Tele tupe maua mai lafoga maua ma le EITC

Pago Pago - AMERIKA SAMOA

E tusa o le $50 miliona tupe na faasau i totonu ole tamaoaiga o le Teritori i le 2022, aemaise lava i faleoloa, e faafetaia ai tupe maua mai i lafoga o tupe maua, Income Tax Credit (EITC) ma siaki o lafoga maua, na tufatufa atu e le Ofisa o Lafoga. 

I le lipoti o le Teritori tuufaatasi a le Kovana, o ta'ua ai e $14 miliona na tufatufa e le Ofisa o Lafoga poo le Tax Office, mo le au togi lafoga agavaa, i le masina o Tesema 2022 mo latou EITC. 

Pei ona lipotia talu ai nei e le Samoa News, ole tufatufaga muamua o EITC mo le 4,000 tagata togi lafoga, na faaalu ai le $7.9miliona, mo tagata sa faila i le amataga o le 2022 - 2nd Mati 2022. 

Ae o le vaega lona lua o tufatufaga, mo tagata na faila ia Mati 2 - Oketopa 24, sa tufa atu ia Tesema 19. E 4,443 tagata na agavaa. Ole aofaiga e $6.1 miliona le tupe na tufatufa iai. E leai se isi faamatalaga fou mai le Ofisa o Lafoga, poo afea lesi tufatufaga mo tagata na faila ia Oketopa 24 ile faaiuga o le tausaga talu ai. 

Ae mo le kalena ole tufatufaina o lafoga ole 2022, o ta'ua i le Lipoti tuufaatasi, o faamauina ai, e $36 miliona na totogi e le Ofisa o Lafoga i tagata agavaa i lafoga o Amerika Samoa.  Ole $9 miliona mai tupe maua i totonu lava o Amerika Samoa, ma le $27 miliona mo le lafoga faaopopo a Tamaiti, na faatupe e le Malo o Amerika. 

O siaki mulimuli ai nei na tufa mai e le Ofisa o Lafoga i le amataga o Oketopa o le tausaga talu ai.  Ae oo mai nei e iai lava tagata oloo faatalitali lava i latou siaki, ae o lea ua 2023 ua oo i le taimi e faila ai lafoga mo le tausaga 2022. 

E le'o iai se faamatalaga mai le Matagaluega o Tupe a le malo pe o iai se fuafuaga e toe maua nisi siaki o lafoga poo tax refund checks. 

E tusa ai ma le Lipoti Tuufaatasi, O le Ofisa o Tupe e feagai ai ma le malo, i le faamalieina o le faauau ai pea ona maua ia vaega tupe. 

Peita'i, o atagia i le Lipoti tulaga lelei ole aoina o tupe ma tupe totogi mo le faamautuina o galuega faatino a le faigamalo, ma le tulaga manino o iai mea tau tupe. 

O faamauina foi ile Lipoti , talu ai le siitia o tupe mai le malo, federal grants, e tusa ai ma le faaiuga o le tausaga faaletupe FY2022 e $2.5 miliona ua sili ai tupe ao, sa le'i mafaufauina.

I lana saunoaga faapitoa  ile tatalaga o le Fono faitulafono lona 38 ia Ianuari 09, na oto mai ai e le afioga i le Kovana, Lemanu P.S Mauga le tulaga tau seleni o iai a le malo, mo le tausaga faaletupe FY2022, fua i luga o tupe e le'i su'eina (unaudited financial records) e tusa ma le $1.7miliona tupe e maua mai lava i totonu o alagatupe a le Teritori. 

Na ia faamatala, o le $122.8miliona na tuu i totonu o le tausaga faaletupe FY2022 e sau mai alagatupe lava i totonu o Amerika Samoa, ae o tupe faaalu sa iai e tusa ma le $121.1miliona.  Ma o le a tuuina lena lipoti o le tupe i le Fono i le taimi e uma ai ona su'e pe audit.