Tele aoga a le malo e ono le mafai ona tatala i le amataga o le tausaga aoga

Pago Pago - AMERIKA SAMOA

E tele aoga a le malo o le a le mafai ona tatala i le taimi ua faatulaga e toe amata ai le tausaga aoga fou lenei 2022-2023, e mafua mai i le tele o tulaga faaletonu o loo i ai i faleaoga, fale’ai ma fale taele e moomia le fia faaleleia mo le soifua maloloina o fanau.

O se molimau lea a se tasi o Sui Asiasi Sinia a le Matagaluega o le Soifua Maloloina i se iloiloga sa faia a le Komiti o le Soifua Maloloina a le Maota o Sui i le vaiaso nei.

O le iloiloga sa faatulaga e fesiligia ai le Soifua Maloloina mo sa latou tapenaga i le tulaga saogalemu o faleaoga ao lei amatalia lenei tausaga aoga fou.

O le Taitaifono o le Komiti o le Soifua Maloloina a le Maota o Sui, afioga i le tamaitai Faipule ia Andra Tereise Samoa ma lona sui lagolago, afioga i le ali’i Faipule ia Larry Sanitoa na taitaia le iloiloga. 

O sui o le malo na auai e molimau i lenei iloiloga e aofia ai le Faatonusili o le Matagaluega o le Soifua Maloloina, afioga Motusa Tuileama Nua ma ana sui lagolago.

O le mataupu lenei na talosagaina e nisi o afioga i Faipule, i lo latou fia manino lea i se tapenaga a le Soifua Maloloina ua i ai mo le soifua maloloina o fanau aoga. 

O le popolega o nisi o afioga i Faipule, ina ne’i toe tula’i mai fo’i le faafitauli lea e masani ona tula’i mai i le amataga o tausaga atoa, e sauni fanau aoga e toe fo’i atu i potu aoga ae o atu le Soifua Maloloina ma tapuni aoga fai mai e tele vaega o loo faaletonu.

Saunoa le afioga i le ali’i Faipule ia Avagafono Tuavao Vaimaga Maiava e faapea, sa ia asia le aoga a lona itumalo ma ia molimauina ai ni nai vaega e lei mae’a lelei. Na te fia maua se ripoti mai le vaega o le Soifua Maloloina pe ua latou asia le aoga a lona itumalo i Afono i fale’aoga, fale taele ma le Fale’ai fou lea ua lata ina mae’a.

Saunoa le sui o le Soifua Maloloina e faapea, o le masina o Me na te’a nei na asia ai aoga uma lava i Tutuila, o le tele o aoga e tele galuega e moomia le toe faaleleia ma ua mae’a fo’i ona tu’u atu i ai la latou fautuaga mo galuega e moomia le fia faaleleia. 

O le masina o Iuni na sosoo ai na asia ai le aoga i Aunu’u, ae o aoga i Manu’a na asia i le masina o Iulai na te’a nei. I tulaga o aoga i Manu’a, e i ai aoga o loo faagasolo galuega toe faaleleia ae o nisi o aoga ua mae’a ona faaleleia vaega sa moomia le faaleleia.

E i ai aoga ua mae’a ona tatala i lalo faleaoga tuai ma o loo faagasolo le fausiaina o faleaoga fou e pei o le aoga Tulaga Muamua a Alatua.

O se tasi o faafitauli e pei ona taua e le Soifua Maloloina, tele Fale’ai e le o lava le vai vevela e faamama ai ipu ma mea e faaaoga e le fanau aoga. O le tele o aoga o le Fale’ai lava lea e lilifa i ai le tele faaletonu.

O nisi o aoga ua mae’a ona faia faaiuga e tatala i lalo faleaoga tuai ae fausia faleaoga fou, ae o le fesili ua tula’i mai, o fea e aooga ai fanau aoga pe a toe amata aoga ao lea lava e lei mae’a ona fausia faleaoga fou.

Mo faleaoga i Tutuila nei, o se tasi o faleaoga o loo pito sili ona faaletonu o le aoga i Tafuna, aemaise lava i tulaga o fale ta’ele ma le manogi o loo aafia ai le saogalemu o fanau. E le o iloa poo le ASPA e mafua ai i galuega palama pe pau lava o le manogi o le suavai lafoa’i. O nisi nei o galuega o loo galulue i ai le Soifua Maloloina ma le Ofisa o Aoga e faalelei ao lei amatalia aloaia lenei tausaga aoga fou.

O le mea moni lava e pei ona saunoa sui o le Soifua Maloloina, afai o le tulaga lea o loo taoto ai pea galuega faaleleia mo nisi o aoga nei, e ono tele aoga a le malo e le tatalaina pe a amatalia le tausaga aoga fou i le masina fou o Setema. 

Na taua e le afioga i le alii Faipule ia Vailoata E. Amituana’i lona faanoanoa tele i ata o tulaga faaletonu o le tele o faleaoga o loo taua i le ripoti na tufatufa atu i Faipule. Saunoa Vailoata e faapea, tele naua le vaega tupe a le malo o loo masa’a i le Ofisa o Aoga i tausaga tupe uma lava mo le faaleleia o faleaoga, ae foliga mai o le faafitauli numera tasi lava lea o loo tula’i mai, 

O le talitonuga o Vailoata, e le tatau ona faalagolago faiaoga o aoga taitasi uma lava i le vaega e faaleleia faleaoga a le Ofisa o Aoga, ae tatau foi ona fai so latou sao i le faaleleia o vaega o loo faaletonu o faleaoga. 

Saunoa Avagafono e faapea, afai e i ai ni aoga e le o sauni e tatala mo fanau aoga ona o tulaga faaletonu i le fale’ai ma faleaoga, o lona lava talitonuga, e tatau ona taofi le tatalaina o lea aoga ae ave muanua le avanoa e faaleleia ai manaoga o loo moomia le faaleleia. 

Sa ia taua e faapea, o le tausaga aoga lea na faatoa mae’a atu nei, o se tausaga aoga sa feagai ai le aoga a Afono ma le tele o lu’itau, ona e uma lelei le tausaga aoga e le’i tatalaina le Fale’ai, ae o taumafa e fanau aoga e pei o sanuisi na kuka mai i Vatia. 

O le isi mataupu na talanoaina, o le tulaga i tui puipuia o fanau aoga. 

Na fesili le Sui Fofoga Fetalai ia Fetu Fetui Jr i sui o le Soifua Maloloina, poo faamalosia le faia o tui o le Koviti i fanau aoga ona faatoa mafai lea ona talia fanau e lesitala i aoga. Sa ia taua e faapea, o lona grandson na faatonu e le aoga maualuga a Samoana e avatu le pepa faamaonia o le mae’a lea ona faia ona tui e 3 o le Koviti. Afai e le maua atu, e le mafai ona lesitala o ia i le aoga. 

Saunoa le sui so o le Soifua Maloloina, e le o faamalosia fanau aoga e fai tui o le Koviti ina ia mafai ai ona lesitala i latou i totonu o aoga a le malo. E le tau mana’omia fanau e fai tui o le Koviti ina ia mafai ai ona lesitala, pau le itu o loo faamalosia e le Soifua Maloloina mo fanau aoga, ia mautinoa o loo atoa uma tui puipuia o faama’i pipisi mo fanau e 5-18 tausaga le matutua.

O le faaiuga o le masina nei lea ua faamoemoe e toe faia ai le asiasiga faaiu a le Soifua Maloloina mo aoga uma i le atunu’u, ona manuia ai loa lea o le aoga e tatala ma le aoga e le tatalaina.