Te’ena e se tamaloa i Samoa moliaga i le maliu o ni tagata se to’alua

Apia - SAMOA

Ua te’ena e se tamaloa 58 tausaga ia ona moliaga i lona tafanaina o ni tagata se to’alua, ma maliliu ai, ma sa ia talosagaina le faamasinoga mo le fa’atulagaina o se vaegatupe e mafai ona totogi, e tatalaina ai o ia i tua.

E tusa ai ma le ripoti mai i le Samoa Observer, sa tula’i i luma o le alii Faamasino Sili, le afioga Fepuleai Ameperosa Roma, ia Pokati Tu’u po o Pokati Faataui, e pei ona iloa ai o ia e tagata, i le aso Gafua (aso Sa i Amerika Samoa) ma lana loia o Tanya Toailoa, lea sa suitulaga mo Mauga Precious Chang.

O lo’o molia ia Tu’u i moliaga o le fasioti tagata, fasioti tagata le fuafuaina, faia o se tulaga e fa’ao’o ai manu’a tuga i se tagata, faia o se tulaga e manu’a ai se tagata, fa’ao’olima, umia o se a’upega malosi, umia o ni pulufana, umia o se a’upega e leai se laisene ma lona ta’iina o se a’upega malosi.

O nei moliaga ua mafua, ona o le maliu fasia o le alii Satini Su’esu’e ia Peniamina Perite ma se alii mai i Nofoalii.

Na lokaina mai Tu’u mai ia Iulai ma ua mae’a ona fa’aulufaleina sana talosaga mo le faatulagaina o se vaegatupe e mafai ona tatalaina ai o ia i tua.

Ua toe taloina e le alii faamasino sili le fa’aauauina o lenei mataupu i le aso Gafua o le vaiaso fou, ina ia lava se taimi e faila ai le tali mai i le ofisa a le malo, e tusa ai ma le talosaga a le ua omlia.

O le aso 24 o Iulai, na pu’eina ai e leoleo ia Tu’u, lea e malaga mai i le afioaga o Fasito’o.

O lo’o masalomia e leoleo le ua molia, i lona fasiotia o se alii mai Nofoalii i le aso Sa ae ona fanaina ia Satini Perite i le aso Gafua na soso’o ai, a’o feagai ai le alii Satini ma le faatinoga o ona tiute faaleoleo.