Tele mataupu fa’atula’i e Tuaolo, mana’omia ona iloiloina e le Senate

Pago Pago - AMERIKA SAMOA

O le taeao o le aso Lua na toe amataina ai galuega a le fono faitulafono, i le latou nofoaiga lona 38 ma sa tele ni mataupu na fa’atula’i i totonu o le Maota o Senate, e le afioga i le Peresetene o le Senate ia Tuaolo Manaia Fruean, e faapea o ni mataupu na fa’ao’o atu e le mamalu o le atunu’u.

O nei mataupu, e aofia ai ni tu’uaiga faasaga i ni isi o faatonusili o matagaluega a le malo, lea e iai a latou pisinisi tua, ae o lo o mauaina galuega fa’akonakarate a le malo.  E le gata i lea, o le mataupu i le $4 miliona lea sa teuina i se tusitupe i le faletupe a le Wells Fargo.  O leisi mataupu, o le fausia o se potu malolo mo malo fa’aaloalogia i le malae vaalele, faapea ai ma le leai o se fale’aiga i le malae vaalele.  O le toe iloiloina o le mataupu i le va’a o le ‘Kite Runner’ faapea mataupu i fualaau fa’asaina.

Na saunoa Tuaolo, ua tele le vevesi o tagata o le atunu’u ona o nei mataupu ma o lo o finagalo i se faamaninoga, ma le faia o ni suesuega pe moni nei mataupu.  Afai e fa’amaonia ona fa’asala lea o latou o lo o faatupuina nei fa’afitauli, pe o le a toe salu foi lalo o fala, e pei ona masani ona faia i tausaga ua mavae.

Na ta’ua e le peresetene o le Senate, afai ae moni nei tu’uaiga, e tatau ona logoina le kovana ma a’ami nei faatonusili ina ia molimau i luma o le SSIC.

E tusa ai ma faatonusili o lo o fai a latou pisinisi, ae o lo o tu’u iai galuega konakarate a le malo, saunoa Tuaolo, e tatau ona o latou filifili pe fai a latou pisinisi, pe galulue i le malo, ae e le mafai ona fai mea e lua.

Ma na ia saunoa e faapea, o nei mataupu e manaomia ona iloiloina e le Komiti Su’esu’e Filifilia a le Senate (SSIC), ae peitai, o lana maitau atu, e leai ni lipoti o nei mataupu i su’esu’ega a le SSIC i le tausaga ua mavae.

Na fa’aalia foi e Tuaolo lona fa’anoanoaga ona e le i auai le Taitaifono a le SSIC, le afioga Togiola Tulafono, i tauaofiaga a le Senate i le aso Lua.

O se tasi o mataupu na faia ai su’esu’ega a le SSIC i le tausaga ua mavae, o le mataupu lea i le va’a o le Kit Runner ma lana malaga toe fo’i maim ai Samoa, e aunoa ma se kilia, ae a’afia ai le to’atele o tagata faigaluega a le malo.  O lenei mataupu sa fa’asalalauina i vaega fa’asalalau, e le gata i Amerika Samoa nei ae faapea foi i Samoa.  O se tasi o ulutala o ia fa’amatalaga i luga o a’upega tafailagi, sa ta’ua ai le avea o lenei mataupu ma tulaga maasiasi mo le Malo o Amerika Samoa.

I le tau fa’ai’ui’uga o le tausaga na se’i mavae atu nei, na sapina ai e le SSIC ia nisi o tagata faigaluega a le malo, lea na masalomia i le tu’uina atu o le va’a e folau ese atu ma le teritori, e aunoa ma pepa manaomia.  Sa le i faatagaina ona auai sui o le Samoa News ma isi vaega fa’asalalau, i iloiloga a le SSIC sa faataunuuina i lenei mataupu.

Sa saunoa Tuaolo, o le toatele o tagata o lo o nofo malamalama i lenei mataupu, o lo o tu’u fesili po o fea ua o’o iai ma po o le a fa’asalaina i latou o lo o masalomia, i le fa’aaogaina sese o a latou tofi i totonu o le malo.  Ma sa saunoa foi Tuaolo, o lo o fesiligia foi e tagata nei ia le tulaga i fualaau faasaina lea o lo o taumafai nisi e aumai fa’anana i totonu o le Teritori.

Na fa’atula’i e le afioga i le Senatoa Soliai Tuipine se manatu ina ia filifilia le afioga Senatoa Satele Lili’o e avea ma sui Faatonusili o le SSIC, e mafai ona fa’aauauina le galuega, ona atonu o lo o pisi le taitaifono i fa’amasinoga.

Ae peitai, sa toe fa’amanatu mai e Tuaolo, o le afioga i le Senatoa Magalei Logovi’i, o lo o avea ma sui taitaifono.

Sa faamanino mai e Magalei i luma o le maota maualuga, e seiloga lava ua le mafai ona auai le taitaifono, ona fa’ato’a tulai lea o le sui taitaifono.  Ma o le a ia feso’ota’i ma le susuga i le taitaifono, ona toe logo mai lea o le Senate.

Na talosagaina e Tuaolo ia Magalei ina ia toe faamanatu atu ia Togiola, ele fa’atali le lalolagi mo ia e ta’avili lava le kelope ma e taua le taimi.

Ona fesiligia lea e Tuaolo ia le afioga i le Senatoa Utu Sila Poasa, le Taitaifono o le Komiti o Paketi ma Tupe Fa’asoasoa, e saili le tulaga ua o’o iai le $4 miliona lea na ave teu i se tusitupe i le faletupe  le Wells Fargo.  Sa finagalo foi le Peresetene o le Senate ina ia maua mai se tala o le tupe, e fa’amanino ai po o fea ua o’o ia lea tupe.

Sa fa’aalia e Tuaolo, o lona malaga atu i le malae vaalele e faatali ia malo fa’aaloalogia a le malo lea na malaga mai i le fa’amanatuina o le 75 tausaga a le fono faitulafono, sa fa’ato’a ia nofo malamalama ai, i le leai o se potu malolo mo malo fa’aaloalogia, ma le leai o se fale’aiga i le malae vaalele, e tua iai tagata o le atunuu e o atu e fa’ae’e a latou tagata.

Saunoa Tuaolo e faapea, “Su’esu’e po o le a le mea ua le faia ai ia mea.  Ae tele nei tupe ua fa’aalu solo, ae o mea ia ua tatau ona fai”.

Ua iai se talitonuga i le afioga i le Peresetene, “A fofo mea ia ona le muimui lea ma gugulu le atunu’u.  E le o ni mea leaga ia o lo o faitio ai tagata, o mea lelei”.

Sa ia ta’ua foi e faapea, e taua le nofo malamalama o le afioga i le Senatoa ia Laolagi Vaeao ma le ofisa o mataupu faufautua a le Kovana, i nei mataupu, ina ia mafai ona fa’ailoa atu i le kovana, aua o le tele o taimi, e le o silafia e le kovana mea o lo o fai e ana faufautua.

Sa faamanino e Tuaolo, “E le o taumafai tatou e tau fa’amatatao atu i le nofoaiga lenei.  E leai.  O le tatou malo lenei.  A tatou alolofa i le kovana, fautua i mea e tatau ona fai”.

Ona liliu lea o le Peresetene i le mataupu i tagata faipisinisi Asia, lea o lo o fa’aaogaina ta’avale tetele (vans) mo a latou pisinisi, ae o lo o faalaisene o ni ta’avale a aiga, lea o lo o ave’esea ai tupe mai i le malo.

Na saunoa Tuaolo, ua le fa’atasi ona ia logoina leoleo, ae e leai lava se tulaga o faia i lea mataupu.  Na ia fa’aalia e faapea, e leai ni Saina e latou te fa’atauina se ‘van’ e fa’aaoga e a latou aiga.  O le mafuaaga o lo o fa’atau ai ‘vans’ ma laisene o se ta’avale a le aiga, ona o se taumafaiga ina ia aua ne’i totogia le lafoga 15% , ae o lea e fa’aaoga le ta’avale e fai ai galuega a le pisinisi.

Na fa’aalia e le alii Peresetene, e tatau ona mataituina e leoleo le fa’aaogaina o nei ‘vans’ ma fa’asala i latou o lo o fa’aaogaina sese nei ta’avale.

Sa aunoa le afioga i le Senatoa ia Malaepule Saite Moliga, o nisi o mataupu e pei ona fofogaina e le Peresetene, e mafai ona fa’ao’o atu i komiti a le Senate, e latou te soalaupuleina ma molimau ua mae’a ona o latou amia.

Sa ia fa’aalia foi le iai o ni ona manatu e fa’atatau i le saunoaga a le kovana i le tatalaga o le Fono i le aso Gafua, lea sa ta’ua ai le le toe iai o nisi o nonofo i Swains ma le ono tupu o lea tulaga i Manu’a.

Sa ta’ua e Malaepule, e le mana’o e fa’aaoga e le malo ia Manu’a ma se ‘alofaga i le fa’aaluina o tupe, ae na fa’atu e Malaepule se manatu ina ia alu se asiasiga a Senatoa i Manu’a e latou te tagai ma iloiloina lea mataupu, mo latou lava.

O le aso ananafi na toe tauaofia ai le Maota o Senate mo le iloiloga o ni tofiga fou, e aofia ai le Faatonusili o le Ofisa o Feso’otaiga, le susuga ia Aoelua Solomona Aoelua, faapea ma ni totino se toalua i le Komiti Fa’afoe o Faatonusili mo le Faletupe a Amerika Samoa, ia Leilua Stevenson ma Ruth Matagi.