Te’ena talosaga a le Ofisa o Aoga mo se taimi fa’aopoopo e fa’amae’a ai poloketi

Pago Pago - AMERIKA SAMOA

O lo’o feagai nei le Ofisa o Aoga a Amerika Samoa (ASDOE) ma se tulaga pagatia, i le toe ave’esea o le faitau miliona o tupe feterale, lea na fa’aagaga mo ni poloketi e 14, e fesoasoani i taimi na a’afia ai a’o’aoga a fanau ona o le Koviti.

O lenei vaegatupe e mai i le ARPA (American Rescue Plan Act, ma sa talosagaina e le ASDOE mo se taimi fa’aopoopo e mafai ona fa’amae’aina ai poloketi ua mae’a ona fa’aagaga ai nei vaegatupe, ae peitai ua te’ena mai le latou talosaga e le malo feterale ma le ofisa o le OESE(Office of Elementary and Secondary Education).

I se tusi na tusia ia Me 8, 2025 ma sainia e le sui Failautusi Lagolago a le OESE, o Hayley B. Sanon, o lo’o faapea ona te’ena ai le toe fa’aopoopoina o se aso, e mafai ona fa’amae’aina ai poloketi e 14 a le ASDOE ma mafua’aga ua te’ena ai le talosaga ale ofisa aoga lotoifale.

E pei ona ta’ua e Sanon, e lua ni mafua’aga ma’oti ua te’ena ai le talosaga a le ASDOE, e aofia ai le le a’afia tonu o auaunaga fa’alea’oa’oga a fanau a’oga po o le le ma’oti o nei auaunaga mo fanau aoga.

O nei poloketi e aofia a ni falea’oga e lua mo vasega JROTC a le aoga maualuga a Leone ma Tafuna, faapea ma ni fale ta’alo se valu, lea ua mae’a ona fa’apaiaina fanua e faatutu ai.

O isi poloketi e fa, e aofia ai le fale teu oloa a le School Lunch, o se fale mo le ofisa aoga (o le poloketi pito sili ona taugata lea, i le $24.5 milioa), o le toe fa’aleleia o le pamu kesi a le Ofisa o Aoga faapea ma se ofisa e mataituina ia vaegatupe mo so’o se galuega a le ofisa o aoga.

O nisi o nei poloketi, ua amata ona fa’ata’atia a latou fa’avae, ae o lo’o fa’atalitali le filifilia o kamupani e fa’atinoina ia galuega, e pei o le fale teu oloa a le school lunch i tua o le falepuipui i Tafuna.

Ua mafua ona te’ena lea galuega, ona ua taofi le malo feterale, e leai sona so’otaga tonu ma le auaunaga o fanau aoga i taimi sa taofia ai a latou a’oa’oga ona o le Koviti.

E ui i lea, ae o lo’o ta’ua i le tusi a Sanon le iai o se avanoa e mafai ona apili ai le latou fa’ai’uga, ae ia fa’auluina atu lea apili ae e le’i atoa le 30 aso mai i le aso o lana tusi.

I sana tali atu i le tusi mai i le OESE, sa fa’aalia ai ele  tamaitai Faatonusili o le ofisa o aoga a Amerika Samoa, ia Maefau Dr. Mary Lauagaia Taufete’e ia le agaga fa’anoanoa ona ole fa’aaliga mai i le malo feterale ma le iai o se faamoemoega, o le a apili lea fa’ai’uga.