Toatolu ni alii Samoa ua molia e le malo feterale i le gaoi

Long Beach - KALEFONIA

E toatolu ni alii Samoa, e aofia ai Kaelenn Maea, e 26 tausaga le matua mai i Long Beach, faapea Salagi Iakopo, e 30 tausaga, mai i Carson faapea Mathew Salanoa e 23 tausaga, mai i Placentia, ua molia nei i moliaga feterale ona o ni faleoloa na o latou osofaia, ma i’u ina maliu ai se tagata.

O le aso Tofi o le vaiaso ua mavae, sa lauina ai moliaga ua faasaga i nei alii e toatolu, e le ofisa a le Loia mai i le itumalo tutotonu i Kalefonia.

O lo o ua molia i latou uma i le osofaia ma le gaoia o ni faleoloa ma le tauaveina o se a’upega malosi.

E toalua i la’ua ua lokaina ae o lo o tau saili lava le toatasi.

Ua faalauiloa mai e le Ofisa o Faamasinoga a le malo o Amerika e faapea, o lo o molia i latou uma i lo latou gaoia o se faleoloa e faatau ai ‘ava malolosi, o se pamu kesi, ma se faleoloa – ma i’u ina maliu ai se tagata e le a’afia i lenei faalavelave, ina ua lavea i se ta’avale.

E tusa ai ma faamaumauga a le faamasinoga, sa faataunuuina e nei alii ia nei solitulafono mai ia Setema 22 seia o’o mai ia Setema 29.  Ma sa o latuo fa’aaogaina se a’upega malosi e faamatau ai le faatauoloa ma tagata i totonu o nei pisinisi, a’o latou gaoia tupe mai i le kesia po o totonu o pusa toso, ona sosola lea i se taavale, le ituaiga o SUV.

I le aso 27 o Setema, na gaoia ai e nei alii ia se pamu kesi i Compton.  O se tasi o i latou, o lo o talitonuina, o Salanoa, ona sa maua lona ata i luga o le vitio a le faleoloa, pe a ma le 10 minute ae e le i osofaia le faleoloa.

E faapea, na o ese le au gaoi mo sina taimi puupuu, ae na toe fo’i ifo i le pamu kesi ma se’i ai e leisi gaoi, o lo o talitonuina o Iakopo, ia le masini tupe mai i luga o le fata.  Ae o le alii o Maea, lea o lo o talitonu le malo feterale, sa u’uina le la’au malosi ma faalala i le kesia ma i latou sa iai i totonu o le faleoloa i lena taimi.  E pe a ma le $1,500 le tupe na gaoia e nei alii, ma o latou sosola i se taavale, le ituaiga o le Range Rover.

Lua aso na soso’o ai, na gaoia ai se faleoloa i seisi a’ai o Kalefonia, ma o lo o masalomia ai Maea ma Iakopo.  Ta’ua i faamaumauga a le faamasinoga, na faalala e leisi o i la’ua se fana i le kesia, ae gaoia e leisi le masini tupe.  E pe a ma le $350 i le $400 le tupe na gaoia mai i lea faleoloa.

I le aso 9 o Oketopa, e tusa ai ma faamaumauga a le faamasinoga, na maua ai e leoleo mai i LA ia le Range Rover lea na gaoia, lea sa fa’aaoga e sosola ai le au gaoi, lea foi na so’aina se ta’avale a’o sosola nei alii mai i le gaoia o le faleoloa, ma maliu ai se tagata na i totonu o le taavale.  Na tu’ua e nei alii le taavale ma sosola ae na maua atu e leoleo ia Iakopo o lo o lafi i totonu o se kalone lapisi.

Sa maua foi e leoleo ia ni lavalava o lo o talitonu o ni lavalava a le alii o Maea, i tafatafa o se fale.  Na maua foi e leoleo i totonu o le taavale lea na fa’aaoga e alii nei, ia ni lavalava ma ID ma se telefoni feaveai a Maea.

Afai ae faamaonia moliaga ua faasaga i nei alii, e mafai ona faasalaina i latou i le falepuipui feterale mo le 20 tausaga i moliaga o le gaoi, ae soloatoa i moliaga o le umia o se a’upega malosi.

O lo o fa’aauau pea ona faataunuuina suesuega a le FBI ma le ofisa leoleo a LA i lenei mataupu.