To’alima taofia fa’apagota, tu’uaia fa’aoolima i ali’i leoleo se to’alua i le fa’aiuga o le vaiaso

Pago Pago - AMERIKA SAMOA

E to’alima ni taulelea sa taofia fa’apagota i le fa’ai’uga o le vaiaso, o lo’o tuuaia i le fa’aoolima i ni ali’i leoleo e to’alua, o lo’o malolo mai galuega, i le nofoaga o le faleaiga o McDonald’s i Tafuna, ina ua mae’a se po o le tafaoga i le Bowling Alley.

I fa’amaumauga a le fa’amasinoga o lo o taua ai e fa’apea, o le vaveao o le aso 9 Iulai 2023, na tu’uina atu ai e le Ofisa Tutotonu fa’amatalaga i le Ofisa o Leoleo i Tafuna (TPS) e uiga i se misa na tula’i mai i le McDonald’s.

E tusa ai ma se molimau sa i ai i le taimi na tula’i mai ai le vevesi, o se tasi o i latou e to’alima na ia uuina se ma’a ma sauni e osofa’i ni ali’i se to’alua e talitonu le molimau o ni leoleo o lo’o malolo mai galuega.

E le gata i lea na taua e le molimau e faapea, soo se tuuaiga e faia e tagata ulavavale e pepelo uma lava ona na te lei faalogo i leoleo o faia ni faamatalaga tau faamata’u.

Ina ua taunu’u i le nofoaga, na feiloa’i ai loa leoleo tali atu ma leoleo malolo mai galuega - o i laua ia o Vegas Pearson ma Seugalupe Leone ma sa faia le faamatalaga a Pearson i le mea na tupu.

Na taua e Pearson e faapea, a o i ai i le Bowling Alley ma ana uo, na alu atu ai se tagata e igoa ia Anitele’a Tuilagi ia te ia ma fesili pe o ia o se leoleo, ae na tali Pearson ‘ioe’. Ona fesili atu lea o Tuilagi i le leoleo ua le faigaluega, “Kua ulavale a o oe a?” lea na tali atu ai Pearson "e pule lava ia."

Ona ia vaaia lea o ni tagata se toafa o siomia o ia ina ua toso atu o ia e lana uo i totonu o le fale kalapu i se taumafaiga e aloese mai faalavelave.

Ina ua uma le valaau mulimuli i le Bowling Alley, sa latou agai atu i McDonald's e aumai ni meaai. Na taua e Pearson e faapea, ina ua uma ona paka le taavale, na ia alu atu e faafeiloai ni uo i le pakaga a o lana uo i totonu e oka meaai. Ona fa'alatalata atu lea ia te ia o tagata lava ia (o lo’o tuuaia) - ma o le taimi lena na tupu ai le misa.

Na toe ta’ua e Pearson e fa’apea, sa mau i latou i le va o ta’avale se lua ina ua amata ona osofa’i e le vaega o tagata ia te ia ma Leone i le pakaga. Fai mai Pearson, sa latou taumafai e puipui i latou, ona e to’atele i latou, ma sa taumafai fo’i e aveese i latou mai le vaega lea ae na tuliloa i latou e tagata ma tu’i ai lona tua ma lona ulu.

Na fa’auilavea nisi o tagata sa i ai i lea taimi, na tutu atu ina ua latou iloa atu le isi tagata e fai laulu mohawk e igoa ia Sosaiete La’asaga, o lo o u’u lima e lua o ma’a ma taumafai e togi atu i leoleo e le’i tiute, ae na toe toso i tua e tagata sa vaaia.

Sa fa’aluaina e Leone le fa’amatalaga a Pearson, na amata mai i le fale kalapu ina ua latou aloese mai se feeseeseaiga ma alii lava e tasi sa latou misa mulimuli ane i le McDonald’s, lea na aafia uma ai Pearson ma isi alii e toa 5. 

O i latou ia o Fa’amanu Malivao, Sosaiete La’asaga, Tony Fatu Toma, Filipo Atonio ma Anitele’a Tuilagi.

I faamaumauga a le faamasinoga o lo o taua ai e faapea, o Malivao sa faia tu’i muamua ma o le taimi lea na faaaoga ai loa e isi tagata e to’afa le avanoa e faaoolima ai ia Leone ma Pearson, ma maua ai e Leone ni maosi i lona mata agavale ma lona alafau faapea ai ma nai maosi laiti i le itu taumatau o lona lima ma lalo o lona ua. Na teena uma e Leone ma Pearson le togafitiga faafomaʻi.

Ina ua taunu’u atu leoleo i le McDonald’s, na sosola ese ai loa lea tagata, ae mulimuli ane maua e Leoleo a latou ta’avale i le nofoaga a Silva i Tafuna. 

E fa’alua ona su’esu’e e Leoleo le nofoaga, ma na fa’amanuiaina loa i le sailia o ali’i e to’alima ina ua toe fo’i atu i le nofoaga mo le taimi lona lua. I le taimi lea, na matauina e le au ofisa ni tagata se toalua o nonofo i fafo o le fale ae o le isi toatolu na o atu i totonu o le fale ma lokaina faitotoa.

I le itula e 4:44 i le taeao, na taofia ai e leoleo ia Malivao ma La’asaga na tuu i totonu o vaega o leoleo ma ave i le TPS mo nisi suesuega.

I le TPS, na ta’ua ai e Malivao o Tuilagi na mafua ai ona latou o atu i le McDonald’s ona o lona le fiafia i le ulua’i fetaua’iga ma Pearson. O tagata uma ia na fa’ailoa e Pearson ma Leone o ni tagata se to’alua na tu’uaia na fa’ao’olima ia i laua.

Ona toe fo’i atu ai lea o Leoleo i le Silva Compound i le itula e 5:26 i le taeao ma pu’e mai ai Toma ma Atonio ma ave i le TPS.  Na taua e Toma na te le iloa le mea na tupu ona o lo o moe o ia ma e le o i ai i le McDonald’s ma na ta’ua e Atonio na te le iloa le mea na tupu.

I le itula e 6:43 i le taeao, na toe agai atu ai loa leoleo i le Silva Compound ma o le taimi lea na maua ai Tuilagi ma momoli atu ai foi i le TPS. O Tuilagi na fa'amamaluina ma tu'uina atu se fa'amatalaga, fai mai na te le iloa le mea na tupu ma na alu atu ia te ia i le Bowling Alley e Pearson.

Na taua e Tuilagi e faapea, ina ua latou o atu i le McDonald’s, o le taimi lena na latou toe vaai ai ia Pearson ma na faafuasei ai lava ona misa, ae na musu e tuuina atu se faamatalaga tusitusia.

Na taofia Tuilagi i le TCF faatasi ai ma isi tagata e to’a 4 ma sa faia a latou uluai faamasinoga ia Iulai 10, 2023.

O Anitele’a Tuilagi, Tony Fatu Toma, ma Filipo Atonio o lo o tu’uaia uma i le moliaga mamafa e tasi o le fa’atupu vevesi i nofoaga faitele, ma e $300 le tupe ua fa’atulaga e tatala ai i tua le ali’i ta’ito’atasi.

E lua moliaga faila e le malo fa’asaga ia Sosaiete La’asaga ma Fa’amanu Malivao – tasi le moliaga o le fa’atupu vevesi i nofoaga faitele ma le fa’ao’olima i le tulaga tolu. Peita’i, e ‘ese’ese tupe e tatala ai i tua: $600 mo La’asaga ma le $500 mo Malivao.