To’ai i fanua toe asiasiga Reno Anoa’i i lona atunu’u

I le vaiaso ua te'a, sa taunu’u ai Reno Anoa'i i Amerika Samoa, o sana fa'ailo o lona loto atoa e toe fia fa'afo'i i lona atunu’u

"E ui ina sa vala'auina ma totogia atoa lenei asiasiga mai i Apia, Samoa e le Ofisa o Turisi a le Malo o Samoa, ae o le o'o mai, ou toe fia tepa i le malo na ola a'e ai ma amata ai ona iloa o'u aiga, i aiga o le tama o Muagututi'a Ryan Anoa'i ma lo'u tina o Manufou Liaiga Anoa'i. O le vala'aulia, ona o le taleni tau pese ma fatuga e agava'a ai fa'atauva i le American Idol i le 2016, lea sa ou mauaina ai le tulaga maoa'e, o le aofia lea i le 40 pitoaluga o e pepese i Amerika atoa. E ono masina o faia lea tauvaga, ae tusa ma le fa'asefulu ona ou auai i le filifiliga o nisi e toe tauva,” o se tala lea a Anoa’i, ua 19 ona tausaga.

O le a fa'au'u mai fo'i i lenei tausaga a'oga mai le San Mateo College ae soso'o ai ma le ulufale i le Iunivesite o sana filifiliga. O lo'o auai o ia o se Sui Totino o le PTK Honor Society a le San Mateo College.

O lo'o tamau lona fia avea ma se tasi e a'oa'o fa'apitoa i ala o feso'ota'iga, ae fa'aauau fo'i ma le avea o ia ma se tasi e lelei atili i le musika ma fa'atuga, ua naunau fo'i ina ia pese fa'a-Opera, o se tasi o tumutumuga o sana taumafaiga.

O Anoa'i, ua fa'aigoaina i le uso o lona tama, o lo'o ta'uta'ua mai fo'i i le Pi'iga e pei o uso o lona tama matua o "Afa ma Sika Anoa'i ". O le susuga Reno Anoa'i lea e fa'aigoa ai lenei atali'i talavou, ua fa'aigoaina nei i ana pi'iga o "Black Pearl."

Peita'i, o se tasi e matua le fia auai lava i lea fa'agatama. Ua iloga lona fiafia e fa'amaopoopo le latou Aufaipese Samoa i le vaitau o le taumafanafana po'o le summer o tausaga ta'itasi. I le taimi nei o lo'o tau'avea e ia le tofi Peresetene o le Pacific Islanders Learning Center, lea e aofia fa'atasi uma i ai so'o se talavou na soifua a'e i atunu'u o le Pasefika aofia Niu Sila ma Ausetalia.

O ia o le ulua'i Peresetene Samoa lea ua tofia e lea fa'alapotopotoga ma ua latou fa'aigoaina o le "MANA."

"Talu mai ona fa'atula'ia le Mana, e fa'atasi lava ona tula'i ai le talavou mai Tonga, lea ua i ai nei lo tatou sui, ae o taimi uma lava o sui papalagi mai Niu Sila ma Ausetalia ma isi setete e tutula'i ai. Ou te fa'afetaia fo'i lo'u lea avanoa ua galulue ma fa'alautele ai le iloa i ala e fa'amautu atili ai galuega fa'atalavou ma toe aoga mai i atunu'u na autova'a atu ai ma amata ai le soifuaga."

O le aofaiga o fanau e aoaoina e Reno i tulaga o pesega fa'asamoa e silia ma le 3,000. "O le to'atele o i latou, ua matua naunau lava e fia o'o mai i Samoa. Ua i ai nisi ua mafai ona o'o mai ona o fa'alavelave fa'aleaiga, po'o ni malaga mai a o latou aiga, ua fo'i atu ma fa'amatala le olaga sa'oloto ma le tafafao, ae maise o le tausi aiga o tatou aiga iinei, o le ala lea e fia o'o mai ai i latou se'i fa'amalie lo latou fia iloa o Samoa na lua, po'o iinei po'o Samoa Tuto'atasi fo'i."

Talu ona taunu’u i le teritori, ua ia asia le Ofisa o le Kovana Sili Lolo Moliga Matalasi, ma ua fiafia aua, ia te ia lava, sa ia fa'ailoa mai, "E le'i taitai lava se tautua mo Amerika Samoa, o lea lava ou te naunau e fa'alautele ma taumafai atili ia maua so'u 'ai e ta'u ai lo'u malo o Samoa i mea ou a'oga ma tautua ai pe tauva ai fo'i. Peitai o se fa'aeaga ia te a'u lo'u avanoa ou te fa'atalofa ma fa'asoa mai ai fo'i ta'ita'i o le Malo o Amerika Samoa i lo'u talavou taumafai. Ua aumai ma latou fa'amanuiaga, ae ua toto fo'i i le loto le ola taumafai o se talavou Samoa ina ia ta'uta'ua lona malo ona o sana taumafaiga."

Sa ia asia foi fa'asalalauina fa'alaua'itele ni tautalaga ma ana musika ua fofogaina i luga o alaleo o le KHJ ma le KSBS. E le gata i lea, ua ia asia le KVZK-TV, sa galue ai mo le tele o tausaga le tina o si ona tama, Siniva Kuresa Anoa'i.

"Oka ma te ulufale atu ma lo'u tina, ae va'aia le ata tele o Mama lea e fa'apipi'i mai i le puipui o le Ofisa o le KVZKTV. Lona aulelei le 'avea lea o si ou tina matua, sa maligi loimata ona o le to'atele o ana uo, ma e masani ia te ia, atoa ma tagata e fa'afeiloa'ia au ma latou fai mai, "Alofa atu i lou tina, misia ona foliga ma lona leo i fa'asalalauga a le Fale Televise iinei." O sana tala fiafia lea.

O lana filifiliga, atonu o le a ulufale i le Santa Barbara University, peita'i e le'i mautu i le taimi nei, ina ne'i suia sana filifiliga pe a o'o ina taulimaina uma avanoa o le a fa'ao'o atu ia te ia i le fa'aiuga o lona tausaga a'oga lenei, ma fa'au'u ai i lana Kolisi o i ai.

Ae mautu lona iloa, e le motusia lana taleni ua ia filifili e tau'ave i le Iunivesite, ia maua ona fa'ailoga i le Communications, ma ia toe aoga lava e fa'ao'o musika fa'asamoa i le tumutumu o faigamea i le tai tau musika. E fiafia tele o ia i pesega malu, e le so'ona gae'e e tali tutusa ma musika ma fatuga fa'asamoa.

O ana taumafaiga, e na te toe fia taliu mai pe a maea a'oa'oga, "E toe fa'afo'i mai se sao mo ou uso ma tuafafine i le motu, ae maise oe Samoa la'u pele, e le tu'ua lava oe i lalo, e laualuga lava oe i le fa'amoemoe, i so'o se taumafaiga. Ia fai lava so'u sao."

Sa maua lona avanoa e pese ai i le A'oga Maualuga sa a'oga ai lona tama o Ryan Anoai a'o iinei, ma sa peseina ai ana pese e tolu. Na tu'ufa'atasia lea avanoa e le ASTCA i le afiafi o le aso Faraile na te'a. O lana toe fa'afiafiaga sa faia lea i le Oasis i le afiafi o le aso Faraile a'o le'i tu'uva'a atu i Samoa.

Na fa'atasia ai ma le afioga le Aloali'i Afoa Moega Lutu ma le faletua aua o se tasi fo'i o aloali'i o le latou aiga potopoto Sa Lutu ma Afoa le susuga Reno Anoa'i.

Ina ua talanoa mai o ia e tusa o lona vala'aulia fa'apitoa i Samoa sa ia fa'ailoa mai ai, "Vave tele feso'ota'iga a le malo Tuto'atasi, ma o se sao fo'i e vave ai ona fesoasoani e fa'ailo a latou tama fanau, ae fa'aosofia lagona lelei, ina ia taumafai atili ma toe fo'i mai e fai se sao."

O le a avea Reno Anoa'i ma se tasi o le au fa'afiafia fa'apitoa i le Koneseti a le Ofisa o Turisi lea e faia i le afiafi o le aso Faraile nei, ma e to'atele fo'i isi alo o Samoa mai fafo i Niu Sila ma Ausetalia fa'apea le lotoifale o Samoa lava, o le a fa'atasi ai i lea po fiafia.