Teena talosaga Thomas Siaumau e fa’atulaga se tupe e tatala ai o ia

Ua teena e le Fa’amasinoga Maualuga le talosaga na fa’aulu e le ali’i o Thomas Siaumau, tauala atu i lana loia ia William Olson, mo se avanoa e mafai ai e le fa’amasinoga ona fa’atulaga se tupe e tatala ai o ia i tua, a o fa’agasolo ai taualumaga o lana mataupu.

I le faaiuga na tuuina mai e le Fa’amasinoga Maualuga i le vaiaso nei e uiga i lenei mataupu, na taua ai e afioga i ali’i Fa’amasino e fa’apea, i le mae’a ai ona o latou iloiloina ma le toto’a o mau uma e uiga i lenei mataupu, ua fa’amalieina ai loa le Fa’amasinoga, e le agava’a ona latou fa’atulagaina se tupe e tatala ai Siaumau i tua, ona o ia o se tagata e ono lamatia ai le saogalemu o tatgata lautele.

E le gata i lea, e maualuga le talitonuga o le Fa’amasinoga, e mafai e Siaumau ona taulimaina e ia a’upega mata’utia e ono lamatia ai le saogalemu o tagata.

O lo o molia e le malo ia Siaumau i moliaga eseese e 9 e aofia ai moliaga mamafa e 5, e mafua mai i le fa’alavelave lea na tula’i mai i le masina o Tesema 2017, lea o lo o tuuaia ai o ia i lona fa’aaoga o se a’upega o le ituaiga o le AK-47 e osofa’ia ai ni Leoleo ma fa’aleagaina ai se ta’avale Leoleo i Tafuna.

Talu ai le matuia o fa’amatalaga na faila e le malo e uiga i lenei mataupu, na teena ai loa e le afioga i le ali’i Fa’amasino o le Fa’amasinoga Fa’aitumalo ia Fiti Sunia le fa’atulagaina o se tupe e tatala ai Siaumau i tua.

Na fa’aagafua e le ua molia ona aia e le fa’ataunu’uina ai lana ulua’i iloiloga i luma o le Fa’amasinoga Fa’aitumalo, ma tofu atu ai loa lana mataupu i luma o le fa’amasinoga maualuga.

Na finau Olson e fa’apea, e i ai le aia tatau o Siaumau e agava’a ai ona fa’atulaga se tupe e tatala ai o ia i tua.

Na tete’e malosi le loia a le malo ia Woodrow Pengelly i le talosaga a le itu tete’e. Na taua e Pengelly e fa’apea, e le o se taimi muamua lenei ua molia ai Siaumau i se mataupu matuia fa’apea, e le gata i Amerika Samoa nei ae faapena fo’i i le setete o Hawaii.

Na taua e le fa’amasinoga i lana faaiuga e fa’apea, i le mae’a ai ona latou iloiloina o mau e fa’atatau i lenei mataupu, ua latou molimauina ai le ono lamatia o le saogalemu o tagata lautele pe afai ae tatala Siaumau i tua.

“E tele isi solitulafono na ta’usala muamua ai le ua molia, e le gata i Amerika Samoa nei ae aofia ai fo’i ma Hawaii. O nei mataupu eseese uma, ua manino mai ai i le fa’amasinoga le leai o se popole o le ua molia i le saogalemu o tagata aemaise ai Leoleo ma i latou e fa’amalosia le tulafono”, o se vaega lea o le fa’aiuga a le fa’amasinoga.

“Afai ae tatalaina o ia i tua, e tele le avanoa e mafai ai ona ia umia a’upega mata’utia, ma e ono avea lea tulaga ma auala e lamatia ai le saogalemu o tagata lautele”.

Ona o nei mafua’aga uma, ua faia ai loa le fa’aiuga a le fa’amasinoga ina ia teena le talosaga e fa’atulaga ai se tupe e tatala ai Siaumau i tua.

O lo o taofia le ua molia i le toese i Tafuna, ma ua fa’amoemoe o le taeao nei e toe tula’i ai i luma o le fa’amasinoga maualuga mo le isi ana iloiloga.