Toatele tagata faigaluega malo faamaonia faaaogaina fualaau faasaina

Pago Pago - AMERIKA SAMOA

E fai lava si to’atele o le aofa’i o tagata faigaluega a le malo o lo o faamaonia i suega o loo faatautaia i le Fale Su’etoto i le Falema’i o le LBJ i Faga’alu, lo latou fa’aaogaina o fualaau faasaina e aofia ai le pauta oona o le aisa.

O se ripoti lea na tuuina mai e le Foma’i Sili o le Falema’i o le LBJ, Dr. Iotamo Saleapaga i se iloiloga sa faia i luma o le Komiti o le Puipuiga o le Saogalemu Lautele i le vaiaso na te’a nei, ina ua talanoaina le pili e faaopoopo ai le faasalaga o le ave ta’avale e musu e faia le suega poo ia tagofie le ‘ava malosi poo fualaau faasaina i le taimi e masalomia ai o ia i luga o le alatele, poo le taimi fo’i e tula’i mai ai se fa’alavelave tau ta’avale ma aafia ai se soifua o se tasi.

O le tulafono o lo o i ai, afai e musu le tagata ave ta’avale e fai lana suega mo le taimi muamua, e 90 aso e sei ai lona laisene, afai e fa’alua ona maua pe aafia le ave ta’avale i se solitulafono i luga o le alatele ae musu lava e fai le suega, ona se’i lea o lona laisene mo le 12 masina.

O suiga o le tulafono e pei ona tuuina mai e le faigamalo, o le taimi muamua e musu ai le ave ta’avale e fai le suega, o le a sui mai le 90 aso i le 12 masina e se’i ai lona laisene.

Ae afai loa e toe musu le ave ta’avale i le taimi lona lua e fai le suega, ona sui loa lea o le tulafono mai le 12 masina i le se’i lea o le laisene i le olaga atoa.

O lea iloiloga na taitaia e le Taitai Komiti, afioga i le ali’i Faipule ia Avagafono Tuavao Vaimaga Maiava. O sui o le malo na valaauina mo le iloiloga e aofia ai le Sui Loia Sili ia Roy Hall Jr; susuga Dr. Saleapaga ma le Komesina o Leoleo, afioga i le Faatui ia Lefiti Aitulagi Pese.

Saunoa Dr. Saleapaga i le taimi o le iloiloga e faapea, talu ona faatino e le Falema’i suega mo tagata faigaluega a le malo i fualaau faasaina, ua maitauina le to’atele o tagata faigaluega a le malo e faamaonia lo latou tagofia ma faaaoga le fualaau faasaina o le aisa.

Na faamanino e le ali’i Foma’i i luma o le Komiti e faapea, talu ai o ia lea e faia le faaiuga faai’u mo suega uma lava e faatinoina i le Fale Su’etoto a le Falema’i, o iina lea e mafua ai ona ia maua faamaumauga i tagata faigaluega e faaaogaina fualaau faasaina.

O le mae’a ai o le suega, ona tuu faatasi lea o lana ripoti ma tuuina atu i Ofisa taitasi o le malo o loo i ai tagata faigaluega atoa ai ma le Matagaluega o Tagata Faigaluega a le malo.

Na taua atili e le ali’i Foma’i lona matua lagolagoina o le tulafono ina ia faia suega mo tagata faigaluega uma a le malo ina ia mautinoa latou te le o faaaogaina fualaau faasaina ao galulue ai mo le malo.

O le faafitauli o fualaau faasaina i le taimi nei e pei ona saunoa le ali’i Foma’i, ua matua faateteleina lava i soo se nofoaga i le atunu’u, ma ua i ai fo’i ripoti ma tala ua salalau e faapea ua toatele fanau laiti ua aafia ai i fualaau faasaina. O nisi fo’i o taimi ua fa’aaoga fanau laiti latou te tulei ma faatauina atu fualaau faasaina, ina ia faigata ai ona masalomia i latou e le to’atele.

E to’atele Faipule e lagolagoina le tulafono taufaaofi ae tete’e i le suiga o faasalaga.

Saunoa le afioga i le ali’i Faipule ia Mike Asifoa e faapea, e taua le tulafono ae ua mamafa tele le faasalaga. O le se’i o le laisene o se tagata ave ta’avale mo le olaga atoa, o se tulaga ua matuia tele, aemaise lava pe afai o se tagata talavou lea na aafia i se solitulafono ma musu e fai le suega, lona uiga o le a se’i lona laisene mo le olaga atoa.

E talitonu le afioga i le ali’i Faipule ia Asifoa, e i ai le taimi e toe sui ai le mafaufau o le tagata talavou mai le mea sese sa ia faia, ma ua manatu fo’i e sui lona olaga ma aga’i i luma mo se lumana’i lelei mo ia, ae o le faigata ua i ai, ua se’i lona laisene mo le olaga atoa ona o se solitulafono sa ia faia ao talavou o ia.

Saunoa atili Asifoa, soo se tagata soifua lava na te manaomia lona laisene ave ta’avale.

Na tali le Sui Loia Sili ma faamanino e faapea, o le agaga atoa o le tulafono, ia faailoa i le ave taavale e le o manatu mamafa i soifua o tagata feoa’i, e le mama i le malo lenei ituaiga solitulafono. E le gata i lea, afai e manatu le tagata ave ta’avale i le taua o lona laisene ave ta’avale, e le tatau ona ia faia lenei ituaiga gaioiga.

Na lagolagoina e le Sui Fofoga Fetalai, afioga Fetui Fetu Jr le finagalo o Asifoa. O le tulaga o loo maitauina e pei ona saunoa Fetui, ua televave tele le malo e fau tulafono ma faasalaga mamafa, ae leai ni polokalame e fesoasoani ai i le mafaufau o le tagata solitulafono ina ia toe aoaoina mai le solitulafono sa ia faia.

Sa ia taua fo’i lona teena o le suiga i le tulafono e se’i ai le laisene o le ave taavale mo le olaga atoa. I lona talitonuga, afai ae se’i le laisene mo le 20 tausaga ua lelei ma talafeagai.

Na toe faamanino e le Sui Loia Sili, o le agaga o suiga i le tulafono, ia mautinoa le malu puipuia o le atunuu fegasoloa’i i luga o le alatele, ma ia mautinoa e aoaoina le mafaufau o le ave ta’avale ina ia lagona le taua o soifua o isi tagata.

O se tasi o itu na atugalu i ai afioga i Faipule, o le auala e faamalosia ai e Leoleo le tulafono atoa ai ma le fa’aaogaina o mea faigaluega e faia ai le suega mo soo se ave taavale e masalomia lona tagofia o le ‘ava malosi poo fualaau faasaina.

Na fesili le afioga i le alii faipule ia Vailiuama Steve Leasiolagi mea faigaluega o lo o faaaogaina e fai ai suega o le ave ta’avale ua masalomia lona tagofia o le ava malosi. Sa ia fesiligia le saogalemu ma le malu puipuia o nei mea faigaluega.

Na saunoa le Komesina o Leoleo, o lo o malu puipuia lava mea faigaluega o lo o fa’aaoga e alii ma tamaitai Leoleo e faatino ai le galuega. Sa ia taua atili fo’i e faapea, ua i ai lava Leoleo ua i ai le agava’a faapitoa i lenei galuega, o i latou la ia ua tufatufa i Sifi taitasi i le ao ma le po ina ia mautinoa e mafai ona faia suega mo ave ta’avale e maua i taimi eseese nei  ma masalomia o loo ia tagofia le ‘ava malosi.

Na taua e le afioga i le ali’i Faipule mai Manu’a #1 ia Alumamalu Filoialii Ale le taua tele o le faamalosiga o le tulafono, ona o iina o loo taoto ai le moni ma le faamaoni o le tulafono. 

Sa ia taua se tasi o faalavelave na aafia ai se tasi o ona alo, lea na taofia ina ua masalomia lona tagofia o le ‘ava malosi, e aunoa ma le faia i ai o suega, seia oo lava ina ave lona atalii e taofia i le falepuipui i Tafuna, ae na toe tatala mai lava i tua ina ua mafai ona faatino le suega ma faamaonia ai, e le o tagofia e ia le ‘ava malosi.

O le atugaluga lava fo’i lea na faasoa e le afioga i le ali’i Faipule ia Logoitu’au Mark Atafua, ina ua taofi e se Leoleo fou lana ta’avale ina ua masalomia lona tagofia o le ‘ava malosi, e ala i le mu o ona foliga i le vevela o le ala i le galuega palu sima sa latou galulue ai i lea aso. Na ave o ia ma loka i le Falepuipui e aunoa ma sana faasea, ae na toe faamaonia mulimuli ane ai ina ua faia le suega, na te le i tagofia le ‘ava malosi.

Pau le itu na toe faamanatu e le Sui Fofoga Fetalai i molimau a le malo aemaise lava i le Komesina o Leoleo, o le tele o mataupu e faatatau i fualaau faasaina na alia’e mai i tausaga ua mavae, o lenei lava e nonofo tatali le Fono Faitulafono ma le atunuu. poo fea ua oo i ai suesuega o nei mataupu e tele.

O nisi o ia mataupu e aofia ai fualaau faasaina na maua i le meli a le Falema’i o le LBJ, atoa ai ma le tele o mataupu i fualaau faasaina e maua i le Falemeli.