To’atasi ua molia talu mai le osofaiga a Leoleo na alu i Manu’a

Pago Pago - AMERIKA SAMOA

E to’atasi le ali’i lea ua molia e le malo i le umia faasolitulafono o fualaau faasaina ma aupega e le faatagaina, talu ona mae’a le osofaiga a Leoleo na faia i Ofu i Manu’a i le tausaga e 2020, lea na maua mai ai se vaega tele o fualaau faasaina faapea ai a’upega ma pulu fana.

O le isi to’atasi e to’alua i ai i laua o lo o taua i lenei mataupu, e le o mautinoa mai i le taimi nei poo afea e faila ai e le malo moliaga faasaga ia te ia.

O le alii ua molia, o le susuga lea a Apelu Liulamaga, lea na tula’i i luma o le Fa’amasinoga Faaitumalo i le vaiaso na te’a nei.

Ua molia e le malo le susuga a Liulamaga i le moliga e tasi o le umia faasolitulafono o vaega o le pauta faasaina o le aisa, faapea ai fo’i ma le moliga o le umia faasolitulafono o le laau faasaina o le mariuana, o ni solitulafono mamafa e mafai ona faasala ai se tasi i le Toese mai le 5 e oo atu i le 10 tausaga, pe faasala i le salatupe e le silia i le $20,000, poo le faasala foi i faasalaga uma ia e lua; atoa ai ma moliga mama e 4 e aofia ai le umia faasolitulafono o se aupega e lei lesitlaaina, o le vaega A o solitulafono mama, lea e mafai ona faasala ai se tasi i le Toese mo le umi e le silia i le tasi le tausaga, pe faasala foi i le salatupe e le silia i le $1,000, po o le faasala foi i faasalaga uma ia e 2.

E $15,000 le vaega tupe lea ua faatulaga e tatala ai i tua Liulamaga. Afai ae tatala o ia i tua, e le mafai ona ia toe umia ni fualaau faasaina poo a’upega mata’utia, e le mafai foi ona taumafai i soo se auala e faafesootai molimau a le malo.

TAGI A LE MALO

E pei ona taua e le malo i le latou tagi e faapea, o le aso 3 o Iuni 2020 na sainia ai e le afioga i le Faamasino ia Elvis P. Patea se poloaiga e faataga ai Leoleo ona latou sailia le fale ma le fanua o le susuga a Apelu Liulamaga, faapea ai ma le fale ma le fanua o Eleloi Misaalefua i Ofu i Manu’a.;\]/

O faamatalaga maumaututu na maua e Leoleo Suesue e faatatau i le aafia o Liulamaga ma Misaalefua i le umia atoa ai ma le faatauina atu o fualaau faasaina i Manu’a, na mafua ai loa ona talosagaina e Leoleo se faatanaga mai le Fa’amasinoga e faatino ai la latou osofaiga.

O le aso na sosoo ai, Iuni 4, 2020 na aga’i atu ai loa se vaega to’atele o Leoleo e faataunuu le poloaiga a le Fa’amasinoga.

Na muamua saili e Leoleo le fale o Misaalefua i Ofu, peita’i, e le i maua atu ai o ia, se’i vagana ai lona stepdaughter sa i ai i le fale i le taimi na saili ai e Leoleo le fale atoa. 

I le taimi na saili ai e Leoleo le fale, na maua ai e Leoleo se pepa taai, o se fana o le ituaiga o le 22. caliber e fai le tioata e vaai mamao ai, faapea ai ma le isi foi ituaiga a’upega e fai le faata e vaai mamao ai. Sa maua fo’i e Leoleo se tama’i container sa i ai pulufana, faapea ai ma le silia i le 50 fatu mariuana.

O le taeao lava lea ina ua mae’a ona saili le fale o Misaalefua, na aga’i atu ai loa Leoleo Suesue i le fanua a Misaalefua pe tusa o le 50 iata i tua o le fale ma aga’i atu i luga o le mauga e saili ai ni fualaau faasaina. 

Na maitauina e Leoleo i le taimi na latou savalia ai le fanua tulaga sa toto ai laau ae faatoa uma lava ona se’i ese ma faaleaga. Sa vaaia fo’i e Leoleo Seusue lau mariuana fou o lo o paepae solo i le vaega lea o le fanua, faapea ai ma atigi paelo sa fa’aaoga e totogi ai nisi o laau mariuana.

I le vaaiga sa molimauina e Leoleo Suesue, na faamaonia ai, e foliga mai na ta se’i ese laau mariuana a o le i taunuu atu Leoleo. Sa vaaia i le vaega lea o le fanua taga faalelei eleele poo tagata fiti alaisa, atoa ai ma atigi paelo o lo o i ai palapala sa toto ai mariuana.

E 3 laau mariuana na maua o lo o toto i totonu o ni atigi paelo ua misi ona faaleaga. 

I le vaavaai atu o Leoleo Suesue i foliga o le fanua aemaise ai le vaega tonu lava lea na maua i ai laau mariuana ma atigi paele sa toto ai laau mariuana ua faaleaga, e foliga mai ai ua tele tausaga o faatino lenei faatoaga mariuana e se tagata poo ni tagata fo’i se to’atele.

Sa molimauina e Leoleo le malu puipuia o le nofoaga e toto ai lenei faatoaga mariuana, ina ia faigata ai i tagata ona latou silafia ma mateia mai i le alatele.

Na faia se suega faapitoa i lau laau na maua i le nofoaga lea ma faamaonia ai, o laau ia o le laau o le mariuana.

Na mae’a le osofaiga i le fale ma le fanua o Misaalefua, ona aga’i atu lea o Leoleo i le fale ma le fanua o le ali’i ua molia nei ia Liulamaga. E lei maua atu e Leoleo Liulamaga i lona fale. Na taumafai e siaki le fale faigaluega pe le o i ai peita’i na fa’aalia e tagata faigaluega, e le i usu atu Liulamaga i le galuega i le taeao lea.

Na tuuina atu e le Leoleo Kapeteni le faatonuga e faataga ai ona ulufale Leoleo Suesue i totonu o le fale o Liulamaga e faatino le poloaiga a le Fa’amasinoga. 

I totonu o le fale, na maua ai le tele o pepa iila e masani ona fa’aaoga e utu i ai le pauta o le aisa, faapea ai ma pepa iila e 4 na mau i ai vaega laiti o le pauta oona o le aisa. Sa maua fo’i e Leoleo se tamai container o lo o i ai lau mamago o le mariuana, faapea ai ma se sikaleti mariuana se tasi ua uma ona taai.

Sa maua ai fo’i se aupega o le ituaiga o le .22, o le isi fo’i ituaiga aupega ole 3030 e i ai le faata e vaai mamao ai,  faapea ai ma pulufana e silia i le 110, ma se pepa iila e masani ona fa’aaoga e ula ai le aisa.

O mea molimau uma lava na maua mai i le fale o Misaalefua ma Liulamaga, na tuu faatasi uma e Leoleo Suesue ma tuuina atu i le potu e teu ai mau faamaonia a Leoleo. 

Sa faia se suega i le pauta pa’epa’e sa maua ma faamaonia ai, o le vaega lea o le pauta oona ole aisa. Sa faia fo’i se suega i lau mamago lanumeamata sa maua ma faamaonia ai, o lau ia o le laau faasaina o le mariuana.

I le tuana’i ai o aso e 2 talu ona mae’a le osofaiga i Manu’a, ae aga’i atu loa Misaalefua i le Ofisa o Leoleo i Tafuna ma talanoa ma Leoleo Suesue e tusa ai o le osofaiga sa faia i lona fale. Na muamua faailoa e Leoleo Suesue ia Misaalefua ona aia tatau, peita’i sa ia filifili e faaagafua ona aia tatau faaletulafono, ae tuuina atu sana faamatalaga i Leoleo Suesue.

Sa ia taua e faapea, na te le tagofia le pauta oona o le aisa, se’i vagana ai le mariuana e masani ona ula ai. E masani fo’i ona ia toto laau mariuana mal e faamoemoe e fa’aaoga mo ia lava. Sa ia taua atili e faapea, o laau mariuana na maua i le mauga, o le toga laau mariuana lea a Liulamaga.

Sa ia taua atili e faapea, o le toga mariuana lea na maua i tua o lona fale ma lona fanua, o le toga mariuana a Liulamaga, ae ina ua maua e Liulamaga le tala o lea ua alu atu le osofaiga a Leoleo, sa alu ai loa ma ta se’i uma i luga ma faaleaga lana toga mariuana.

Ina ua mae’a ona fesiligia e Leoleo ia Misaalefua, sa tatala ai loa o ia i tua e fo’i i lona aiga. 

O le aoauli o le aso lava lea na aga’i atu ai Liulamaga i le Ofisa autu o Leoleo i Fagatogo ma maua ai le avanoa o Leoleo Suesue e fesiligia ai o ia e tusa ai o mau faamaonia sa maua mai i lona fale i Ofu.

Ina ua mae’a ona faailoa ona aia tatau, sa filifili Liulamaga e fa’aagafua ona aia tatau, e le i mana’o fo’i o ia e tuuina atu sana faamatalaga tusitusia i Leoleo. Peita’i, sa mafai lava ona ia talanoa atu i Leoleo ma faapea atu i ai, o le toga mariuana lea na maua i luga o le mauga, o le toga mariuana a Misaalefua.

Sa ia taua i Leoleo, e silia i le 100 laau mariuana na toto e Misaalefua i tua o lona fale ma luga o le mauga. 

Ina ua mae’a ona fesiligia e Leoleo Suesue ia Liulamaga, sa tatala ai loa o ia e toe fo’i i lona aiga.

Ae o le vaiaso na te’a nei, i le lata ai i le 2 tausaga talu ona mae’a le osofaiga, na faatoa faila ai loa e le malo le latou tagi faasaga ia Liulamaga.