TIUTE POU TU A LEOLEO

Pago Pago - AMERIKA SAMOA

O le aso Lulu na sei mavae atu nei, na tulai ai i luma o le faamasinoga faaleitumalo ia le alii 19 tausaga o Nua Taimalie, talu ona molia o ia i le umia faasolitulafono o se vaega o fualaau faasaina.  O le aso 5 o Tesema, 2023 lea ua faatulaga e faataunuu ai lona uluai iloiloga.

MATAUPU

O le aso 5 o Ianuari o le tausaga nei, na agai atu ai leoleo, le vaega e mataituina tulaga o fualaau faasaina, i le aoga maualuga a Tafuna, ina ua maua i le alii o Taimalie ia se vaega o fualaau faasaina.

Ina ua taunuu atu leoleo i le aoga maualuga a Tafuna, sa faamatalaina iai e se faiaoga lona logoina o le sui puleaoga, le susuga Oakland Salave’a, ina ia valaau leoleo ona o ni fualaau faasaina na maua i se tasi o tamaititi aoga i le aoga.

Sa tauaaoina atu e Salave’a i leoleo ia ni sikaleti ta’ai se lua ma se mea faapapa (cherry bomb), na ave’esea mai ia Taimalie.  

O lea na aveina ai loa e leoleo ia Taimalie, i le ofisa a leoleo i Tafuna, mo le fa’aauauina o a latou suesuega.

Ina ua suesueina e le ofisa a leoleo ia sikaleti taai ia sa tuuina atu e Salave’a, na mafai ona faamaonia ai, o ni vaega o fualaau faasaina, o le maliuana.  Ma o lea na aveina ai loa Taimalie e lokaina i le toese i Tafuna.

MOLIAGA I SAUAGA I TOTONU O AIGA

O le po o le aso 3 o Oketopa, 2023, na valaau ai se tina i le numera 911 mo se fesoasoani, ina ua sauaina o ia e lona toalua ma faaleaga mea totino i totonu o le la fale. 

Ina ua o’o atu leoleo i le fale o le tina mafatia, na mafai ona o latou talatalanoa faatasi ma lona to’alua.

Sa faamatala e le tina, sa fai se la tauga upu ma le tama o le aiga, lea na i’u ina a’apa atu ai lona to’alua i se apa pia ma togi ai o ia, ma tau i lona papatua.  Sa ta’ua foi e le tina le palauvale atu o lona toalua ia te ia, ma amata ai lava ina faateteleina le la misa.

Sa ia ta’ua foi, ina ua ia taumafai e valaau le ofisa a leoleo, na tago mai lona toalua ma se’i atu lana telefoni ma togi i lalo.  Ma o lona fefe tele, na ia sulufa’i ai i le fale o lona tuaoi, lea na mafai ai loa ona valaau le ofisa leoleo.

Sa faamatala e lenei tina lona lelava i uiga o lona toalua, ma ia ta’ua e faapea, o so’o se taimi lava e fa’asuaava ai le tama o le aiga, e la te misa lava ma o’o ai lava ina pa’i atu le lima o lona to’alua ia te ia.

Na aveina atu loa e leoleo ia le ua molia i le ofisa a leoleo ma sa sogitia leoleo i manogi pia o lea alii, e tusa ai ma faamaumauga a leoleo.

O lo o ua molia nei lenei alii i le faaoolima i lona tulaga e tolu, o le faatupu vevesi i totonu o lona aiga, ma le faatinoina o amioga saua.

E $1,000 le tinoitupe faatulagaina e tatala ai o ia i tua.