Toe aafia i le tulafono se ali’i na ta’usala muamua i fualaaufaasaina

Pago Pago, AMERIKA SAMOA

O le ali’i lea e 49 tausaga e matua lea o loo nofovaavaaia mo le 5 tausaga ina ua ta’usala i lona umia faasolitulafono o fualaau faasaina, ua toe aafia nei fo’i o ia i le tulafono ina ua taofi e Leoleo lana taavale i le solitulafono i luga o le alatele ae maua ai fualaau faasaina.

O le masina na te’a nei na tula’i ai i luma o le Faamasinoga Faaitumalo le susuga a Nathaniel Alesana mo le taimi muamua. 

Ua molia o ia e le malo i le moliaga o le umia faasolitulafono o vaega o le pauta faasaina ma le faamoemoe e tulei ma faatau atu i isi tagata; tasi le moliaga o le umia faasolitulafono o vaega o le pauta faasaina; tasi le moliaga o le umia faasolitulafono o vaega o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala foi i le salatupe e oo atu i le $20,000.

E $15,000 lea ua faatulaga e tatala ai i tua Alesana. 

TAGI A LE MALO

E pei ona taua e le malo i le latou tagi e faapea, o le aso 10 o Novema i le itula e 6:19 i le afiafi na molimauina ai e ni ali’i Leoleo se to’alua sa tiute i luga o le alatele i Tafuna se ta’avale pikiapu e sau mai Tafuna ma aga’i atu ai i Iliili i se saoasaoa uiga ese. E le gata fo’i i lea, e foliga mai ua mae’a le aoga o le pepa o loo pipii i le laisene e faataga ai ona fealua’i lea taavale pikiapu i luga o le alatele.

Na faafesoota’i e Leoleo le Ofisa Autu i Fagatogo ma siaki ai le numera o le laisene o le ta’avale, ma faamaonia ai, ua 3 tausaga talu ona mae’a le aoga o le laisene o le ta’avale, e le i toe faafouina lava.

I le maua ai e Leoleo o faamaumauga e faatatau i le ta’avale pikiapu, na la aga’i atu ai loa ma taofi le ta’avale i luga o le alatele. E to’atasi le alii sa i totonu o le taavale, o le susuga lea a Nathaniel Alesana, o ia fo’i o le ave ta’avale o le pikiapu. Na faailoa e Leleo ia Alesana le mafua’aga ua taofi ai lana ta’avale i luga o le alatele, ona o lona le usitaia o tulafono tau taavale afi e pei o le sona alu saoasaoa faapea ai ma le le faafouina o le laisene o lana ta’avale.

Na finau Alesana i Leoleo, sa faafou le laisene o lana ta’avale i le masina o Iulai o le tausaga na te’a nei, i lona la talitonuga, o loo lelei pea lava le laisene o le ta’avale, peita’i sa finau atu i ai Leoleo ma faailoa atu i ai faamaumau mai le Ofisa e faamaonia ai, e lei faafoua le laisene o le ta’avale. 

A o talanoa Leoleo ma Alesana, na vaaia e le isi Leoleo le minoi solo o Alesana ma foliga mai o loo ia taumafai e fa’aaoga lona vae e una’i ai se mea i lalo o lona nofoa. O le taimi lea na faatonu ai loa e Leoleo ia Alesana e alu i fafo ma le ta’avale, peita’i na musu Alesana e alu i fafo. Sa ia faaola fo’i le ta’avale ma taumafai e alu ese mai i le nofoaga ua taofia ai o ia e Leoleo.

Na faatonu e Leoleo ia Alesana e tape le afi o lana ta’avale ae alu i fafo, peita’i sa tumau pea le musu o le ua molia e usitaia faatonuga a ali’i Leoleo. Mulimuli ane, na usita’i Alesana ma ia tape loa le afi o lana ta’avale ae oso i fafo ma le ta’avale. 

Na taumafai Leoleo e loka lima o Alesana peita’i na tete’e le ua molia ma taumafai e sola ese ma Leoleo. Sa umi se taimi o tauivi Alesana ma Leoleo seia oo lava i le taimi na fetagofi atu ai loa Leoleo ma toso faamalosi mai lima o Alesana ae loka, ma tu’u atu loa o ia i totonu o le ta’avale a Leoleo e faafilemu ai.

A o le i tuuina atu Alesana i totonu o le ta’avale a Leoleo e faafilemu ai, ma faatali ai le taunu’u ane o le isi ta’avale a Leoleo, na muamua su’e e Leoleo le tino o Alesana poo i ai ni aupega mata’utia poo se laau malosi. I le taga o le ofuvae a Alesana sa faia, na maua ai e Leoleo se pepa iila laititi o loo i ai vaega o lau mamago o le mariuana. Na toe saili le isi tagata ma maua i ai se pepa iila feololo o loo i ai pepa iila laiti e 3 e tutumu i vaega o le pauta faasaina o le aisa.

Na auina atu Alesana i le Ofisa o Leoleo i Tafuna mo suesuega, faapea ai ma lana ta’avale, lea fo’i na ave e Leoleo i Tafuna e saili ai pe maua ai nisi fualaau faasaina. 

Ina ua saili e Leoleo le ta’avale a Alesana, na maua ai se tamai ato fusi manava lanu uliuli i lalo o le nofoa o le ave ta’avale, le nofoa na nofo ai Alesana. I totonu o le ato fusi manava uliuli, na maua ai e Leoleo ni straws se 3 o loo tutumu i vaega o le pauta faasaina o le aisa.

Na faia se suega faapitoa i pauta na maua ia Alesana faapea ai totonu o lana ta’avale ma manino ai, o vaega o le pauta faasaina o le aisa. Na faia fo’i se suega i lau mamago na maua ia Alesana ma faamaoia ai, o vaega ia o le laau faasaina o le mariuana.

O le mae’a ai ona faitauina o aia tatau faaletulafono a le ua molia, na ia faaalia ai loa malamalama i ona aia tatau faaletulafono, ma ua ia sauni fo’i e tuu atu sana faamatalaga i Leoleo e tusa ai o le faalavelae na tula’i mai.

Na taua e Alesana i Leoleo e faapea, o fualaau faasaina uma lava sa maua i lona tino faapea ai totonu o le ta’avale, e le o ni ana fualaau fa’asaina, ae o fualaau fa’asaina a le tagata e ana le ta’avale. 

Na taua e Alesana e faapea, o le ta’avale na ia faaaogaina, o le ta’avale a lona tuafafine ma lona to’alua, lea na ia faanoiina mai e momoli ai lana fanau i le aoga faapea ai ma lona to’alua i le galuega, ona o loo ave lana ta’avale i le Fale Inisinia e faaleleia vaega o loo faaletonu.

Na taua atili e Alesana e faapea, ina ua taunuu atu le taavale i lona fale i le masina ua tuana’i, sa ia taua ai i fualaau faasaina, ma ia tuuina loa i totonu o lona taga, ae o isi fualaau faasaina na ia tago ma toe tuu i totonu o le ta’avale, ina nei toe su’e mai e le tagata e ana le fualaau faasaina.

O le isi vaiaso na sosoo ai na faia ai loa le isi iloiloga a Alesana i luma o le Faamasinoga Maualuga, ona o tu’uaiga i lona le usitaia lea o poloaiga o lana nofovaavaaia, e mafua mai ina ua molia o ia e le malo i le mataupu fou e pei ona tu’uaia ai o ia i le umia faasolitulafono o fualaau fa’asaina.

Na faamanatu e le Faamasinoga Maualuga ia Alesana e faapea, o se tasi o tuutuuga o lana nofovaavaaia e 5 tausaga na tuuna atu i i le tausaga na te’a nei, o le aua lea nei ona toe solia se tulafono a le malo, aua fo’i ne’i ona toe tagofia fualaau faasaina poo le ‘ava malosi.

O le tausaga na te’a nei na faasala ai e le Faamasinoga Maualuga ia Alesana i lona umia faasolitulafono o fualaau faasaina, ma faanofovaavaaia ai loa o ia mo le 5 tausaga i lalo o tuutuuga e ao ona ia usita’i i ai. O nisi o ia tuutuuga e aofia ai lona tuli o le umi e 20 masina i le Toese, ma aua ne’i ona toe solia lava se isi tulafono a le malo, pe na te toe tagofia le ‘ava malosi poo fualaau faasaina.