To’a 6 ali’i maua Tusi Pasi mo galuega i lalo o le sami

E to’a 6 ali’i faigaluega mai le Vaega Tosova’a a le malo ua fa’amanuiaina nei i Tusi Pasi fa’apitoa, ina ua latou pasia se a’oa’oga e avea ai i latou ma ali’i e mafai ona latou fa’atinoina galuega e pei o le uela ina lea o vaega o va’a i lalo o le sami.

O i latou e to’a 6 sa fa’apineina i le vaiaso na te’a nei, e aofia ai le to’a 5 ua maua Tusi Pasi i tulaga o le fa’atinoina lea o galuega mo le lipeaina o vaega o va’a i lalo o le sami (Open Water Diver), ma le to’atasi ua ia ausia le isi la’asaga e sili atu i le fa’atinoina o galuega i lalo o le sami (Advance Open Water Diver).

O le aso Faraile na te’a nei na fa’ataunu’uina ai se ulua’i Fa’au’uga a le Vaega Tosova’a a le malo, mo i latou ua ausia togi ma ta’iala latou te umiaina ai Tusi Pasi mo le fa’atinoina o galuega i lalo o le sami, lea na auai ta’ita’i o le malo, sui o le Vaega Tosova’a, atoa ai uo ma aiga o ali’i sa fa’apineina, i le nofoaga autu o le fale’aiga a le Paradise Pizza i Pago Pago.

O le susuga i le ali’i Faifeau ia Rev. Patolo Mageo na ta’ita’ia le sauniga i se upu faamalosi mai le Tusi Paia, fa’atasi ai ma le tatalo e fa’amanuia ai i latou ua fa’apaleina i lenei aoaoga taua.

O saunoaga o le aso na saunoa i ai le Faiaoga sa gafa ma le faatinoina o le polokalame, susuga Kitara Vaiau, o le Ta’ita’ifono o le Komiti Fa’afoe o le Vaega Tosova’a, afioga i le Fa’atonusili o le Ofisa o Fefa’atauaiga ma Alamanuia a le malo ia Keniseli Lafaele, o le afioga a Pulu Ae Ae Jr e fai ai ma sui o le Faipule mai Uosigitone ia Aumua Amata, ma le afioga i le Lutena Kovana ia Lemanu Peleti Mauga, e fai ai ma sui o le afioga i le ali’i kovana ia Lolo Matalasi Moliga e le i paau atu, ona o ni isi o tuatuagia le ma’alofia.

Na taua e Vaiau i lana saunoaga e faapea, i totonu o le 4 vaiaso sa fa’atinoina ai le aoaoga lenei, sa ia taumafai ai e fa’asoasoa ta’iala uma e tatau ona silafia ma ausia e i latou e to’a 6 sa auai i le aoaoga, ina ia latou malamalama ma silafia lelei tulaga uma e tatau ona fa’atinoina i le taimi o le galuega.

“E le o se galuega e faigofie le galuega lenei, o le galuega e te fa’amavae ai i lou aiga i aso uma, ona o le galuega e fa’atino i lalo o le sami, e ala i le galulue ai mo le fa’aleleia o vaega o va’a o lo o galulue i ai le Vaega Tosova’a a le malo e fausia ma toe fa’aleleia, peita’i ua mafai ona fa’ai’uina ma le manuia lenei aoaoga, ona o le fa’amaoni o i latou sa auai i le aoga, atoa ai ma le fa’atasi mai o le Atua i taumafaiga uma fa’atinoina”, o le saunoaga lea a Vaiau, o se ali’i faiaoga o lo o ia umia Tusi Faiaoga Fa’avaomalo i le a’oa’oina lea o le maulu i le lalo o le sami.

O vaega sa aofia i le aoaoga ua mafai ona fa’apineina ai i latou ua fa’amanuina, e le gata o le a’oa’oina lea o i latou i auala e mafai ona fa’atino ai le galuega i lalo o le manava o le sami, ae o auala fo’i e mafai ona fa’atino ai galuega i ogasami ua fa’apitoa i ai le galuega.

“O le mea lilo la i le galuega lenei, e le gata e tatau ona malamalama tagata i ta’iala ma metotia o le aoga, ae tatau fo’i ona pasia uma i latou, ma o se tala fiafia ou te fia fa’ailoa atu, ona o i latou e to’a 6 sa auai i lenei aoaoga, ua ausia uma e i latou togi maualuluga e aloaia ai lo latou umia o Tusi Pasi fa’apitoa mo lenei galuega”,o le saunoaga lea a Vaiau.

O ni isi o metotia ua mae’a ona a’oa’oina ai i latou e to’a 6 ua fa’apaleina nei, e le gata ia iloa auala eseese e fa’atino ai le galuega i lalo o le sami, ae ia mautinoa fo’i le tulaga o le latou saogalemu i so o se taimi.

Na taua e le afioga a Keniseli i lana saunoaga e fa’apea, o se tasi lenei o manulauti o lo o ave i ai le fa’amuamua o le faigamalo a Lolo ma Lemanu, o le taumafai lea e fa’aleleia ma atia’e lelei le Vaega Tosova’a a le malo, ona o iina o lo o fai ma taulaiga o pisinisi tua, aemaise lava i kamupani tu’uapa e lua i le atunu’u.

“E pei ona outou silafia, e fa’amoemoe tasi lava kamupani i’a a le atunu’u i va’a fagota, ina ia maua mai ai i’a e gaosi ai ana oloa ma maua ai galuega ma tupe mo tagata o le atunu’u, ae fa’amoeoe tasi va’a fagota i le Vaega Tosova’a, o i latou e fa’aleleia vaega o va’a e fa’aletonu ina ia mautinoa e fa’aauau pea la latou galuega o le fagotaina mai lea o i’a, o le mafua’aga lena na tofia ai loa e Lolo ma Lemanu le Komiti Fa’afoe latou te ta’ita’ia le Vaega Tosova’a, ma tu’u i ai i i latou e i ai le tomai i tulaga tau Tosova’a, ina ia mautinoa e mafai ona latou fesoasoani i le fa’aleleia atoa ai ma le atina’eina o le Vaega Tosova’a i le lumana’i”, o le saunoaga lea a Keniseli.

Na fa’afetai Keniseli i ali’i e to’a 6 ua fa’amanuiaina a latou aoaoga, ina ua latou finau ma le fa’amalosi e ausia lenei tulaga maualuga.

“E fa’amoemoe tasi le Vaega Tosova’a i lalo outou galuega fa’atino, aua o tupe o lo o maua mai ai, e fesoasoani ai i le atina’e ma le tamaoaiga o le malo o Amerika Samoa, ae fa’alagolago outou aiga ma fanau i la outou galuega, lona uiga, e taua tele la outou pito laau”, o le isi lea saunoaga a le ali’i Ta’ita’ifono o le Komiti Fa’afoe o le Vaega Tosova’a.

I le saunoaga a le Lutena Kovana, sa ia fa’amanatu ai i ali’i ua fa’apineina le taua o le latou tiute tauave i le fa’atinoina o le galuega lea ua tofia i latou e fa’atino.

Saunoa Lemanu e fa’apea, e ese mai lava le galuega a i latou nei ma galuega a le toatele o tagata faigaluega o lo o fa’atinoina i le tele o aso, ona o le lato galuega, e fa’atino lea i lalo o le sami, e leai ni tagata e feoa’i ai, e na o i latou lava ma le sami loloto.

“O le tomai ua mae’a ona a’oa’oina ai outou faatasi ai ma lo outou fa’amoemoe i le Atua, o le a manuia ai la outou taumafaiga i aso uma”, o le saunoaga lea a Lemanu.

O i latou e to’a 5 ua fa’amanuiaina e aofia ai Arthur Koloi, Sinapati Avei, Malologa Talai, Peter Curry ma Andrew Maloa, ma le susuga ia Roman Risni lea sa ia maua le Tusi Pasi maualuga atu.