Toatolu na masalomia i le gaoia o ni siaki, ae molia na’o le to’alua

Pago Pago - AMERIKA SAMOA

O le aoauli o le aso 29 o Aperila, 2025, na o’o atu ai se vala’au i le Ofisa a Leoleo i Tafuna, mai i se tamaitai, e tusa ai ma ni siaki a le latou ofisa, ua saini (forge) e nisi ole aufaigaluega, ae fai ai ni faatauga i faleoloa.  Ma e ui ina sa fa’amaonia i su’esu’ega a leoleo, le a’afia ai o nisi e to’atolu, ae peita’i, e na’o le to’alua na molia i le tulafono.

E tusa ai ma fa’amaumauga a le faamasinoga, sa ta’ua e le tamaitai na vala’au atu i le ofisa a leoleo, o le tausaga ua tuana’i, sa gaoia ai se tusi siaki a le latou kamupani ma o le siaki lea na fa’aaogaina e fai ai se faatauga i le faleoloa a le Lucky 7, i Nuuuli, o se siaki mai i le tusi siaki lea na gaoia.

Na faapea ona agai atu leoleo i le faleoloa a le Lucky 7 ma feiloai ai ma le tamaitai na valaau atu i le ofisa a leoleo, o ia lea o le ‘Sales Supervisor’ a le kamupani a le Craig Joinery.

Sa faamatala e le tamaitai, le fa’ate’ia o ia, ina ua valaau atu sana uo, lea e faigaluega i le Lucky 7, e tusa ai ma se siaki a le latou kamupani (Craig Joinery), na fa’aaogaina i le faleoloa.  Ma sa faapea ona talosagaina e le tamaitai na valaau i leoleo, ia lana uo lea e faigaluega i le Lucky 7, pe mafai ona pu’e se ata o le siaki ma lafo atu.

Ma o iina na fa’amaonia ai, o le siaki lea, e mai i le tusi siaki lea na ripotia e le kamupani, sa gaoia i le tausaga ua mavae, ia Iulai 2024.  Na ripotia uma ia faamatalaga o le gaoia o lenei tusi siaki i leoleo i le tausaga ua tuanai, ae peitai, e o’o mai lava i le aso na tupu ai le faalavelave fou lenei, e le’i toe maua mai lava se tala mai i leoleo, i la latou suesuega.

Na ta’ua e le tamaitai na valaau i le ofisa a leoleo, le faate’ia tele o ia, ina ua mafai ona faamaonia le siaki lea sa fa’aaogaina i le Lucky 7, e mai i le tusi siaki na gaoia i le tausaga ua tuanai.

I le faamatalaga a le tamaitai faatauoloa a le Lucky 7, i leoleo, o le 1:00 i le aoauli o lea aso, na alu atu ai se tamaitai e fai sana faatau, e $38 le tau aofai.  O le tamaitai lea sa fa’amaonia mulimuli ane, o Tutulutaatia Leota, lea ua molia.

Sa ta’ua e le tamaitai fa’atauoloa, e $500 na tusi e le na molia, i luga o le siaki.  O lona uiga, e $462 le sui sa tu’uina atu e le fa’atauoloa, ia Tutulutaatia ma ia tu’ua ai loa le faleoloa.  Ae peitai, pe a ma le 10 minute na soso’o ai, ae ona (faatauoloa) maua se telefoni mai i seisi a latou lala i Fagaima, pe mafai ona tala se siaki e $400 mai i le Craiga Joinery.

O iina na oso ai loa le masalosalo a le tamaitai fa’atauoloa ma ia fa’afeso’ota’iina leisi a latou lala i le magatolu i Tafuna ma na fa’ailoa atu e le latou faleoloa lea, ua  mae’a ona talaina se siaki e $300, mai i le kamupani lava lea e tasi, i se tagata e suafa ia Mutaaga Vili.

Sa ta’ua e le tamaitai fa’atauoloa, lona logoina vave o logoina le latou lala i Fagaima, e aua ne’i toe taliaina ni siaki mai i le kamupani a Craig Joinery.  Ona valaau loa lea o le tamaitai faatau oloa, i lana uo lea e faigaluega i le Craig Joinery e uiga i siaki nei ua tala i a latou faleoloa.

Na ta’ua e le tamaitai mai i le kamupani a le Craig Joinery, o le siaki lea sa fa’aaogaina e faia ai le faatauga i le Lucky 7, sa tusia ai le suafa o Tutulutaatia Leota.  Ma o le tamaitai lea na iai sona sootaga i le gaoia o le tusi siaki a le latou kamupani, i le tausaga ua mavae.

Sa ta’ua e le tamaitai faigaluega a le Craig Joinery, o Tutulutaatia, o lo’o faaipoipo atu i le tamaloa sa a’afia i le gaoia o tusi siaki a le kamupani.  Ma sa ia (tamaitai faigaluega a Craig Joinery) taumafai e faafeso’otai ia Tutulutaatia, i le numera telefoni sa tusia i luga o le siaki.  Sa tali mai le na molia, o lo’o pisi o ia, ae o le a ia totogia mai le tupe.  Ma o le taimi mulimuli lea na toe maua ai se feso’otaiga ma le na molia.

Na maua i su’esu’ega a leoleo le faigaluega muamua o le na molia, i le kamupani a le Tool Shop ma sa faapea ona o latou agai atu iai.  Ae peitai, sa fa’ailoa mai iai e le ofisa a le Tool Shop le fa’ate’aina o le na molia, mai i le latou kamupani ona o tu’ua’iga i lona gaoia o tupe a le kamupani.  

Ma o lo’o iai se mataupu e faasaga ia Tutulutaatia.  Na fa’ailoa iai e le ofisa a le Tool Shop, i leoleo, o le nofoaga mulimuli, o lo’o i a latou fa’amaumauga, e nofo ai le na molia, o le afioaga o Aoloau.

Sa faapea loa ona agai atu leoleo i Aoloau ma maua atu ai Tulutulutaatia ma aumaia o ia i le ofisa a leoleo, mo le fa’atalatalanoaina o ia.  I lea fa’atalatalanoaga, sa fa’amaonia ai e Tulutulutaatia lona talaina o siaki mai i le kamupani, ma lona tausoga o Mutaaga Vili (lea na molia faatasi ma Tulutulutaatia), ona sa o la manaomia se tupe mo se fa’alavelave fa’aleaiga.

E tusa ai ma le faamatalaga a Tulutulutaatia, na o la mauaina mai nei siaki e tolu, mai i se tamaloa e nofo i Pavaiai, e suafa ia Edward Rose.  Ma o siaki uma ia e tolu a le kamupani a le Craig Joinery, sa aumai ia Edward.

Ona o la o muamua lea i le faleoloa a le Lucky 7 ma o la tusiina ai lona igoa, o le aofaiga e $500. Ina ua fiti le la laki, i le faleoloa muamua, sa faapea loa ona o la agai atu i leisi faleoloa lea o lo’o i le magatolu i Tafuna.  Ae ua tusi nei le igoa o Mutaaga i le siaki lona lua, mo le aofaiga e $300, ma sa faapea ona maua mai ai le tupe.

O se vaega o lea tupe, e pei ona molimau ia Tutulutaatia, sa o la fa’aaogaina e totogi ai le latou pili i le ASPA.

Ona o la agai atu ai loa lea i le faleoloa i Fagaima ma taumafai e tala le siaki lona tolu, mo le $400.  Ae peitai, sa musu le fa’atauoloa, e tala le la siaki.

Na fa’amaonia e Tutuluta’atia lona nofo malamalama, o siaki ia o lo’o la fa’aaogaina, o ni siaki sa gaoia, ae ona ua mana’omia se la tupe mo le latou fa’alavelave, na mafua ai ona ia faia lea tulaga.

O lea afiafi, sa agai atu leoleo i le fale a le alii o Edward ae peitai, e le’i iai Edward i le fale. 

O le taeao o le aso 30 o Aperila, sa toe taumafai ai leoleo e saili le tamaitai o Mutaaga, ae peitai, e le’i maua o ia.  Ae o se taimi mulimuli ane, sa toe agai atu ai leoleo e toe saili Mutaaga, ma na faasino ifo iai e se tasi o ona tuaoi ia lona fale.  Lea na maua atu ai loa e leoleo ia Mutaaga.

I le fa’atalanoaga a leoleo ma Mutaaga, sa fa’amaonia ai e Mutaaga ia faamatalaga uma a Tutulutaatia, e tusa ai ma lenei mataupu.  Ma sa ta’ua e Mutaaga lona lagonaina o se faamatalaga a Edward, ia Tulutulutaatia, ina ia aua ne’i talaina ia siaki i faleoloa i Mapusaga ma Pavaiai, ae ia o agai i faleoloa i Nu’uuli ma Tafuna.

Na fa’amaonia foi e Mutaaga lona nofo malamalama, o siaki ia sa o la talaina, o ni siaki sa gaoia, ae peitai, ua leai se mea e mafai, ua manaomia se fesoasoani tau tupe.

O moliaga na faia faasaga ia tulutulutaatia ma Mutaaga, na aofia ai le Saini pepelo o igoa i luga o siaki faapea ma le Gaoi.  O nei moliaga, o ni vaega ‘C’ i solitulafono mamafa, ma e mafai ona nofosala ai i le falepuipui i le ta’i 7 tausaga i le moliaga e tasi.  Po o se sala tupe, e le silia ma le ta’i $5,000 i le moliaga e tasi.  Po o fa’asalaga uma e lua.

E ta’i $5,000 vaegatupe na faatulagaina, e mafai ona tatalaina ai i tua ia i la’ua na molia, a’o fa’agasolo a la mataupu i luma o le faamasinoga.