Toe aafia i isi solitulafono mamafa se alii o loo nofovaavaaia

Pago Pago - AMERIKA SAMOA

O le ali’i lea o loo nofovaavaaia mo le 5 tausaga ina ua ta’usala o ia i le moliaga o le gaoi, ua toe aafia nei fo’i o ia i le tulafono ina ua taofia e Leoleo i le inupia i luga o se ta’avale i le 2 masina talu ai ae maua ai fualaau faasaina i totonu o le taga o lona ofu sa faia.

O le vaiaso na te’a nei na tula’i ai le susuga a Matagia Tino i luma o le Fa’amasinoga Faaitumalo.

Ua molia e le malo ia Tino i le moliaga o le umia faasolitulafono o vaega o le pauta faasaina o le aisa; faapea ai ma le moliaga o le umia faasolitulafono o vaega o le pauta faasaina o le aisa ma  le fa’amoemoe e tulei ma fa’atau atu i isi tagata, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, poo le faasala i le salatupe e mafai ona oo atu i le $20,000, poo le faasala foi i faasalaga uma ia e lua.

O lo o molia fo’i Tino i le moliaga mama o lona umia o se fagupia ua tatala i totonu o se ta’avale, o le vaega B lea o solitulafono mama, lea e mafai ona faasala ai se tasi i le Toese mo le umi e oo atu i le 6 masina, pe faasala i le salatupe e oo atu i le $500, poo le faasala foi i faasalaga uma ia e lua.

E $10,000 lea ua faatulaga e le Fa’amasinoga e tatala ai i tua le alii ua molia. Afai ae mafai ona tatala o ia i tua, ua faasa ona ia toe tagofia le ‘ava malosi poo le umia o fualaau fa’asaina, e le mafai fo’i ona ia toe taumafai e faafesoota’i molimau a le malo o lo o taua o latou suafa i le tagi tusitusia a le malo, lea e aofia ai le ave ta’avale o le pikiapu lea na ti’eti’e ai i tua.

O le masina fo’i na te’a nei na faia ai le ulua’i iloiloga o lenei mataupu i luma o le Faamasinoga Faaitumalo, ma taua ai e le Fa’amasinoga le lava ma totoe o mau sa folasia e le malo e lagolago ai le latou tagi faasaga i le alii ua molia nei.

TAGI A LE MALO

E pei ona taua e le malo i le latou tagi tusitusia e fa’apea, o le afiafi o le aso 17 o Aokuso, na taofi ai e Leoleo se taavale pikiapu i se vaega o Tafuna ona o le le usitaia e le ave ta’avale o ni isi tulafono i luga o le alatele. Na taua e le malo e fa’apea, e le gata na alu saoasaoa le ta’avale mai maila faatulagaina, ae na pe fo’i le moli o lo o pipii i tua o le laisene.

Na taofi e Leoleo le pikiapu ma iloa ai, e to’atasi le alii o loo i luma, o ia lea o le ave ta’avale, ma le isi ali’i e to’atasi o lo o ti’eti’e i tua o le keli o le ta’avale. 

Na talanoa Leoleo i le ave ta’avale ma faailoa i ai le mafua’aga ua taofia ai lana ta’avale, na vaaia e Leoleo le alii o loo i tua o le keli o le pikiapu o loo inu sana fagupia ua mae’a ona tatala. O lea ali’i na mulimuli ane iloa lona igoa, o ia o Matagia Tino, le ali’i o loo molia i lenei mataupu.

Na savali atu le isi Leoleo ma faailoa atu ia Tino, e le tusa ma le tulafono tau taavale afi lana gaioiga o lo o faia, o lona umia lea o se fagupia ua tatala i luga o se ta’avale. A o talanoa atu le Leoleo ia Tino, na vaaia e le Leoleo gaioiga a lea ali’i, e foliga mai e le popole i le faamatalaga o lo o tuuina atu ia te ia. 

Na savali le Leoleo ma talanoa i lona Ta’ita’i e faatatau ia Tino ma lana fagupia o lo o inu i tua o le keli o le pikiapu, ma faatonu ai loa e le Taitai le ali’i Leoleo e faatonu ia Tino ina ia sau i lalo ma le pikiapu. 

O le taimi na faatonuina ai Tino e salu i lalo ma le ta’avale, na vaaia le taumafai o lea ali’i e aapa i tua o le taga pito i tua o lona ofuvae o lo o faia, e foliga mai o lo o taumafai e aveese se mea mai totonu o le taga o lona ofuvae o lo o fai. 

Na vave gaioiga a Leoleo ma latou taofia ai loa Tino mai le fa’aauau ona aapa i tua i le taga o lona ofuvae o loo faia. Ina ua mae’a ona faailoa ia Tino le mafua’aga ua taofia ai o ia, ona o le solitulafono o le umia o se fagupia ua matala i totonu o le ta’avale, na malie ai loa le ua molia e saili e Leoleo lona tino mo ni aupega poo fualaau faasaina.

Ina ua saili e Leoleo le taga pito i tua o le ofuvae a Tino sa faia, na tau ai Leoleo i se mea malo o loo i ai. Na fesili Leoleo poo le a le mea malo o loo i totonu o le taga o lona ofu, ae na tali le ua molia, o lana telefoni. Ina ua aumai i fafo e Tino lana telefoni, na pau faatasi mai ai ma se pepa iila o lo o i ai vaega o le pauta paepae.

Na piki e le ua molia le pepa iila na pau mai totonu o le taga o lona ofu o loo fai ma tu’u atu i le Leoleo. Na fesili le Leoleo ia Tino poo le a lea pauta paepae o loo i totonu o le pepa iila, ae na ata le ua molia ma tali e fa’apea, “o le aisa”.

Na auina atu e Leoleo ia Tauga ma le alii ave ta’avale i le Ofisa o Leoleo i Tafuna mo suesuega atili. Sa taofia ai fo’i e Leoleo ma le ta’avale.

Ina ua mae’a ona faitau aia tatau a le ua molia, na ia faailoa ai loa i Leoleo ua malamaalma i ona aia tatau ma ua mana’o fo’i e faamatalaga le pepa iila o lo o i ai vaega o le pauta paepae sa maua ia te ia. 

Na taua e Tino e fa’apea, ae nofonofo i tafatafa o le Faleoloa i totonu o le Iliili ma inu ai lana fagupia, na afe mai le ta’avale a lona tausoga ma ia ti’eti’e ai loa i tua sei fai sana faasavili. A o le i alu atu le ta’avale, sa i ai le taimi na ia tago ai ua tae le otaota i luma o lona fale ma le Faleoloa, ma savali loa ua tia’i i le lapisi.

Na faateia o ia ina ua alu atu e tia’i le lapisi ae tau ai i le pepa iila o lo o tumu i vaega o le pauta paepae. Sa tago ma tu’u i totonu o le taga o lona ofu o loo faia le pepa iila ma lona manatu, e fia iloa poo le a lea pauta paepae o lo o i ai.

Na faia se suega i vaega o le pauta paepae na maua i totonu o le pepa iila lea na pau mai i le taga o le ofuvae a Tino sa faia, ma faamaonia ai, o vaega ia o le pauta faasaina o le aisa.

ULUA’I ILOILOGA

E toatasi le molimau na valaau e le malo mo le ulua’i iloiloga o lenei mataupu, o le susuga lea i le ali’i Leoleo ia Levi Tafa o ia fo’i lea na autu i ai le suesueina o lenei mataupu.

I tausaga e 10 talu ona avea ma Leoleo, e aofia ai ma tausaga e 3 talu ona galue i le Vaega Faapitoa e Suesueina Fualaau Faasaina e le Ofisa o Leoleo, na taua ai e le alii Leoleo i lana molimau e faapea, o lona tomai ma le poto na maua mai i aoaoga sa faatinoina i nei mau tausaga, na faavae ai i luga lana faaiuga, o vaega o le pauta o le aisa na maua ia Tino, sa ia umia ma le fa’amoemoe e tulei ma faatau atu i isi tagata.

Na matua tete’e malosi le Loia Fautua i mau folasia a le malo. Na fesili le Loia Fautua i le molimau pe na maua ni isi mea e faamaonia ai o aisa na maua ia Tino sa faamoemoe e tulei ma faatau atu e pei o se tinoitupe poo pepa iila fo’i e fa’aaoga e utu ai i totonu le aisa.

Na tali le molimau, e leai ni mea na maua ia Tino e ono iloa ai o lo o auai o ia i le fa’atauina atu o fualaau fa’asaina i isi tagata, se’i vagana ai lava le pepa iila lea e tumu i vaega o le pauta na maua ia te ia o lo o fai ma mau malosi i lenei mataupu.

E ui i le finau malosi o le ali’i loia i le leai lea o ni molimau a le malo e lagolago ai le moliaga o le umia faasolitulafono o vaega o le pauta faasaina ma le faamoemoe e tulei ma faatau atu faasaga ia Tino, ae na taua e le Fa’amasinoga le lava ma totoe o mau sa folasia e le malo e lagolago ai le latou tagi fa’asaga ia Tino.