Ta’utino Faatonusili o Tagata Faigaluega o ia na fautuaina le toe faafo’i i tua o totogi

Pago Pago, AMERIKA SAMOA

Na faamanino e le Faatonusili o le Matagaluega o Tagata Faigaluega a le malo (DHR) ia Lynn Pulou Alaimalo i luma o le Maota o Sui i le vaiaso na te’a nei, sa ia fautuaina le afioga i le ali’i Kovana ia Lemanu P. S. Mauga e faatatau i totogi sa soona fai e le tusa ma le tulafono, ma fautuaina ai loa e le Kovana le tatau lea ona iloilo totogi e pei ona fesiligia.

O le aso Tofi o le vaiaso na te’a nei na molimau ai le Tamaitai Faatonusili o le Ofisa o Tagata Faigaluega a le malo i luma o le Komiti o le Faagaioiga o le malo a le Maota o Sui, mo le faatalatalanoaina o ni mataupu e faatatau i le auaunaga a lona Ofisa.

O nisi o ia mataupu e aofia ai le mafua’aga o le toe faafo’i i tua o totogi o tagata faigaluega a le malo, o le aofa’i o tagata faigaluega a le malo o lo o totogi saofaga i le litaea, faapea ai ma le aofa’i o tagata faigaluega o lo o galulue faa konekarate i le malo.

O le afioga i le ali’i Faipule ia Faimealelei Anthony Fu’e Allen na taitaia le iloiloga, lea na vave faamuta ina ua maua e le Komiti le faasilasilaga faalaua’itele mai le Matagaluega o le Puipuiga o le Saogalemu Lotoifale (DHL) e faatatau i le galulolo lea na lapataia ai Amerika Samoa, e mafua mai i le mafui’e na tula’i mai i se tama’i motu e le mamao ese ma Niu Sila. O le itula e 8:30 i le taeao nei lea ua faamoemoe e toe faaauau ai lenei iloiloga.

Na fa’aalia e le afioga a Faimealelei lona lagona faanoanoa ina ua le mafai e le Tamaitai Faatonusili ona tuuina atu nisi o ripoti sa talosagaina e le Komiti mo le iloiloga. 

O se tasi o mafua’aga na taua e Faimealelei o lo o naunau ai le Komiti e fia maua le aofa’i o tagata o lo o galulue konekarate i le malo, ona o le eseese o ripoti ua taulima e le Komiti e faatatau i tagata faigaluega a le malo o loo fai saofaga i teugatupe a le Litaea a le malo.

E tusa ai o faamaumauga na tuuina atu e le Tamaitai Faatonusili i lana ulua’i molimau i luma o le Maota o Sui, e silia i le 6,000 le aofa’i o tagata faigaluega a le malo. Ae o le molimau a le Teutupe a le malo ia Malemo Tausaga i luma o le Maota o Sui, e silia i le 4,000 tagata faigaluega a le malo o lo o fai saofaga i le Litaea, lona uiga, o le isi 2,000 tagata faigaluega a le malo e le o faia ni a latou saofaga i le Teugatupe o le Litaea.

E fiamalamalama le Komiti pe aisea e le faia ai ni saofaga a le silia i le to’a 2,000 lea, poo i latou uma nei o tagata faigaluega konekarate pe leai fo’i. 

Na faailoa e Faimealelei ia Pulou Alaimalo e faapea, e le o se suesue vale o le Komiti ua mafua ai ona fesiligia faamaumauga e pei ona taua, ae o le naunau lava e faamanino tulaga o mataupu o loo fesiligia e afioga i Faipule. 

Na faailoa e Faimealelei i le Tamaitai Faatonusili e faapea, o le igoa lea ua faaigoa ai oia e le to’atele o tagata faigaluega a le malo, o ia o le “Ta’ita’i o hire ma fire”, poo ia o le ta’ita’i na te faa faigaluegaina tagata faigaluega atoa ai ma le tutuli o tagata faigaluega.

Saunoa Faimealelei e faapea, e manino lava le tulafono, e le agavaa tagata o loo galulue faa konekarate i le malo ona fai ni a latou saofaga, peita’i o le faafitauli lea ua maitauina, e i ai tagata o lo o galulue faa konekarate i le malo o loo faia a latou saofaga i le teugatupe o le litaea, ma ua atagia manino ai le soli o le tulafono.

Na fia malamalama Faimealelei i le mafua’aga ua toe taofi ai siitaga a tagata faigaluega o le malo, ae o siitaga ua uma ona pasia ma ua mae’a fo’i ona pasia i totonu o le paketi o le tausaga tupe lenei 2021 lea na pasia e le Fono Faitulafono ma sainia e le Kovana.

Na faamanino e Faimealelei e faapea, soo se faaiuga lava e sainia e le Kovana, e le tatau ona toe fesiligia lea faaiuga.

Na taua e le Tamaitai Faatonusili e faapea, soo se siitaga lava e fuafuaina, e tatau lava ona uia ala uma o le tulafoo. Mo se faataitaiga, afai o se siitaga o totogi ua pasia e le Faatonusili, e tatau ona fesiligia muamua le Ofisa o le Paketi poo i ai se tupe e faatupe ai lea siitaga. 

“O le mea mautinoa lava e tatau ona malamalama i ai le Komiti, e ese lava tulafono a le Ofisa o le Paketi, ese fo’i tulafono a le matou ofisa o loo pulea ma vaavaaia tagata faigaluega. E i ai tulafono e faavae ai faaiuga a le Ofisa o le Paketi, e i ai fo’i tulafono e faavae ai faaiuga a le Ofisa o Tagata Faigaluega a le malo,” o le faamaninoga lea a le Tamaitai Faatonusili.

Sa ia taua e faapea, soo se taimi lava e fesiligia ai le Ofisa o le Paketi, e talu mai lava i latou, “ioe o lo o i ai le tupe,” ae a tu’u atu loa i le Ofisa o Tagata Faigaluega, e ese fo’i a latou tulafono e fa’aaoga, e tatau ona matou auiliili lelei poo talafeagai agavaa o le tagata faigaluega ma le totogi lea ua tuu atu i ai.

Mo se faataitaiga e pei ona saunoa, afai e $30,000 le siitaga o le totogi lea ua fuafua e sii ai le totogi o se tagata faigaluega, e muamua lava auiliili e le vaega e ta’ua o le ‘Classification Division’ pe talafeagai le totogi ma agavaa o le tagata faigaluega.

“E le gata ina iloilo pe agavaa oe i le siitaga fou, ae tatau fo’i ona malamalama le Ofisa o Tagata Faigaluega a le malo pe i ai nisi faamaumauga e faasaga ia te oe. Afai e le agavaa oe i le siitaga, lona uiga e te le maua le siitagafou lea ua tu’uina atu,” o le molimau lea a le Tamaitai Faatonusili.

E le i nofo lelei i le finagalo o le Sui Fofoga Fetali tali ma faamatalaga na ofo atu e le molimau.

Na fesili Fetu i le Tamaitai Faatonusili poo ai le igoa o lana Sui Faatonu o loo la to’alua, ae na tali le tamaitai Faatonusili lagolago e faapea, o le tamaitai ia Liupapa Avauli, e le o lana Faatonusili lagolago lea, ae o se tasi e faapitoa lona tomai i le iloiloina o tagata faigaluega, ma ua faatoa 3 ona tausaga talu ona galue i le Matagaluega.

“Na e fautuaina le Kovana ina ia toe faafo’i i tua siitaga o totogi o tagata faigaluega a le malo sa fai e le nofoaiga ua mavae atu,” o le fesili lea a Fetu. 

Na tali le Tamaitai Faatonusili, “Sa i ai fo’i la’u fautuaga sa ave i le Kovana e faatatau i siitaga o totogi mo le to’atele o tagata faigaluega a le malo sa faia i le tausaga na te’a nei, ona o le tele o siitaga o totogi sa faia na soli ai le tulafono.”

“O le agaga moni lava o lo’u tagata, ia faailoa i le Kovana faiga faasolitulafono sa faia i le tausaga ua mavae, aemaise lava i siitaga o totogi na faia i le taimi na pisi ai i faatosina o le palota na faatoa mae’a atu nei,” o le molimau lea a Pulou Alaimalo.

“E to’atele naua tagata na sii o latou totogi i le taimi o faatosina o le palota, e le gata la na maualuluga siitaga sa faia, ae o le tele o nei siitaga o totogi na soli ai ma le tulafono.”

Saunoa Fetu e faapea, na te lagolagoina le toe faafo’i o siitaga o totogi sa faia i totonu o le 6 masina ua mavae atu, ae o le toe aafia atu ai ma siitaga o totogi ua silia i le ta’i tausaga talu ona fai, na te le lagolagoina le tulaga lea.

Na faamanino atili fo’i e Fetu e faapea, o loo fesiligia pea e lona mafaufau le toe fai o nei suiga i siitaga o totogi, ae o faaiuga na faia e le kovana ua mavae atu ia Lolo Moliga, ae sa i ai fo’i ma le afioga a Lemanu, lea ua avea nei ma Kovana.

“I lo’u lava taofi i le faaiuga ua faia, o se faaiuga ua matua le talafeagai lava lona faatinoina,” o le saunoaga lea a Fetu.

Na faailoa e Fetu i le molimau le toatele o tagata ua aafia i le suiga ua latou faia, ma ua atagia mai ai le le talafeagai. Saunoa atili Fetu e faapea,na te matua lagolagoina le faigamalo fou ua tula’i mai ina ia tausisi i le tulafono, ae aua fo’i ne’i latou faia ni faaiuga e aafia ai tagata faigaluega.