To’alima sui tauva mo le tauvaga Tausala a Amerika Samoa

ago Pago - AMERIKA SAMOA

E to’alima ni tamaitai talavou ua tapenapena ma sauniuni atu mo le tauvaga Tausala a Amerika Samoa, lea ua faatulagaina e faia i le afiafi ole aso Toonai, Me 31, 2024, i le Fale Laumei i Utulei, e sui tulaga i le Tausala o Amerika Samoa 2023-2024, o Judy Faafetai Tauanu’u.

O le manulauti o lea afiafi, ua fa’aautuina “E Sui Faiga ae tumau pea le Faavae”.

Ma o lea foi tauvaga, o le a faamanatuina ai le 30 tausaga talu ona fa’avaeina lenei tauvaga po o lenei faalapotopotoga, o lo o faafoeina le tauvaga Tausala a Amerika Samoa, i totonu o le teritori.

Ma o tamaitai e to’alima o le a tausinio i lea afiafi, ua aofia ai Francine Iopu Masoe, Penicia Hunkin-Pene, Pauliana Felise-Vitale, Destiny Lauvao ma Jenavee Herrera.  O le fa’asologa foi lena o i latou i le tauvaga.

O le sui tauva muamua, le tamaitai o Francine Me Rita Vailoa Iopu Masoe, e sau mai i le afioaga o Fagaima ma Tafuna, ma o ia o le alo e faasino ia Matafai Vailoa ma Manaia Saolele Iopu Masoe.  E 26 tausaga o lona soifua.

O Masoe sa fa’ai’uina mai ana aoaoga mai i le Iunivesite a Portland State, lea ua ia ausia ai se fa’ailoga o le ‘Bachelor of Science’ i le tausiga o le soifua maloloina lautele (Public Health).  

O ia o se tamaitai e fiafia e asiasi atu i atunu’u eseese.  E le gata, e fiafia lenei tamaitai i le kuka, fa’amasani atu i tagata, pese ma le pu’eata.

Ua ia fa’ailoa mai foi, le avea o ia ma so’o o Iesu.

O lo’o galue nei o ia o se ‘Project Coordinator and Researcher’ i le faalapotopotoga a le Olaga Research lea o lo’o galulue faatasi ma le a’oga a Yale, i mataupu tau i le tausiga o le soifua maloloina.

Ua talitonu Msaoe, o le a fesoasoani le avea o ia ma Tausala a Amerika Samoa, e mafai ona fa’alaua’itele ai lana tautua i tulaga o le soifua maloloina, i totonu o Amerika Samoa.

O lo’o ua lagolago malosi le taumafaiga a lenei sui tauva, e le vaega o le Intersections.

O le sui tauva lona lua, o le tamaitai o Penicia Jade Hunkin pene, mai i afioaga o Leone, Lauli’I, Pago Pago, Fagatogo ma Aua.

O lenei sui tauva, sa na ia umiaina le tofi o le ‘Miss Samoa Hawaii 2021-2022’.  

O le sini faatuina a lenei tamaitai, o le avea lea o ia ma se fomai i le lumana’i.  O lo’o ua umia e ia se fa’ailoga o le ‘Bachelor of Science’ i mataupu faafomai.

Ma o se tamaitai pule, i nisi pisinisi se lua.

O lenei tamaitai, e fiafia i le ta’alo volipolo, siva, auaunaga, auai i pesepesega faaEvagelia ma le aoaoina o le Siva Samoa i fanau talavou.

O Penicia o se alo tamaitai a le susuga i le Faafeagaiga ia Ben Taito-Pene ma Mabel Hunkin-Pene, ma e 21 tausaga o lona soifua.

Ma o lo’o lagolagoina lana taumafaiga e le ‘Point of Beginning Professional Services’ ma le ‘Two Occasions Eleis & Designs’.

O le tamaitai o Pauliana Angelfromheaven Felise-Vitale, oo le sui tauva lona tolu.  Ma e malaga mai o ia mai i afioaga o Pago Pago, Sa’ilele ma Ili’ili.

E 25 tausaga o lona soifua ma sa faau’uina mai i le Iunivesite a Chaminade, i Hawaii, lea o lo’o ia umia ai se fa’ailoga o le ‘Bachelors’ i mataupu o Tala Faasolopito ma Mataupu faaFaigamalo.

O Pauliana, o le alo a Paulo ma Suni Felise, faapea Moamoaniua Ino ma Palu Vitale.  

O sona faamoemoega maualuga i lona auai i lenei tauvaga, ina ia mafai ona fesoasoani ai ia te ia, aua le auaunaga mo fanau talavou a le atunu’u ma le tausia lelei o latou soifua maloloina faalemafaufau.

O lo’o ua lagolagoina le taumafaiga a lenei tamaitai, e le ‘Interplan Inc & ZJ Construction’.

O le sui tauva lona fa, o le tamaitai o Destiny Tamali’i Faleomavaega Lauvao, mai i afioaga o Nu’uuli, Auasi, Pava’ia’i ma Poloa.

O Destiny sa fa’au’uina mai i le aoga maualuga a Tafuna, i le vasega fa’au’u o le 2017 ma o lo’o saili nei lona fa’ailoga FaalePisinisi, i atunu’u i fafo.

O Destiny, o se tamaitai e fiafia tele e faamalosi tino, a’ea mauga, ta’alo i taaloga vitio ma le asiasi atu i atunu’u ‘ese’ese.

O ia o se alo e faaasino ia Faafeo Lagafuaina ma Feao Lauvao Jr, ma e 24 tausaga o lona soifua.

O le faamoemoega maualuga a lenei sui tauva, ina ia mafai ona fesoasoani lona auai i lenei tauvaga, e u’unaia atili ai lana taumafaiga mo le fa’asaoina o le tatou aganu’u ma la tatou gagana.

O lo’o lagolagoina le taumafaiga a lenei tamaitai e ona aiga ma uo, faapea le Melvina Couture.

Ma le sui tauva lona lima, o le tamaitai o Jenavee Herrera, e 19 tausaga mai i afioaga o Ili’ili ma Malaeloa.

O se tamaitai e fiafia tele i pisinisi la’ei ma le tausia o foliga lalelei a tamaitai.

O ia se alo e faasino i le susuga ia Paul Iosefa ma le faletua ia Upulelei.

O lona auai i le tauvaga tausala i lenei tausaga, ua faamoemoe o le a mafai ona fesoasoani ia te ia, e atia’e ai lona malamalama i Tu ma Aganu’u faaSamoa.  Ma avea lea ma tulaga e fa’asoa atu ai le malamalama atili, ma taofia ai le saua i luga o upega tafa’ilagi.

O Jenavee o lo’o lagolagoina lana taumafaiga e ‘Marie Ala’ilima & Falana’I Ala’.

Ia faamanuia atu i nei alo o le teritori, aua le tapenapena atu mo lenei tauvaga i le vaiaso fou.

O le tauvaga o lenei tausaga, ua lagolagoina e le All Star, McDonald’s, BlueSky, ASVB, ofisa vaalele a Fiti, GHC Reid ma le GIAs.