Tete’e se tamaloa i moliaga i lona fa’amalosia o sona afafine fai

Pago Pago - AMERIKA SAMOA

E tusa ai ma fa’amaumauga a le malo, o le vaveao o le aso 20 o Aperila 2024, na valaau atu ai se tamaitai i le Ofisa a Leoleo i Tafuna, ma ripotia ai lona mauaina atu o lona tama fai o taoto i luga o lona uso.  Ina ua fa’ailoa atu e le tamaitai na valaau i leoleo, ua tuli ese e lona tama fai ia lona uso mai i le fale, sa faatonuina o ia e leoleo ina ia alu e su’e mai lona uso ona toe vala’au atu lea, ina ia mafai ona faia sa latou su’esu’ega, po o se tulaga na fa’amalosia po o se maliliega.

(O le a le lomia e le Samoa News ia suafa o i latou o lo’o a’afia i lenei mataupu, aua le puipuiga o le tamaitai na a’afia.)

O lea lava vaveao na toe fa’afeso’ota’i atu ai e le tamaitai ia le ofisa a leoleo ma fa’ailoa atu i sui malu o le malo, e tusa ai ma le fa’amatalaga a lona uso, na fa’amalosia o ia e le la tama fai.

Na aga’i atu leoleo i le nofoaga na tupu ai le fa’alavelave, ma fetaui ai ma le molimau ma le tamaitai na a’afia i luma o se fale faatali pasi, i se nofoaga e le mamao mai i le fale na tupu ai le faalavelave.

Sa pikiina e leoleo ia nei tamaitai ma o latou toe fo’i i le latou fale ma sa fa’asino iai e le molimau ia le potu moe a le la tama fai ma sa faapea ona lokaina mai ai o ia e leoleo ma aveina atu i le Ofisa a Leoleo i Tafuna mo le fa’aauauina o su’esu’ega, faatasi ai ma le molimau ma le tamaitai na a’afia.

E tusa ai ma fa’amaumauga a le malo, sa faamatalaina e le tamaitai na a’afia, o le masina o Novema i le tausaga e 2023, e na te le o manatua le aso, i le 11:00 i le po, sa ia lagonaina ai le oso atu o le ua molia, i luga o lona (tamaitai) moega ma milimili ona vae.  Na faamatala e le tamaitai na a’afia lona u’una’i ese ina o le ua molia, ma ia (tamaitai) tamo’e faatopetope atu ai i totonu o se fale ta’ele ma loka le faitoto’a.  Ina ua ia toe fo’i mai i lona potu, ua alu ese le ua molia.

O leisi taimi na toe tupu ai lenei tulaga, o le aso 20 o Aperila, 2024, na faamatala e le tamaitai, sa moe i le 11:00 i le po a’o ufiufi lona tino i lana palanikeke, ae ona lagonaina le ave’esea e se tagata o lona palanikeke, ma ia tilotilo ifo, sa ia va’aia le ua molia.

Sa faamatala e le tamaitai na a’afia le tapunia o lona gutu e le ua molia, i lona lima ma taumafai e ave’ese ona la’ei ma o’o ai lava ina ona ia (le ua molia) ona fa’amalosia o ia (le tamaitai na a’afia).

I le fa’amatalaga a le molimau, po o le uso a le tamaitai na a’afia, sa ia ta’ua ai lona savali mai lona potu ae ona fa’alogoina se pa’o mai i le potu malolo ma ia va’aia ai le tu i luga o lona tama fai ma u’u mai lona ie lavalava.

Sa faamatala e le molimau lona ‘e’e atu i lona tama fai ma fesili atu iai po o le a lana mea o fai i luga o le moega a le tamaitai na a’afia, ae tali mai le ua molia, sa alu atu e siaki le tamaitai na a’afia.  Ae na toe fesiligia e le molimau ia le ua molia, po o anafea na amata ai ona ia siakiina lona uso ae le gata i lea, sa ta’ua e le molimau lona fa’ailoa atu i le ua molia, le mataga o lana amio o lo’o fai ae ua matua, ae o lo’o taofia lo la tina i le ICU.

Na ta’ua foi e le molimau lona tulieseina o le ua molia ae peitai, sa fai mai, e leai sana pisinisi ma liliu ai le ua molia ma tuli i fafo le tamaitai na a’afia.

O lo’o ua ta’ua foi i totonu o faamaumauga a le malo, le o atu o le molimau ma lona tuagane e saili mai le tamaitai na a’afia ma sa faamatalaina ifo iai e le tamaitai na a’afia ia te ia le mea sa tupu.

Ina ua su’esu’eina e leoleo ia le ua molia, sa ia faamaonia lona milimilia o le tino o le tamaitai na a’afia, ae peitai, sa soso ese le tamaitai ma sa ta’ua e le ua molia, o iina na alu ese ai loa, ma e na te le ‘i faia seisi tulaga i le tamaitai na aafia.

BUa molia nei lenei tamaloa i moliaga e 3, e aofia ai;

Faitauga 1:  Faamalosi teine (DV), o se vaega ‘B’ o solitulafono mamafa, e mafai ona nofosala ai i le falepuipui i le va o le lim ma le sefululima tausaga, po o se sala tupe e amata atu i le $150; po o faasalaga uma e lua.

Faitauga 2 & 3:  Faia o amioga mataga i lona tulaga muamua (DV), o se vaega ‘D’ o solitulafono mamafa, e mfai ona nofosala ai i le falepuipui, i le le sili atu ma le lima tausaga po o se sala tupe e le sili atu ma le $5,000; po o faasalaga uma e lua.

E $20,000 se vaegatupe sa fa’atulagaina e mafai ona tatalaina ai le ua molia, e faatalitali ai lona faamasinoga.