Tia’i le ie lavalava, maua loa e leoleo le ali’i tuuaia i le gaoi

Na avea le tia’i e le ali’i o Leupena Itele o lona ie lavalava lanu meamata sa ofu i le po lea na osofa’i ma talepe ai e se tagata se fale i Vaitogi, ma auala na faigofie ai masalomia ma molia o ia e le malo i lona osofa’ia o le fale na a’afia, atoa ai ma le moliaga o le gaoi i lona gaoia lea o se vaega tupe e tusa ma le $5,000 mai totonu o le fale.

O le masina o Tesema na te’a nei na faila ai e le malo la latou tagi i luma o le fa’amasinoga fa’asaga ia Itele, ma ua tofu atu nei i luma o le fa’amasinoga maualuga lana mataupu e fa’agasolo ai lona taualumaga.

O le mataupu e pei ona tu’uaia ai Itele na tofu atu i le Ofisa o Leoleo i Tafuna i le taeao o le aso 17 Tesema 2017, ina ua talosagaina e se ali’i le fesoasoani a Leoleo, ina ua ia maitauina le osofa’i e se tagata o se fale a se ali’i sa malaga i Apia ae tu’u atu ia te ia le vaavaaiga.

I su’esu’ega a Leoleo i le fale na iloa ai le tata’e e le tagata gaoi o se fa’amalama o se tasi o potu o le fale, ina ia maua ai le avanoa e ulufale ai i totonu.

Sa molimauina fo’i e Leoleo i luga o le fa’amalama le to’a ai o le toto o le tagata, fa’apea ai luga o le ie ufi moega na pisia uma i le toto, e foliga mai na manu’a le tagata e mafua mai i le tioata o le potu sa ia tata’eina.

Na maua atili e Leoleo i a latou su’esu’ega le mea faigaluega o le ‘hacksaw’ sa fa’atino e tipi ai le loka o le pusa u’amea sa teu ai tupe o loo pisia i le toto, fa’apea ai ma le ie lavalava lanu meamata o loo pisia fo’i i le toto sa maua ai i tafatafa o le nofoaga sa fa’atinoina ai le solitulafono.

O mea uma nei na mafai ona ao e Leoleo ma auina atu i le Ofisa e fai ma molimau i lenei mataupu.

E to’a 6 molimau na fesiligia e Leoleo ao fa’agasolo ai la latou su’esu’ega e uiga i lenei mataupu, ma taua ai e i latou nei le igoa o le ali’i ua molia ia Itele, lea sa ia laeiina se ie lavalava lanu meamata i le po o le aso 16 Tesema sa latou ta’aalo piliati ai i se tasi o fale piliati i totonu o le nu’u.

E le gata i lea, ae sa latou molimauina fo’i le uma lelei o le tupe na alu atu ma le ua molia e taalo piliati ai, o lea na mafua ai loa ona fa’amavae o ia ae toe fo’i i lona fale.

Na taua e le isi molimau i Leoleo e fa’apea, ina ua mae’a uma le tupe a Itele na alu atu mai ia i le piliati, sa ia vaaia ai le aisi tupe solo o le ua molia i isi tagata ina ia maua ai se tupe e fa’aauau ai ona ta’alo, ae na taua e le isi molimau le fa’amavae o Itele ma fo’i i lona aiga e taele pe tusa o le itula e 1:00 i le vaveao ina ua mae’a uma lana tupe, ae na fa’afuase’i ona toe fo’i atu pe tusa o le itula e 4:00 i le vaveao lava lea ma fusi tupe ta’i $1 ma amata ai loa ona toe taalo i le ta’aloga.

Na taua e le isi molimau i Leoleo e fa’apea, pe tusa o le itula e 6:00 i le taeao lava lea ao fa’aauau pea la latou ta’aloga piliati, sa ia molimauina ai se lavea i le lima matua o Itele, ma e foliga mai o loo taumafai o ia e nana mai i tagata o le au piliati.

Ina ua fesiligia e Leoleo ia Itele e uiga i le ie lavalava sa maua i tafatafa o le fale na a’afia i le osofaiga, na ia fa’amaonia ai e fa’apea, o ia e ana le ie lavalave sa maua i tafatafa o le fale na a’afia.

E $10,000 le vaega tupe lea ua fa’atulaga e le fa’amasinoga e totogi ona fa’atoa mafai lea ona tatala Itele i tua mai le toese i Tafuna, ma o lo o taofia pea o ia i le taimi nei ina ua le mafai ona ia totogiina le vaega tupe e pei ona taua.