To’a 32 sui mai le Vasega lona 25 a Leoleo e fa’au’u i le taeao nei

E to’a 32 ali’i ma tama’ita’i Leoleo o le a fa’au’uina mai i le Vasega lona 25 a le Matagaluega o le Puipuiga o le Saogalemu Lautele, lea ua fa’amoemoe e fa’ataunu’uina i le taeao nei le sauniga mo le fa’atautoina o i latou i le maota o le Lee Auditorium i Utulei.

O le itula e 8:30 i le taeao lea ua fa’atulaga e amata aloaia ai le sauniga o le fa’atautoina o Leoleo fou, lea o le a alo atu i ai le afioga i le ali’i Fa’amasino Lagolago Sinia ia Mamea Sala Jr, ma saunoaga autu o le aso e saunoa i ai le afioga i le ali’i Kovana ia Lolo Matalasi Moliga, fa’apea ai ma isi saunoaga fa’aopoopo mai le afioga i le Maoputasi ia Mauga Tasi Asuega, o le Loia Sili ia Talauega Eleasalo Ale, atoa ai ma le Faatonusili o le Matagaluega o le Puipuiga o le Saogalemu Lotoifale (DHS) ia Samana Ve’ave’a.

O le susuga i le Faifeau Toeaina ia Rev. Elder Fa’amao Asalele mai le Ekalesia CCJS i Fagatogo ua fa’amoemoe na te taitaia le sauniga lotu i se tatalo, sosoo ai loa ma le saunoaga autu mai ta’ita’i o le atunu’u, ae mulimuli ai loa i le fa’atautoina aloaia o ali’i ma tama’ita’i Leoleo ua ausia tulaga uma sa a’oa’oina ai i latou atoa ai ma fa’ailoga fa’apitoa.

Na faamaonia mai e le afioga i le ali’i Komesina o Leoleo ia Le’i Sonny Thompson i se fa’atalatalanoaga ma le Samoa News i le vaiaso nei, le agaga ua mafua ai ona naunau ta’ita’i o le atunu’u e fia momoli atu ni saunoaga atoa ai ma ni fautuaga i ali’i ma tama’ita’i Leoleo fou, ina ia fesoasoani ai i le fa’atinoina o le latou tiute o le a sauni atu e fa’ataunu’u pe a mae’a ona fa’atauto i latou.

“O le agaga atoa o le afioga i le ali’i Kovana, ia i ai se avanoa e fautua atu ai Ta’ita’i fa’aleaganu’u o le atunu’u i ali’i ma tama’ita’i Leoleo, i auala e fesoasoani atili ai i le fa’atinoina o a latou galuega”, o le saunoaga lea a Le’i i le Samoa News.

E tusa ai o le polokalame mo le sauniga o le fa’atautoina o Leoleo fou, e to’a 46 le aofa’i o i latou uma o le a fa’atautoina i le taeao nei. E mafua lea tulaga ona o lo o aofia ai ma Leoleo e to’a 14 mai Vasega Leoleo ua mavae e le i fa’atautoina i latou.

O Leoleo e to’a 14 ua fa’aopoopo i le lisi o i latou o le a fa’atauto e aofia ai le to’a 8 mai le Vasega lona 24 ma le to’a 6 mai le Vasega lona 23 a le Ofisa o Leoleo.

Ae mo sui e to’a 32 mai le Vasega lona 25 a Leoleo, o le to’a 26 o i latou o le a fa’atauto ma avea ma Leoleo mo le Matagaluega o Leoleo, ae o le isi to’a 6 o sui mai Matagaluega eseese a le malo sa auai i lenei aoaoga, ona o le naunau lava ina ia mafai ona galulue fa’atasi le Ofisa o Leoleo fa’apea ai ma isi Ofisa Fa’amalosi Tulafono a le malo i auala e fa’amalosia ai tulafono, aemaise lava i tulaga o fualaau fa’asaina.

O sui e to’a 3 mai le Matagaluega o Auaunaga ma Tautua Lautele (DHSS) o le a fa’atauto i le taeao nei e aofia ai Paia Toeava, Jolene Mageo ma Jacob Fano. O le Vaega o Fa’amasinoga i le tulaga o le Masela ua faapaleina ai le susuga a Maua Tupua. O le Matagaluega o le Puipuiga o le Gataifale (DMWR) ua faapaleina ai le susuga a Bill Woo Ching, ma le Ofisa o Tiute ua faapaleina ai le susuga a David McMoore.

O i latou e to’a 26 o le a galulue mo le Ofisa o Leoleo e aofia ai Tigilau Fagota; Salafa’aniusila Fairholt; Farani Farani; Tavake N Foma’i; Deidra Harrington-Latu; Fa’atiu Lepou; Satia T. Leulu; Samuel Lili’u; Fa’auma Malo; Kereti III Mata’utia; Korama H. Moetala; Okesene T. Mua’ava; Muta Muta; Aokuso Paolo; Christine T. Paselio; Saito Pesaleli; Clarence Pila; Punalilo Tipa; Carter J. Soliai; Alwin Sorensen; Lagaali Jim. Stanley; Ema L. Tagaloa; Suttermemory Talamoni; Philip Salanoa; Feu Jr Tili ma Kenny Tuiloma.

O Leoleo mai le Vasega lona 24 o le a fa’atauto e aofia ai Fa’amanuiaga Areta; Raymond Fai’ilagi; Heamasi Jr Latu; Ta’iala Malala; Solo Malua; Jimmy Tagata; Justin B. Thompson ma Jason Uti.

Ae o Leoleo e to’a 6 mai le Vasega lona 23 e aofia Iakopo Ioapo; Maureen Peko; Iosefa Siatini; Toelau Talopau; Helen Tatupu ma Tovia Jr. Tuli.