mafuta. O lana fanau matutua e to’a 2 o loo galulue i laua i le galuega Fa’a Misiona i Amerika.

Na fa’atoese le ua molia e tusa ai o lana solitulafono, ma ia talosagaina ai se isi avanoa mo ia.

Ina ua maua le avanoa o lona Faletua e molimau ai, sa ia talosagaina ai fo’i se avanoa e mafai ai ona toe tatala Afa i tua e alu atu e fa’aauau le fa’ato’aina o le ma’umaga e ola ai le aiga. Na taua e le Faletua e fa’apea, e leai se isi na te fa’alagolago ai i le tausiga o le aiga ua na o Afa.

Na taua e le loia a Fuimaono ia Michael White i le fa’amasinoga le matua mana’omia e le Tina ma lana tama e 8 tausaga o Afa ina ia toe fo’i atu i le aiga latou te mafuta. Sa ia talosaga i le fa’amasinoga mo se fa’asalaga faanofovaavaaia.

Na lagolagoina fo’i e le loia a le malo ia Woodrow Pengelly le fa’afinauga a le itu tete’e mo se fa’asalaga fa’anofovaavaaia. Na taua e le loia a le malo e fa’apea, o le itu fa’anoanoa o lenei mataupu, ona o lea ua atagia i le folasaga a le ua molia, o lana gaioiga sa faia o loo atagia mai ai lona taumafai e tali atu i le fa’alavelave.

Ae afai e vaavaai i le siosiomaga o le mataupu, o le ita o le ua molia na mafua ai ona ia tali atu i le ali’i na a’afia e ala i lona fa’aaogaina o se agaese.

Na taua atili e Pengelly e fa’apea, e tele lava auala e le vevesi e mafai ai ona fa’afilemu fa’alavelave e tutupu mai i fanua o aiga Samoa, peita’i o le fa’aaogaina o le agaese e le o se auala lea e foia ai fa’afitauli.

E 5 tausaga na manatu le fa’amasinoga e taofia ai Fuimaono i le toese, peita’i o le a fa’amalumalu lona tuliina o lea fa’asalaga, ae ua faanofovaavaaia o ia mo le 5 tausaga i lalo o tuutuuga e ao ona ia usita’i i ai.

O ni isi o ia tuutuuga e aofia ai lona tuliina o masina e 20 i le toese. Afai ae mae’a ona ia tuliina masina e 12, ona ia tuua lea o le atunu’u ae toe fo’i atu i lona atunu’u o Samoa na malaga mai ai. Ua poloaina fo’i o ia na te totogi le salatupe e $5,000, ma o lea sala o le a totogi lea e lana sponsor.