Tele sao Fono Faitulafono puipuia soifua maloloina i Samoa

E le gata na fa’afetaia e Ta’ita’i o le Fonotaga lona 7 a Vaega o le Soifua Maloloina i Samoa e lua le auai o sui o le Fono Faitulafono a le atunu’u i le fonotaga sa faia i le vaiaso na te’a nei, ae na la taua fo’i le tele o le sao o le Fono Faitulafono a Amerika Samoa atoa ai ma le Palemene a Samoa, i le sailia lea o auala e fa’aleleia atili ai tautua a Vaega o le Soifua Maloloina i le va o Samoa e lua.

O sui o le Fono Faitulafono a Amerika Samoa sa maua le avanoa e fa’atasi atu ai i le fonotaga, e aofia ai le afioga i ali’i Faipule ia Meauta Lauoi Mageo ma Vesi Talalelei Fautanu, atoa ai ma tama’ita’i faipule e to’alua ia Vui Florence Saulo ma Atalina Asifoa, ae mo le Palemene a Samoa, o le afioga i le Minisita Lagolago o le Soifua Maloloina ia Salausa Dr. John Ah Ching sa malaga mai, o ia fo’i lea o le ta’ita’i malaga a Samoa.

“O le taua o le fonotaga lona 7 lenei, ua mafai ai ona maua le avanoa o sui o le Fono Faitulafono a Amerika Samoa ma Samoa e fa’atasi mai ai, e fa’afofoga i auala e mafai ona latou fesoasoani mai ai i le puipuia atoa ai ma le fa’aleleia o le itu tau i le soifua maloloina i atunu’u e lua”, o le saunoaga lea a Salausa.

Ina ua fesiligia e le Samoa News sona finagalo i ni auala o le a mafai ona fesoasoani mai ai le Fono a Samoa, i le fa’aleleia atoa ai ma le atina’eina o le soifua maloloina i Samoa, na taua e le ali’i Minisita Lagolago le tatau i le Fono a Samoa ona silasila toto’a i tulafono e si’itia ai puipuiga i le itu tau i le soifua maloloina o tagata, aemaise ai o auala e fesoasoani ai i Ofisa o le Soifua Maloloina mo le fa’aleleia o le latou tautua e aofia ai le itu tau tupe.

Ae ina ua fesiligia le afioga i le ali’i faipule ia Vesi i sona finagalo e uiga i lenei mataupu, na taua ai e le afioga i le ali’i Faipule mai Manu’a #1 lea ua toe filifilia e le itumalo e avea ma o latou sui mo le isi 2 tausaga o lo o lumana’i nei, le i ai o tulafono e tatau ona fa’aulu i luma o le Fono e fesoasoani ai i le atina’eina o le soifua maloloina i Amerika Samoa.

“O ni isi o tulafono ua ou vaavaai e tatau ona fa’aulu i luma o le Fono e aofia ai pili tupe e fesoasoani atili ai i le fa’aleleia atoa ai ma le puipuia o le soifua maloloina o tagata o le atunu’u, ma fesoasoani atili ai i le tautua a le aufaigaluega a le Soifua Maloloina”, o le saunoaga lea a Vesi.

Na fa’afetaia e Vesi sui uma o Samoa e lua na auai i lenei fonotaga e 3 aso le umi, i le matagofie o fa’amatalaga ma fa’amaumauga ua mafai ona fetufaa’i e fesoasoani ai i le fa’aleleia o la latou tautua.

“E maofa le agaga i le matagofie o lenei fonotaga, aemaise lava ina ua maua lo’u avanoa ou te mafuta mai ai, e le gata ua fa’amanuiaina a’u i le tele o mataupu eseese e taua ma aoga i le siitia o le soifua maloloina o tagata, ae o se avanoa fa’aauro fo’i ua mafai ai ona feiloa’i atu i sui usufono mai le malo o Samoa”, o le saunoaga lea a Vesi.

Sa ia taua atili fo’i e fa’apea, e ui i le tele o lu’itau o lo o fetaia’i ma le malo o Amerika Samoa i le itu tau tupe, peita’i e tatau lava ona fa’amuamua auala eseese uma e puipuia ma si’itia ai le soifua maloloina o le atunu’u.