Tele ni mataupu taua na fa’amaninoina i le Fonotaga a taitai ma le mamalu lautele

Pago Pago - AMERIKA SAMOA

Na lata i le to’a selau i latou na mafai ona auai atu i se Fonotaga Lautele sa faataunu’u i le afiafi o le aso Lulu o le vaiaso ua tuanai, i le Fale Laumei i Utulei, lea na faamanino ai e taitai o le malo i nisi o mataupu o lo’o faapopoleina ai le mamalu lautele, e tusa ai ma le mataupu i le eliina o ogasami (sea mining) o le teritori.

O le toatele sa saunoa i lea afiafi, na o latou fa’aalia lo latou tete’e i so’o se su’esu’ega, po o le ave’esea o minerale mai i ogasami e tu lata i le teritori, ona o popolega i a’afiaga o le siosiomagafaapea ma a’afiaga i  ‘amu, figota ma i’a o le sami.

Ae na iai foi nisi sa auai, na u’una’ia se taumafaiga i se feso’ota’iga paleni ma ni talanoaga lelei, e mafai ona nofo malamalama ai itu e lua, i le a’afiaga o sami i lenei fuafuaga, po o auala e penefiti mai ai malo ma atunuu.

Sa tatalaina le fonotaga i le saunoaga a le Afioga i le Kovana, Pulaalii N. Pula, ma na ia toe faamamafaina ai le tutu fa’atasi o ia, le Afioga i le Lutena Kovana, Pulumataala Ae Ae Jr., ta’itai o le Maota Fono faapea ma le Afioga i le sui Faipule i le Konekeresi ia Uifaatali Amata, e tete’e atu i le eliina o ogasami (sea mining) o lo’o siomia Amerika Samoa.

Na ta’ua e Pula ia le fa’asaina ona faatinoina o lea tulaga, e le faigamalo sa tula’i mai i le 2024, lea sa taofia ai le faia o lea tulaga i le sami, se’ia toe iloiloina auiliili lenei mataupu ma fa’amautuina le puipuga o le siosiomaga.

Ma sa ta’ua e le afioga i le Kovana le fa’amautuina e lana Faigamalo lea lava tulaga e tasi, e pei ona sa fa’alauiloa mai e lona ofisa i se fa’aaliga fa’alauaitele, i le masina ua tuanai.  Ma o le fonotaga faalauaitele lea sa faia i le vaiaso ua mavae, e pei ona saunoa ai Pula, o se tasi lea o la’asaga a le Faigamalo, e lagolagoina ai le fa’alauiloaina, aoaoina ma feutagaiga ma le lautele.

Sa ia u’una’ia foi le mamalu lautele, ina ia faaleoina o latou manatu, e ala i le fa’aooina atu o manatu tusitusia i le malo feterale, e ala i le latou talosaga mo faamatalaga (RFI-Request for Information), e patino i lenei mataupu, ae e le’i o’o atu i le aso 16 o lenei masina.

Na fa’alauiloa foi i le fonotaga, le talosagaina aloaia e le kovana o seisi 30 aso faaopoopo, e mafai ai ona fa’ao’oina atu manatu ma popolega, i le BOEM (Bureau of Ocean Energy Management).  Ae peitai, e o’o mai i le aso Lulu o le vaiaso ua mavae, e le’i mauaina se tali mai i le malo feterale.

I le saunoaga a le Afioga i le Lutena Kovana, e ui ina sa le’i auai atu o ia i le fonotaga – ae na fofogaina e le faletua ia Andra Samoa, sa faapea ona lapata’ia ai e Pulu ia tatalaina o le avanoa i tagata po o pisinisi mai fafo, e latou te fa’aleagaina ia ogasami, o meaalofa po o mea sina, mai le Atua, e ao ona puipuia.

Sa fa’aaliina ai foi i le fonotaga ia se ata vitio mai i se sui o le BOEM, na fa’amatalaina ai ia le vaega a le BOEM i polokalama mo le lisiina o ogasami, mo minerale, e ese mai i le suauu, kesi ma ‘sulfur’ ma faamalamalama ai auala e mafai ona faaleoina ai manatu ma popolega o le mamalu lautele.

O se folasaga mai ia Dr. Sabrina Suluai-Mahuka, le Faatonusili o le ASRO (American Samoa Resilience Office) ma le Taitaifono o le komiti o le ‘Deep Sea Mining’ a Amerika Samoa, na fa’amanino ai le a’afiaga o ogasami, pe afai ae eliina (deap sea mining).  Ma na faamamafaina ai tulaga e a’afia ai le siosiomaga, o aganu’u faapea ma a’au, figota ma i’a o le sami.

Na ta’ua e Dr. Suluai-Mahuka le tele o se a’afiaga pe afai ae eliina ia ogasami, ma o lea a’afiaga, e mafai ona o’o atu i maila ma maila mamao o le sami.  Ma e mafai ona a’afia ai foi femalagaiga a i’a o le sami, e aofia ai tafola, malie, laumei ma isi lava mau i’a, e pei o le tuna, lea e fa’alagolago i sami mama, e femalaga’i ai, e mafai ona avea le ‘pefu’ mai i le eliina o ogasami, ma tulaga e punitia ai a latou femalagaiga.

O a’afiaga i ‘amu o le sami, e mafai ona tineia e ‘pefu’ mai i le eliina o ogasami ma fa’atama’ia ai i’a laiti aemaise foi ia akule ma palolo.  Ma e pei ona saunoa Dr. Suluai-Mahuka, e le gata i ogasami loloto o le a a’afia, ae o le a faapea ona a’afia ai vaega uma o le sami, e aofia ai ogasami o lo’o tatou fa’alagolago iai mo le tausia o tatou soifua. 

Na lapata’ia foi e Dr. Suluai-Mahuka le leai o se fa’amaoniga, o le a mauaina e Amerika Samoa, se vaegatupe mai i nei galuega ua fuafuaina i ogasami.  Aua o lo’o umia uma e le Ofisa o le Initeria ma le malo feterale ia lisi ma aoina tupe o lea galuega.  O lona uiga, e a’afia Amerika Samoa ae leai se polofiti ono maua mai ai.

Sa fesiligia e se tasi le tulaga na aofia i le fa’amatalaga a le BOEM e faapea, sa lagolagoina e le Kovana ia lenei fuafuaga, ma pe mafai ona toe fa’aui i tua ia le lagolago a le kovana.  Ae peitai, o le taimi lea ua tula’i ese ia le alii kovana mai i le fonotaga.  

Ma o le tamaitai Loia Sili ia Gwen Tauiliili-Langkilde sa ona faamaninoina mai e faapea, e le’i auai le kovana i le faagasologa o lenei fuafuaga.  Ae na mafua, ona o se talosaga mai i se kamupani mai atunu’u i fafo (Impossible Metals).  Ma na ta’ua e Tauiliili-Langkilde, i lalo o tulafono feterale, e iai loa se talosaga faapea, e mafai e le ofisa feterale e mataituina ia mataupu (pei o le BOEM) ona faia se RFI (Request for Information) pe te’ena le talosaga.

Sa fa’amamafaina e le tamaitai Loia Sili, le mafai ona taofia o so’o se galuega, ma o le taua lea o le fa’aleoina o manatu a le mamalu lautele.  Ma sa ia ta’ua foi, e na’o le 97 tagata ua fa’ao’oina atu o latou manatu tusia, e tete’e ai lenei fuafuaga.  Ma o se fuainumera laititi tele.