Taunu’u i le Fono Faitulafono ulua’i tofiga e 5 ali’i Kovana

O le taeao ananafi na tauaao ai e maota e lua a le Fono Faitulafono ulua’i tusitusiga mai le Ofisa o le afioga i le ali’i kovana ia Lolo Matalasi Moliga, mo le fa’alauiloaina o ni isi o ana tofiga ua mae’a ona faia mo i latou o le a avea ma totino o lana Kapeneta mo le isi 4 tausaga o lo o lumana’i nei.

Mai le silia i le 10 o tofiga a le ali’i kovana ua mae’a ona faia mo ni isi ua avea nei ma Fa’atonusili le tumau o Matagaluega ma Ofisa a le malo, o le taeao ananafi na fa’atoa taulimaina ai e le Fono Faitulafono ulua’i tofiga e 5 mai le ali’i kovana.

O ia tofiga e aofia ai i latou e to’atolu ua toe filifilia i galuega sa la tautua ai i le malo i le 4 tausaga ua tuana’i atu, e pei o le susuga ia Talauega Eleasalo Ale lea ua toe filifilia e avea ma Loia Sili, o le afioga ia Taimalelagi Dr. Claire Poumele lea ua toe filifilia e avea ma Fa’atonusili o le Pulega o Uafu ma Malaeva’alele, atoa ai ma Ueligitone Tonumaipe’a lea ua toe filifilia e avea ma Teutupe.

O isi tofiga e lua e aofia ai le tofa i le Tootoo ia Le’i Sonny Thompson lea sa avea ma Fa’atonusili o le Matagaluega o Tagata Faigaluega a le malo, a o lea ua filifilia e avea ma Komesina fou o le Matagaluega o le Puipuiga o le Saogalemu Lautele, e sui tulaga i le tofa a Tuaolo M. Fruean lea na ulua’i tofia e le ali’i kovana e avea ma Komesina, ma le tama’ita’i ia Dr. Ruth Matagi-Tofiga lea sa avea ma Fa’atonusili o le Matagaluega o le Puipuiga o le Gataifale ma le Vaomatua (DMWR), lea ua filifilia nei e avea ma Fa’atonusili fou o le Matagaluega o Aoga a le malo.

O le a fa’atoa aloaia le avea o i latou nei ma ta’ita’i o Ofisa a le malo ua tofia i latou e galulue ai, pe afai ae fa’amaonia mai e le Fono Faitulafono i se taimi o i luma.

I se vaega o tusitusiga a le ali’i kovana ua mae’a ona tauaao e le Fono Faitulafono, o lo o ia taua ai lona fa’anaunauga lona fa’anaunauga i le vave lea ona faia se finagalo o maota e lua i tofiga ua tu’uina atu, ina ia vave ai ona maua le avanoa e fa’atino ai galuega a i latou ua tofia e fai ma ta’ita’i o Ofisa eseese a le malo.

Na fautuaina e le sui fofoga fetalai ia Fetu Fetui Jr ta’ita’i o komiti eseese a le maota o sui ananafi, ina ia silasila toto’a i auala eseese e fa’a faigofie ai le fa’atinoina o galuega a le maota i le taimi e amata aloaia ai a latou iloiloga.

O le taeao fo’i ananafi na fa’aulu ai i luma o maota uma e lua i’ugafono a maota ta’itasi, e fa’alauiloa ai le malologa a le Fono Faitulafono mo le umi e 2 vaiaso.

Ina ia tusa ai ma Vaega II Maga 11 o le Fa’avae Toe Teuteu a Amerika Samoa, e tatau ona malilie uma maota e lua mo se malologa pe afai e sili atu i le 3 aso le umi o le a malolo ai maota uma e lua.

O le aso Faraile nei, Ianuari 13, 2017 ua fa’amoemoe e amata ai le malologa a le Fono Faitulafonfo, ma le fa’amoemoe e toe a’e mai mo ana galuega masani i le taeao o le aso Gafua, aso 30 Ianuari 2017.