Taua’ao meaalofa Kalapu a le Liona mo sui o le FEMA taualoa galuega

O le Kalapu a le Liona i lana fonotaga i le vaiaso ua te’a, sa avea ma se tasi o avanoa e taua'aoina ai e i latou ni faailoga fa’apitoa ina ia taualoa ai le tautua matavela a sui iloga o le FEMA sa pa'au mai i le atunu’u e fesoasoani i le ma’ea ai o le ‘afa o Gita i le masina o Fepuari.

Na faia le fa'atasiga i le Naumati Room a le Faletalimalo o le Tradewinds i le afiafi o le aso Tofi ua te’a. Na vala'aulia fa'apitoa fo'i e i latou sui iloga uma o lo ua agava'a mo fa'ailoga sa latou tapenaina, ma o se toe avanoa fo'i lea sa tu'uina i totino uma o le Kalapu a le Liona i Pago Pago nei, e fa'afofoga ai i le sui o le FEMA /SBA Yoland Stokes, e tusa o ala ua fesoasoani ai i le FEMA i tagata e maualuga lo latou tamaoaiga maua i le tausaga, po'o le aufaipisinisi fo'i, ma e tatau ai ona talosaga mo se nogatupe ae le maua mai se latou tupe toina mai le FEMA.

Ina ua mae'a le folsaga a le tama'ita'i o Stokes e tusa o lea fesoasoani, sa i ai fa'afesili  mai sui o lea Kalapu. "Pe mafai ona talosaga pea so'o se tasi ua mana'omia lea ituaiga nogatupe e fa'aleleia ai latou fale nofo, pe afai e le'i leaga tele lona fale, ae ua le agava'a i se fesoasoani ona e maualuga lana tupe maua?"

O le tali mai e leai. Afai e va'aia e itiiti mea na fa'aleagaina o lou fale i lenei afa, e le mafai ona maua sau tinoitupe fesoasoani ona o lo'o ua va'aia e maualuga lau tupe maua, e mafai lava ona e fa'atauina mea e toe faaleleia ai lou maota. E le mafai fo'i la ona e talosaga mo se nogatupe, aua e le o tele sou afaina i le afa, se'i vagana lava ua tele na'ua lou afaina, e ui ina tele lou tamaoaiga tausi o e mauaina, ae le gafatia ai e oe ona toe faaleleia lou fale nofo.O le tagata tonu lea e mafai ona tu'uina atu le avanoa e talosaga ai i se nogatupe mai le SBA e toe faaleleia ai lou fale, ae maulalo lava lona tupe tului.

O i latou na taua'aoina meaalofa fa'apitoa i ai na amata mai lava i le susuga Robert Fenton, o le Administrator o le FEMA Region lX. O lana fa'ailoga na maua, o le Tanoa, e fa'aatagia ai le agaifanua talimalo a Samoa i so'o se tasi e malaga mai e asiasi, atoa ma i latou e fesoasoani mai i ona tagatanu'u lautele, o le faafetai lea ua latou taua'aoina atu, e fa'ailo ai lo latou agaga fa'afetai tele. O lana fu'a o le Kalapu a le Liona i PagoPago mo lona potu galue ma le pine sa latou fa'apineina ai o ia ae maise o le Tusi Pasi e fa'amau fa'ailoga ai lenei tausaga ma lana fesoasoani ua lalanu ai Samoa i le tamaoaiga o le Malo Tele.

O le isi meaalofa sa tauta'aoina lea ia Benigno Bern Ruiz, o lea sa avea ma sui feso'ota'i a le Feterale i nei galuega fa'atino uma a le FEMA i le tatou atunu'u po'o le FCO lea sa galue i le va o i tatou ma fafo. O le susuga fo'i ia Kevin Cavanaugh, o le sui FCO lea sa galulue fa'atasi ma Benigno ma ua iloga ai le vave ona to'ai taunu'u mai o le fesoasoani ina ua te’a atu le afa.

Na taua'ao fo'i le meaalofa i le susuga Dominick Del Vecchio ma Victor Inge,  o le FEMA, ona o i latou nei sa mafai ona fa'asaoina tamaiti e to'alua sa tauau e malelemo i le Vai Taele i le faletalimalo o le Tradewinds i le amataga o le masina lenei.  O i la'ua sa tofu ma le "Taula" ua mamanu lelei i ai mamanu o le tatau Samoa fa'apea ma le igoa Samoa o lo'o ua mae'a tusia ai.

"O le taula lea, ia le toe mafai e lua loto ona ave'esea mai Amerika Samoa, toe tafafao mai aua ua mafai ona lua fa'aolatia nisi o le fanau talavou a lenei atunu'u, fa'afetai ua le gata i le fesoasoani i aiga e fa'aola mai i tulaga o le tamaoaiga mai le FEMA, ae ua lua fa'asaoina fo'i le ola,” o se fa'amatalaga lea a le tama'ita'i Peresetene o le Lions Club of Pago Pago 2018 Lisa Tuato'o, i le taimi na taua'ao ai fa'ailoga ia Victor Inge ma le fa'ailoga mo Del Vecchio i le ali'i o Fenton e malaga ma ia i Hawaii.

Na maua fo'i le fa'aioga mo Stokes o le SBA mo lona sao aoga ai i le atunu'u.

I lea lava fo'i fonotaga sa auai atu ai le Koluse Mumu ma sa maua fo'i le fa'ailoga tupe mo le Koluse Mumu e $1,000 sa taua'aoina i le susuga Val Tuilefano o le Ofisa autu o le Koluse Mumu i Amerika Samoa, ona o le tele na'ua o lo latou sao i galeuga fa'aola mo le mamalu o le atunu'u i le taimi o afatia ai.

E ese mai lea sa auai mai fo'i i le fa'atasiga lea ni sui mai le Koluse Mumu a Samoa Tuto'atasi ma sa talimalo ai le tatou Koluse Mumu.

I lea fonotaga sa auai ni sui se to'alua mai le Eye Clinic a le falema’i o le LBJ.  Ma sa talosaga i le Kalapu a le Liona, pe mafai ona latou fa'atupea se foa'i mo le latou itu o le tautua lautele i tagatanu'u o Amerika Samoa, ona o le tele o mea faigaluega o lo'o fa'atino ai e i latou suesuega o mata ma va'aiga mo le mamalu o le atunu'u ua fai si leva.

"Ua mana'omia lava ona maua nisi masini va'ai mata fou mo le galuega i le falema'i," o se tala lea a sui mai le Eye Clinic LBJ. Ua fa'ailoa, afai fo'i e fa'atali mo se vaega tupe e maua mai mo le fa'aleleia o lea itu o le tautua lautele, e fiu e tatali, ae sili ai le saili mai i nisi o sosiaete galulue e pei o le Liona ma le Rotary.

Ua mae'a i a'ao nei o le Peresetene o le Liona ma lana laulauatofi lea fo'i lisi umi o mea e fia fa'atau mai, ae ua taumafai atili i latou ina ia o'o atu i le masina e fa'atino ai se latou Ta'amilosaga Tapolo fa'aletausaga, ona gafatia lea ona faia se foa'i e fa'atau mai ai nei mea faigaluega e mana'omia e le Eye Clinic.

O lisi fo'i e aofia ai masini o le nofoa fa'apitoa ma mea va'ai e tatau ona fua lelei i ai le va'aiga o mata o tagata o mana'omia va'aiga, ma e ta'i lua ta'i tolu mea ua talosagaina.

Afai ae mafai ona fa'atau uma mai nei mea faigaluega e le Liona, o le aofaiga o le tau o lea fa'atauga na avatu e $184,831. E i ai le masini e $50,250 Top Con Alladin Biometer HW 3.0, o le isi masina o aofia ai e $4,833 lona tau o le Visichart Acuity System ma le nofoa e nofo ai le ua sueina lana va'ai e $7,630 ma le Instrument Stand e $5,893 lona tau. O nei mea uma e tai lua ma le ta'i tolu o taumafai ona oka mai.