To’a 6 molimau na valaau ulua’i aso fa’amasinoga o Thomas Siaumau

E to’a 6 molimau a le itu a le malo na valaau i le ulua’i aso o le fa’amasinoga autu a le susuga a Thomas Siaumau, lea o lo o fa’agasolo i luma o le Fa’amasinoga Maualuga i le vaiaso nei.

O molimau na valaau e aofia ai Leoleo e to’a 4 ma ni tagatanu’u se to’alua, o i laua fo’i o ni Faiaoga. Na taua e tama’ita’i Faiaoga i a la molimau, lo la fa’alogoina lea o le papa o fana i le po o le aso 14 o Tesema 2017, i le va o le itula e 9:00 e aga’i atu i le itula e 10:00 i le po. O le leo o fana sa fa’apapa i lea po, na aga’i mai lea i tua tonu o le nofoaga o loo i ai le malae Baseball i Tafuna, i le isi itu o le Aoga Tulaga Muamua a Tafuna.

E 8 moliaga o lo o tu’uaia ai e le malo ia Siaumau, o ia moliaga e aofia ai moliaga mamafa e 5 ma moliaga mama e tolu.

E to’a 6 sui o le vaega iloilo iuga na filifilia i le aso Gafua na te’a nei latou te finauina se fa’aiuga o lenei mataupu. O i latou nei e aofia ai tama’ita’i e to’afa ma ni ali’i se to’alua.

O ali’i loia e to’alua mai le Ofisa Loia a le RDA ia Richard deSaulles ma Daniel Holladay o loo tula’i mo Siaumau, ae o tama’ita’i loia sili lagolago e to’alua ia Christy Dunn ma Laura Garvey o lo o fai mai sui o le malo, ae lagolagosua i ai le ali’i Leoleo Su’esu’e ia Det. Savelio Vaofanua, o ia lea sa fa’auluulu i ai le suesueina o lenei mataupu.

O le ulua’i molimau na valaauina e le malo, o le susuga i le ali’i Leoleo ia Faatiu Lepou, o le isi lea Leoleo e to’alua i ai Leoleo na aga’i atu e siaki le lotoa a le Ofisa o le ASTCA lea na taua sa tau’ai i ai e ni tamaiti ni mea faapapa, ae fa’afuase’i ai loa ona tula’i mai ai le fa’alavelave e pei ona tafana ai le ta’avale a Leoleo sa la malaga ai.

Na taua e Lepou e faapea, a o la aga’i atu ma le Leoleo ia Leomiti e tali i le faalavelave e pei ona tula’i mai i le po lea, sa la fa’alogoina le papa o fana mai tua o le malae Baseball. Na taua e Lepou le manino lelei i lana fa’alogo, o le leo o le fana lea sa ia fa’alogoina i le po lea.

O le molimau lona 2 ma le lona 3 sa valaau e le malo, o ni tama’ita’i Faiaoga. O se tasi o i laua nei e faiaoga i le Aoga Tulaga Muamua a Tafuna. Na taua e le molimau lea i lana fa’amatalaga fa’atauto e fa’apea, pe tusa o le itula e 9:00 i le po o le aso 14 o Tesema 2017, na la toe aga’i atu ai ma lana tama e aumai lana masini laptop sa galo i totonu o lona potu i le Aoga Tulaga Muamua a Tafuna.

E le i umi ona la i ai i totonu o le potu aoga ae o la fa’alogoina loa le papa mai o fana. Sa i ai lona manatu ai o ni Faga Ofe mai tupulaga o loo faapapa solo, aua o le taimi lea ua latalata i aso fiafia ma le fa’aiuga o le tausaga.

Ae ina ua ia toe fa’alogoina le toe papa fa’alua mai o fana, sa manino ai loa i lana fa’alogo, e le o se pa o se Faga Ofe, ae o le leo o le fana o loo faapa. O lea na fa’anatinati ai loa a la gaioiga ma lana tama ma la tuua vave ai loa le lotoa a le aoga, ona e fai lava si latalata o le nofoaga sa sau ai le leo o le fana.

Na fesili le loia a Siaumau i le molimau, pe sa ia vaaia se tagata o fealua’i i totonu o le lotoa a le aoga i le taimi na ia fa’alogoina ai le papa o fana, na tali le molimau, e leai.

Na toe fesiligia le molimau pe fa’afia ona faapa le fana i lea po, na tali le molimau, na te le manatuaina, ae sili atu ma le fa’alua ona ia fa’alogoina le papa mai o fana.

I le molimau a le isi tama’ita’i faiaoga e 24 tausaga le matua, sa ia taua ai fo’i lona fa’alogoina o se fana o loo faapa mai i tua o le nofoaga o loo i ai le Aoga Tulaga Muamua a Tafuna. Na taua e le molimau lona tolu lea a le malo e fa’apea, o ia, fa’atasi ai ma ona tausoga e to’alua, sa latou nofonofo i luga o le pa ma’a o loo i le isi itu o le pa o le faleaoga a Tafuna.

Pe tusa o le latalata i le itula e 10:00 i le po o le aso 14 o Tesema 2017, na fa’afuase’i ai ona latou fa’alogoina le papa o ni fana. I le taimi muamua, sa i ai lona manatu ai o se Faga Ofe, peita’i o le pa lona lua na manino ai loa i lana fa’alogo, o le fana lea o loo faapa mai.

E lei umi ona tuana’i le papa mai o fana ae aga’i atu loa le ta’avale a Leoleo ma fa’atonu i latou ina ia latou o ese vave loa ma le nofoaga lea. Na taua atili e le molimau e fa’apea, e latalata atu le vaega na faapa mai ai le fana mai le nofoaga sa latou nofonofo ai ma ona tausoga i le po na tula’i mai ai le fa’alavelave.

Na fesili le loia a le itu tete’e ia deSaulles i le molimau, pe sa latou vaaia ma ona tausoga ni tagata i le nofoaga sa latou tafafao ai ina ua mae’a ona faapapa fana, na tali le molimau, e leai.

O isi molimau sa valaauina mulimuli a le malo i le aso muamua e aofia ai Leoleo sa auai i le suesueina o lenei mataupu, e pei o le susuga i le ali’i Kapetani ia Lima Togia ma le ali’i Satini ia Misi Leo.

Na taua e Capt. Togia i lana molimau e fa’apea, o le taeao o le aso 15 o Tesema 2017 ina ua tuana’i le fa’alavelave i le po, na amata aloaia ai loa suesuega a Leoleo e uiga i lenei mataupu, ma e lata i le to’a 30 Leoleo sa auai i le suesuega.

O mau faamaonia na maua i le suesuega e aofia ai pulu fana e le’i faapapaina mo le ituaiga fana o le 9mm ma le 7.26mm, faapea ai fo’i ma atigi pulu fana ua mae’a ona fa’apapa. Sa maua ai fo’i se kilipa o se fana, le ituaiga o le ‘rifle’ o loo i ai pulu fana e le’i faapapaina i totonu.

O mau faamaonia uma sa maua i le suesuega, na mafai ona tu’u fa’atasia ma auina atu loa i le potu faapitoa e teu malu ai mau faamaonia i le Ofisa o Leoleo. Na taua atili fo’i e Capt. Togia i lana molimau, o laua ma le ali’i Leoleo ia Sgt. Leo na fesoasoani i le ali’i Leoleo Su’esu’e ia Det. Savelio Vaofanua, lea na autu i ai le suesueina o lenei mataupu, i le tuuina atu lea o fa’atonuga i Leoleo i gaioiga e faia pe a latou maua ni mau faamaonia i le taimi o le suesuega.

O le itula e 9:00 i le taeao nei lea ua fa’amoemoe e toe fa’aauau ai lenei mataupu.