Tauaofia Fono Lona 6 Fa’avae o Amerika Samoa i le vaiaso lenei

Pago Pago - AMERIKA SAMOA

O le aso Gafua sa tatala aloaia ai le Fono Lona 6 o le Fa’avae o Amerika Samoa i le Fale Laumei i Utulei ma sa saunoa fa’apitoa ai le afioga i le Kovana Sili, Lemanu Peleti Mauga ma tuuina atu lana fa’afetai i le atunu’u ma fa’amalosi atu i sui usufono.

Sa maua foi le avanoa o le Sui Failautusi o le Matagaluega o le Initeria, Carmen Cantor, e saunoa fa’apitoa ai, ae le’i toe tuua e ia le territori i le po o le aso Gafua e fo’i atu i le Laumua i Uosinitone D.C.

E sili atu ma le to’a 100 usufono o le Fono o le Fa’avae mai itumalo ese’ese i Amerika Samoa o le a iloiloina mataupu e valu e pei ona pasia e le Constitutional Review Committee i le masina o Me. 

E pei ona fa’alauiloa i se poloaiga fa’alauaitele a le Kovana Sili i nai masina ua te’a, sa ia valaauina ai le Fono o Fa’avae e amata atu i le aso 29 o Aukuso e o’o atu ia Setema 2, 2022. Ae afai e manaomia se isi aso e fa’amaea ai galuega e le Fono o le Fa’avaee, e fa’aauau le tauaofiaga ia Setema aso 3. 

O mataupu nei e valu o lo’o iloiloina e le Fonoo o le Fa’avae, i lona au iliilina mai e le malo:

• Suiga o Mata’itusi faaPeretania o le Suafa o le Malo o Amerika Samoa - Suia mai le GAS ile ASG.

• O le Suiga i le Faaleaogaina o le Vito - O lenei suiga taufaaofi ole Faavae ole a faaleaogaina ai le malosiaga o le Failautusi o le Initeria e pasia ai poo le pasia ose pili taufaaofi e teena e le Kovana ae na pasia e le Fono Faitulafono.

• O le Tofiga o le Faamasino Sili - O le suiga taufaaofi e suia ai le tofiga o le Faamasino Sili e le Failatusi o le Initeria ae tuu atu ile Malo o Amerika Samoa e faia le tofiga.

• O le suiga mo le Failautusi o le Initeria - O le suiga taufaaofi e aveese ai le malosiaga e iloilo ai, liliuina se faaiuga , pe faalavelaveina e le Failautusi o le Initeria se talosaga apili mai le Faamasinga Maualuga o Amerika Samoa.

• O le Suiga o le Faate’aga - i totonu o le Faavae o Amerika Samoa e fia faaopopo ai se vaega o loo faamatala ai le ta’ita’i tama poo se ta’iala i le faate’aina poo le faatula’i o se ta’ita’i o le malo ona ua soli le Tulafono.

• O le Suiga o Taualumaga e Faamaonia ai Suiga o le Faavae - O le suiga taufaaofi lenei e aveese ai le malosiaga mai le Failautsi o le Initeria e pasia ai suiga ole Faavae ae amata ai se faiga fou e pasia i le 2/3 o le palotaga a le atunuu suiga ole Faavae.

• O le Suiga mo Tagata e Tupuga mai i Tua’ā Amerika Samoa - O le a avea ma faiga tausisia a le Malo o Amerika Samoa le puipiuia o tagata tupuga mai i tua’ā Amerika Samoa le ‘ave’esea o o latou fanua atoa ma le lepetia o lo latou soifuaga fa’aSamoa.

• O le Suiga e Toe Faatulaga ai Nofoa o le Maota o Sui - O le Maota o Sui o le a toe faatulagaina ma faaopopo ai sui o itumalo o Ituau ma Ma’upu (Tualauta).