Teena Maota Maualuga tofiga o Dr. Pedro, totino Komiti Fa’afoe a le falema’i, LBJ

Pago Pago - AMERIKA SAMOA

O le tofiga a le afioga i le kovana sili mo Dr. Patrick P. Pedro e avea ma totino o le Komiti Fa’afoe a le LBJ Medical Center, na te’ena e le Maota Maualuga i le Aso Lua, ina ua le mafai e le sui filifilia ona maua palota “ioe” mo le mo le fa’amaoniaina.

E toaono senatoa na palota “ioe” ae toafitu i latou na palota “leai” e faamaonia ai le sui filifilia. Na mana'omia e Dr. Pedro le itiiti ifo ma le 10 palota “ioe” mo le fa'amaoniga. Ma ua te’ena aloa’ia le filifiliga ona e na’o le Senate e fa’atagaina i lalo o le tulafono e fa’amaonia ai le filifilia o le kovana i le Komiti Fa’afoe a le LBJ.

O lo o i ai le avanoa a le ali’i kovana e tofia ai se isi sui fou, ae o le aso Faraile nei e tapunia aloaia ai le tauaofiaga o lo o i ai nei. E mafai fo'i ona ia toe tofia Dr. Pedro pe a amata le tauaofiaga lona lua a le Fono i le masina o Iulai pe ta'u mai se isi sui filifilia.

O Dr. Pedro sa suitulaga i le sui o le Komiti Fa’afoe ia Malouamaua Dr. P. Tuiolosega, lea na mae’a lona tofiga i le aso 2 Mati, 2023.

Na faamanino e le alii kovana i lana tusi i le Maota Maualuga, o Dr. Pedro na faauu mai le Kolisi Tu’ufa’atasi a Amerika Samoa i le tausaga e 1988, ma na ia fa’amae’a ana ulua’i tausaga e tolu o a’oa’oga fa’afoma’i tulagalua e ala i le Pacific Basin Medical Officer Training Program, a’o le’i a’oga i Fiti School of Medicine lea na ia faauu mai ai. 

Sa fa'auma e Dr. Pedro se Polokalama a le Iunivesite o Hawaii Surgical Residency i Hawaii i le 2008. Sa galue Dr.Pedro o se Junior Surgeon General mo le LBJ Tropical Medical Center i le amataga o lana galuega. Talu mai le 2011 sa galue ai i le Acute Care Surgery i Queens Medical Center i Honolulu.

O le palota a le Senate ina ua ma’ea le iloiloga a le Komiti o le Falema’i ma le Suifua Maloloina i le taeao o le Aso Lua, lea na saunoa ai Dr. Pedro ua uma ona ia fuafuaina lona toe foi mai i Samoa. 

Sa fa’aalia e afioga i senatoa na saunoa i le taimi o le iloiloga, o latou popolega i fa’afitauli o lo o tula’i mai i le LBJ ma na fa’ailoa ai e le afioga i le ali’i senatoa ia Magalei Logovi’i fa’amatalaga sa ia maua e fa’apea, o RN i le LBJ ua o ese atu ona e laititi a latou totogi - e ui i le tulaga moni o i latou o RN ma e mana’omia.

Na fesiligia e Magalei pe aisea ua le maua ai e le Komiti Fa’afoe a le LBJ ni totogi mautu mo tausi soifua, ae o lea ua fa’a faigaluega se tagata, lea e le o fa’atatau i le paketi.

(E le’i fa’ailoa e Magalei lea tofiga ae o lo’o malamalama le Samoa News o lo’o fa’atatau i le Fa’atonu fou o le Komiti Fa’afoe o le LBJ.)

I le taliina o fesili a isi sui o le komiti, fai mai Dr. Pedro a o leʻi oʻo i le COVID, e masani ona malaga mai i Amerika Samoa e fesoasoani i le falemaʻi, e ala i konafesi, ma lauga. Fai mai a ia, e manaʻomia e le teritori ni fale faʻafouina, faʻafouina auaunaga - ina ia le taumafai e ave gasegase i Hawaii mo togafitiga. 

I le tele o tausaga o i ai Dr. Pedro i Queens Medical Center, na fesiligia ai e le afioga i le senatoa ia Satele Lili’o pe aisea ua le mafai ai ona galue le sui filifilia i le faia o se maliliega e tu’uina atu ai ma’i i le va o Queens ma le LBJ.

Na toe manatua e Dr. Pedro se fonotaga sa taloina i ni nai tausaga ua mavae e uiga i lea mataupu ma o le mataupu tele e le o iai se maliliega e tuuina atu i le va o Queens ma le LBJ, o pili e lei totogia, ma le tele o aitalafu a le LBJ o loo tumau pea ona le totogiina.

Ae ui i lea, ua mafai ona talia e le Queens Medical Center gasegase mai Amerika Samoa o lo’o i ai a latou inisiua mo gasegase.