Toe aafia i le tulafono se alii o loo nofovaavaaia i le umia o fualaau faasaina

Pago Pago - AMERIKA SAMOA

O le alii mai Malaeimi lea o loo nofovaavaaia mo le 5 tausaga ina ua faamaonia e le Fa’amasinoga Maualuga tu’uaiga o le umia faasolitulafono o fualaau faasaina i le 3 tausaga talu ai, ua toe aafia fo’i o ia i le tulafono e mafua mai i tu’uaiga o lona faia o uiga mataga i se tamaitai e talavou i lalo o le Tulafono.

Ae ina ua pu’e faapagota e Leoleo le susuga a Foleni Fa’aaliga i le masina na te’a nei i lalo o se poloaiga mai le Fa’amasinoga, ae maua ai ma fualaau fa’asaina ia te ia.

O le masina na te’a nei na tula’i ai loa le ua molia i luma o le Fa’amasinoga Faaitumalo mo lana ulua’i tula’i.

E 2 tagi ua faila e le malo faasaga ia Fa’aaliga.

I le tagi muamua, ua molia ai Fa’aaliga i le moliaga e tasi o le talepe fale i le tulaga muamua faapea ai ma le moliaga e tasi o le tagofia o itutinosa o se tamaitai i le tulaga muamua, o le vaega C lea o solitulafono mamafa, lea e mafai ona faasala ai se tasi i le Toese mo le umi e le silia i le 7 tausaga, pe faasala foi i le salatupe e le silia i le $5,000, poo le faasala fo’i i faasalaga uma ia e lua; faapea ai ma le moliaga e tasi o le soli fua o le fanua o le isi tagata, o le vaega A lea o solitulafono mama.

I le tagi lona lua faasaga i le ali’i ua molia, ua tu’uaia ai o ia i le moliaga o le umia faasolitulafono o vaega o le pauta faasaina o le aisa, faapea ai ma le moliaga e tasi o le umia faasolitulafono o vaega o le laau faasaina o le mariuana, o vaega ia o solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, poo le faasala i le salatupe e oo atu i le $20,000; faapea ai ma moliaga mama e 2 o le faaoolima i le tulaga tolu atoa ai ma le faatupu vevesi i  nofoaga faitele. 

E $20,000 lea ua faatulaga e tatala ai Faaaliga i tua mai le Toese i Tafuna. Afai ae tatala o ia i tua, e le mafai ona ia taumafai e faafesoota’i molimau a le malo, e aofia ai ma i latou o loo aafia i lenei mataupu. E le mafai fo’i ona toe taumafai e alu i le nofoaga o loo masalomia na tula’i mai ai le solitulafono.

TU’UAIGA FAASAGA I LE ALII UA MOLIA

O le po o le aso 29 o Aokuso 2021 i le itula e 11:35 na faafesootai ai e se Tina le Ofisa o Leoleo i Tafuna mo se fesoasoani, faasaga i ni alii se to’afa o loo faia se latou inugapia i le fale a le latou tuaoi ma pisapisao ai. Na taua e le Tina i Leoleo le palalauvale o isi alii e to’alua ma tau’ai solo atigi fagupia i luga o le alatele, ma le leo o le musika ua leotele naua ae ua leva le po.

Na taua atili e le Tina i Leoleo lona vaaia o le isi alii e to’atasi mai le inugapia o loo fealualu solo i fafo o le fale ma se agaese i lona aao taumatau, ae o loo fa’aauau pea lava lona laulau vavale ma pisapisao solo.

Na vave gaioiga a Leoleo ma latou taunuu ai i le nofoaga o loo taua o loo tula’i mai ai le faafitauli. Na taunuu Leoleo ma latou molimauina ai alii e to’alua o loo saofafa’i i tua o le keli o se pikiapu lanu uliuli o loo paka i luma o le fale o loo masalomia le faia ai o le inugapia. O le isi vaaiga na molimauina e Leoleo, e to’atasi se alii na vaaia o loo taatia i luga o le mutia i fafo o le fale o loo pisapisao ma laulauvavale, ae o le isi alii o loo fealua’i i luma o le alatele ma le agaese i lona lima. 

Na aga’i atu isi Leoleo ma taumafai faato’afilemu le alii o loo fealua’i solo ma le agaese, mulimuli ane pu’e faapagota o ia ma taofia i lalo o le vaaiga a Leoleo, ae o isi Leoleo na aga’i atu i le alii o loo taatia i luga o le mutia ma latou iloa ai, o loo manu’a le ulu ma foliga o lea alii ma ua lilofia ona foliga i le toto.

Na faafesoota’i le vaega a le EMS ma auina atu ai loa le alii na manu’a i le Falema’i o le LBJ i Fagaalu mo togafitiga, ae auina atu le alii na fealua’i a le agaese i le Ofisa o Leoleo i Tafuna mo suesuega. O le alii na fealua’i ma le agaese i lona lima, o ia lea o Faamasino Fa’aaliga, le ali’i e 38 tausaga le matua o loo molia i lenei mataupu.

Na fesiligia fo’i e Leoleo alii e to’alua na saofafa’i i tua o le keli o le pikiapu sa paka i luma o le fale na tula’i mai ai le faalavelave, ma mafai ai ona maua e Leoleo ni isi faamatalaga e faatatau i le faalavelave sa tula’i imai.

A o le i auina atu le ali’i o Fa’aaliga i le Ofisa o Leoleo mo suesuega, na faia se siaki faapitoa i lona tino mo fualaau faasaina poo ni a’upega mata’utia, ma maua ai e Leoleo i le taga o le ofuvae sa faia a le ua molia se pepa iila o loo i ai vaega o le pauta pa’epa’e o le aisa. Na faia e Leoleo se suega i le pauta pa’epa’e na maua i totonu o le pepa iila na maua ia Fa’aaliga na faamaonia ai, o vaega ia o le pauta faasaina o le aisa. 

Na faaauau le siaki a Leoleo ma latou maua ai i le isi taga o le ofuvae sa faia a le ua molia se tamai pepa iila o loo afa i lau mamago o le laau o le mariuana. Na faia se siaki faapitoa i lau mamago sa i totonu o le pepa iila ma faamaonia ai, o vaega ia o le laau faasaina o le mariuana.

Na fesiligia e Leoleo nisi o molimau sa i ai i le taimi o le faalavelave e tusa ai o le mafua’aga o le vevesi faapea ai manu’a na aafia ai le ulu ma foliga o le ali’i na aafia. 

Na taua e se tasi o molimau i Leoleo e faapea, ao faia le inugapia a ali’i e to’afa i totonu o le fale lea na tula’i mai ai le faalavelave, sa ia faalogoina tagata o loo pisapisao ma laulauvavale mai totonu o le fale o loo faia ai le inugapia. E lei umi ae ona vaaia loa se tagata o aga’i atu i le nofoaga o loo faia ai le inugapia.

O le tagata lea na alu aga’i i le fale na tula’i mai ai le faalavelave, o le Tama e nofo i le aiga tuaoi, na alu e talanoa ia Fa’aaliga e tusa ai o le faalavelave na tula’i mai i le po ua mavae, lea na alu ai Fa’aaliga i totonu o le fale o le Tamaloa ma ia taumafai e faia ni uiga mataga i le afafine o le Tamaloa e 16 tausaga le matua. 

Na fesiligia e Leoleo le Tamaloa na alu i le fale sa faia ai le inugapia, ma ia taua ai e faapea, o ia na alu e fesili ia Fa’aaliga i le mafua’aga na alu atu ai i le latou fale ma ia tagofia itutinosa o lona afafine sa moe i luga o le nofoa i totonu o le potu malolo. 

Na avea le talanoa atu o le Tamaloa lea ma itu na ita ai Fa’aaliga ma savali ai loa i tua i le vaega o loo faia ai le inugapia ma savali mai ma se paipa u’amea i lona lima. Na taua e le Tamaloa le ova o le ‘ona o Fa’aaliga, e iloa gofie lava i lana talanoa ma ana mea e fai. Na vave ona alu ese le Tamaloa ina ua ia mautinoa, e i ai le faalavelave o le a tula’i mai. 

Ina ua toe fo’i mai Fa’aaliga i luma o le vaega tonu sa tu atu ai le Tamaloa, ua leai se isi, ae o loo tu atu ai se tagata. Sa manatu Fa’aaliga i lona mafaufau, o le Tamaloa lava lea o loo tula’i atu i luma o le fale, ma ia sasaina loa le ulu o le tagata lea i le paipa u’amea atoa ai ma le faaoolima i ai e ala i lona kiki ona foliga. Ae na te’i Fa’aaliga ina ua ia toe iloa mulimuli ane, o lana uo na latou inupia lea e manu’a.

Na fesiligia e Leoleo ia Fa’aaliga e tusa ai o lenei faalavelave, ma ia faamaonia ai lona faaoolima i le ali’i na manu’a e ala i lona fa’aaoga o se paipa u’amea e sasa ai lona ulu. Na taua e le ua molia e faapea, sa i ai lona manatu o le Tamaloa lea na alu atu ia te ia ma faamisa ai, o ia lea o loo tu atu i luma o le fale i le pogisa i le taimi na fo’i mai ai ma le u’amea i lona lima. 

Faatoa ia iloaina lava e ese le tagata o loo manu’a ina ua palasi i lalo le tagata na manu’a ma faamaonia ai loa, o lana lava uo lea ua toe aafia ia te ia.

Na ioeina fo’i e le ua molia fualaau sa maua ia te ia, o fualaau faasaina sa maua o meatotino a ia na faatau mai i se tasi o ana uo ave pasi mai Tafuna.