To’alua ali’i fusu mai Amerika Samoa tausinio ta’amilosaga lalolagi i Ausetalia

E to’alua ali’i fusu mai le Asosi o Fusuaga a Amerika Samoa (American Samoa Amateur Boxing Federation) ua sauni e fai ma sui o le atunu’u, i le ta’amilosaga a le lalolagi lea ua fa’amoemoe e faia i Ausetalia i le vaiaso lona lua o le masina o Aperila o loo lumana’i nei.

O ali’i fusu e to’alua o le a fai ma sui o Amerika Samoa, o i laua ia sa manumalo mai i pine auro mai le ta’amilosaga a le Pasefika sa talimalo ai Samoa i le masina o Fepuari na te’a nei, lea sa aofia ai atunu’u o loo sili ona malosi ma olaola lelei ai lenei falagamae’a e pei o Austalia, Niu Sila, Fiti, Tonga ma Samoa.

O i laua o le a malaga e aofia ai le susuga ia Jeffrey Tago ma Ioane Kaisa, lea o le a malaga fa’atasi ma le la faiaoga, o ia fo’i lea o le Ta’ita’i malaga, susuga Okesene Malala, o le sui peresetene fo’i lea o le Asosi Fusu a Amerika Samoa.

E pei ona fa’aalia e sui o le Asosi Fusu i le Samoa News e fa’apea, o le tulaga maualuga ma lelei sa i ai taumafaiga a Tago ma Kaisa i le ta’amilosaga sa faia i Samoa i le masina na tea nei, lea ua mafua ai ona manuia le la taumafaiga mo Ausetalia.

“O le ta’amilosaga lea ua fa’amoemoe e faia i Ausetalia, o le a sili atu ona faigata mo alo ia e to’alua a le atunu’u, ae o le a avea fo’i o se lu’itau mo i laua, e le gata e siitia ai le tulaga iloa i le ta’aloga, ae fa’aauau ai pea le avanoa e fusu ma feiloa’i atu i isi fo’i tama fusu ua iloga i lenei ta’aloga i le Pasefika”, o le saunoaga lea a Sala Sanele Etuale, o le isi lea faiaoga o loo lagolagosua ia Malala i le tapenaina o le au mo Ausetalia.

Pau le lu’itau o loo fetaia’i ma le aufusu a le atunu’u i le taimi nei i soo se taimi e malaga atu ai i ta’amilosaga fa’avaomalo, o le tau sailiina lea o se tupe e fa’atupe ai le malaga, ona o le tele o taimi e tagi ai lava le Asosi o Fusuaga i lima mo le tau fa’atupeina o malaga e auina atu i ai alo o le atunu’u e tausinio ai.

O loo talosagaina e le Asosi o Fusuaga a le atunu’u le fesoasoani a uo ma aiga fa’apea ai le atunu’u atoa, i le itu tau tupe e mafai ai ona fesoasoani i le tau fa’atupeina o le malaga lea ua toe 2 nei vaiaso ona fa’ataunu’uina loa lea.