Taunu’u pili a le faigamalo i le maota o sui

O le vaiaso na te’a nei na taunu’u ai i luma o le maota o sui o le Fono Faitulafono a le atunu’u pili tupe a le faigamalo a Lolo ma Lemanu, mo le fa’amoemoe e saili mai ai ni isi alagatupe fou e faatupe ai galuega fa’atino a le malo.

O ia pili tupe e 2 e aofia ai le pili e sii ai le fua o lafoga mo oloa eseese, atoa ai ma le pili e suia ai le fua o le lafoga o oloa mo le ‘ava malosi ma oloa mai le maolo.

O ia pili e pei ona taua e le afioga i le Fofoga Fetalai ia Savali Talavou Ale i luma o le maota o sui i le vaiaso na te’a nei, o ni isi nei o pili na fa’aulufale e le faigamalo a Lolo ma Lemanu i le tausaga ua mavae.

Ae talu ai o ni isi o tulaga sa faia i ai suiga atoa ai ma fuafuaga fa’ataoto a le Fono Faitulafono, ua mafua ai ona faia le faaiuga ina ia toe tuuina mai nei tulafono i luma o le Fono mo sa latou fa’aiuga.

Mo le pili e sii ai lafoga o oloa eseese e ulufale mai i le atunu’u, ua taua ai e le faigamalo a Lolo ma Lemanu e fa’apea, o le lafoga e 5% o oloa o loo i ai, ua fa’amoemoe le malo e siitia i le 8% e pei ona taua i le gagana o le tulafono.

O le 75% o le tupe e maua mai i lenei lafoga o le a teuina i le teugatupe lotoifale a le malo, o le $1 miliona ua faamoemoe e tuuina atu i le polokalame o Sikolasipi a fanau aoga, a o le vaega e totoe ai o le a faailoga mo le lipeaina, faaleleia atoa ai ma le faafouina o faleaoga a le malo ma meafaigaluega e amata i le tausagatupe fou lenei 2018.

Mo le pili e sui a ai le fua o le lafoga o oloa mo le pia ma oloa e maua mai i le molo, o lo o taua ai e le faigamalo e fa’apea, o le lafoga o oloa mo le pia ma le molo o loo i ai nei, e faigofie lava ona faa togafiti lona faia ina ia faaitiitia ai le lafoga e totogi atu i le malo o Amerika Samoa.

O lenei faiga ua le mafai ai ona maua e le malo tupe maua o loo matua manaomia e faagaioi ai ma tuuina mai ai auaunaga mo le lautele e pei o galuega tau falema’i ma leoleo.

Ina ia taofia ai le tula’i soo mai pea o lenei faaletonu, o le a suia ai le lafoga o oloa o le pia ma le meainu e fai mai i le molo, ma aiaia ai se fua tutusa e faavae mai i luga o le aofa’i ma le tele o oloa o lo o auina mai fafo.

Ua aveesea nei le lafoga e 190% sa i ai mo le pia, ae ua suia i le lafoga fou e .35 sene i le ta’i 12 aunese o se vai poo se vaega fo’i. O lenei lafoga o le a laina tutusa uma ai tagata fai pisinisi o lo o totogiina le lafoga mo le pia o lo o fa’aulufale mai i le atunu’u.

O le agaga atoa o lenei tulafono e pei ona taua e le faigamalo, ina ia mafai ai ona maua se isi auala e faasao mai ai tupe e tatau ona maua e le malo, e fesoasoani ai i le atina’eina atoa ai ma le fa’atinoina o lana tautua mo le atunu’u atoa.

O le komiti a le afioga i le ali’i faipule ia Lavea Fatulegaee Palepoi Mauga, le Komiti o le Sailiga o le Tamaoaiga o le malo ua taoto atu nei i ai nei tulafono mo lona iloiloina.